Մինչ հայ ծանրորդները շարունակում էին իրենց նախապատրաստությունը Երեւանում կայանալիք Եվրոպայի ծանրամարտի առաջնությանը, մարզաձեւի ու մեր թիմերի նվիրյալները հայ երկրպագուներին ուղղորդում էին Երեւանի Կարեն Դեմիրճյանի անվան մարզահամերգային համալիր, որտեղ պետք է տեղի ունենա մրցաշարը: Նրանցից մեկը մանկավարժական գիտությունների դոկտոր, պրոֆեսոր, ՀՀ ֆիզկուլտուրայի եւ սպորտի վաստակավոր գործիչ, ՀՀ ծանրամարտի ֆեդերացիայի փոխնախագահ Վանդոս Ղարագյոզյանն է, ով 15 մենագրության, 16 գրքերի եւ մեկ ուսումնական ձեռնարկի հեղինակ է:
«Աշխարհը Հայաստանը ճանաչում է որպես ծանրամարտի կայացած երկիր,- ասում է նա «ՀՀ»-ին:- Անցած դարի 30-ականներից հայ ժողովուրդն աշխարհին տվել է փառահեղ մարզիկներ՝ Սերգո Համբարձումյան, Ռուբեն Մանուկյան, Իվան Ազդարով, Վարդան Միլիտոսյան… Կարելի է երկար թվարկել այս շարքը, անուն առ անուն նշել բոլոր ծանրորդներին, ովքեր իրենց զգալի ներդրումն ունեն ոչ միայն Հայաստանի, այլեւ մարզաձեւի համաշխարհային պատմության մեջ: Նրանք տարբեր քաշային կարգեր ներկայացնող անուններ են, ովքեր հպարտություն են պարգեւել մեզ: Այսօր էլ ունենք այնպիսի ծանրամարտիկներ, որոնցով հպարտանում ենք: Պետք է նշեմ Սիմոն Մարտիրոսյանին, Վարազդատ Լալայանին, մյուսներին… Փաստը, որ Եվրոպայի առաջնությունը Երեւանում է տեղի ունենալու, մեր երկրում ծանրամարտի հետագա զարգացման լուրջ խթան է: Տա Աստված, որ ամեն բան հաջող ընթանա, իրականանան բոլորիս նպատակները՝ կապված նաեւ այս առաջնության հետ: Թող խաղաղություն լինի Հայաստանում ու ողջ աշխարհում, եւ ժողովուրդներն իրենց առավելությունները ցուցադրեն սպորտում, այդ թվում՝ ծանրամարտի մրցահարթակներում: Ես հավատում եմ, որ ապագայում էլ ունենալու ենք փառահեղ անուններ, եւ գուցե հայկական ծանրամարտի մեծագույն հաղթանակները դեռ առջեւում են»:
