«Ամերիաբանկը» ճանաչվել է լավագույն ներդրումային բանկը Հայաստանում «Global Finance» միջազգային առաջատար ֆինանսական ամսագրի կողմից: Մրցանակն «Ամերիաբանկի»` ներդրումաբանկային ոլորտում բացառիկ ձեռքբերումների, ինչպես նաեւ անհատականացված եւ հաճախորդների տարբեր ֆինանսական կարիքները բավարարելու համար նախատեսված ներդրումային բանկային եւ խորհրդատվական լուծումներ առաջարկելու կարողության գնահատանքն է:
Հեղինակավոր մրցանակաբաշխության հաղթողները ընտրվել են «Global Finance» ամսագրի խմբագիրների կողմից փորձագիտական գնահատականների եւ մի շարք չափանիշների հիման վրա, որոնց թվում են` բանկերի տրամադրած տվյալները, մասնաբաժինը շուկայում, գործարքների թիվը եւ ծավալը, մատուցվող ծառայությունները եւ խորհրդատվությունը, կառուցվածքավորման հնարավորությունները, սպասարկման ցանցը, շուկայի իրավիճակին արձագանքելուն ուղղված միջոցառումները, նորարարությունը, գնային քաղաքականությունը, տեղաբաշխված արժեթղթերի շարժը երկրորդային շուկայում, ինչպես նաեւ համբավը շուկայում:
«Ցանկացած խոշոր գործարք նախաձեռնելիս ընկերությունները հիմք են ընդունում ներդրումային բանկիրների առաջարկները, խորհրդատվությունը եւ ուղղորդումը: Նրանց փորձը, թերեւս, առավել մեծ նշանակություն ունի անհանգիստ ժամանակներում»,-նշել է «Global Finance» ամսագրի հրատարակիչ եւ գլխավոր խմբագիր Ջոզեֆ Դ. Ջիարապուտոն:
«Այս տարի, երբ գրանցվել են աննախադեպ բարձր գնաճ եւ տնտեսական անորոշություններ, «Global Finance»-ը հպարտությամբ է նշում այս ոլորտի առաջատար հաստատությունների ձեռքբերումները` անցկացնելով 2023 թ. «Աշխարհի լավագույն ներդրումային բանկ» մրցանակաբաշխությունը»:
«Ամերիաբանկի» տնօրինության նախագահ-գլխավոր տնօրեն Արտակ Հանեսյանը նշել է. «Մենք անչափ հպարտ ենք, որ ութերորդ տարին անընդմեջ ճանաչվում ենք լավագույն ներդրումային բանկը Հայաստանում «Global Finance» ամսագրի կողմից: Թեեւ վերջին տարիներին մենք անցել ենք ավելի դիվերսիֆիկացված ունիվերսալ բանկի մոդելին, մեկ տասնամյակից ավելի եղել ենք Հայաստանի առաջատար կորպորատիվ եւ ներդրումային բանկը՝ ծառայություններ մատուցելով ամենախոշոր կորպորատիվ հաճախորդներին եւ ֆինանսավորելով երկրի խոշորագույն ռազմավարական ծրագրերը: Մենք խորապես երախտապարտ ենք «Global Finance»-ին այս մրցանակի համար, ինչպես նաեւ մեր ներդրումաբանկային թիմին, որի փորձառության ու նվիրվածության շնորհիվ «Ամերիաբանկը» շարունակում է դիրքավորվել որպես հայաստանյան շուկայի առաջատարը: Մեր ապագա ծրագրերում մենք կշարունակենք առանձնակի ուշադրություն դարձնել այն ոլորտների եւ նախագծերի ֆինանսավորմանը, որոնք առավել խոստումնալից են կայունության եւ երկարաժամկետ զարգացման տեսանկյունից»:
«Ամերիաբանկը» 2022-ին միջազգային առաջատար ամսագրերի` «The Banker»-ի, «Euromoney»-ի եւ «Global Finance»-ի կողմից ճանաչվել է «Լավագույն բանկը» Հայաստանում, ինչի առթիվ մեկնարկել է «Եռակի լավագույնը» արշավը: Այն անցկացվում է «Լավագույն հնարավորությունը ստեղծում են մարդիկ» կարգախոսի ներքո եւ նվիրված է վերջին տարիներին բանկի ձեռքբերումների հետեւում կանգնած բոլոր մարդկանց` հաճախորդներից ու գործընկերներից մինչեւ աշխատակիցներ:
