Երեւանում կայանալիք Եվրոպայի ծանրամարտի առաջնության մեկնարկից առաջ Հայաստանի կանանց ընտրանին վերջին հավաքն անցկացրեց Աբովյանի քաղաքային մարզահամալիրում: «ՀՀ»-ի խմբագրական պատվիրակությունը որոշեց այցելել ծանրորդուհիներին եւ նրանց հաղորդել մեր աջակցությունը:
-Դեռ փետրվարի սկզբներից առանձին ընդմիջումներով հավաքներ ենք անցկացնում Աբովյանում,- «Հայաստանի Հանրապետություն» օրաթերթին ասաց կանանց հավաքականի գլխավոր մարզիչ Արտաշես Ներսիսյանը:- Սա արդեն վերջին հավաքն է, որը կավարտենք ապրիլի 13-ին: Այնուհետեւ կհանգրվանենք Երեւանում, որտեղ ապրիլի 14-ին կկայանա Եվոպայի առաջնության բացման արարողությունը: Այս մրցումները շատ կարեւոր են ինչպես ողջ ազգի, այնպես էլ մեզ համար: Առաջնությանը կներկայանանք լիարժեք կազմով՝ 10 հոգով: Եթե հիշում եք, վերջին անգամ մենք 10 հոգով մասնակցեցինք 2017 թ. առաջնությանը եւ թիմային հաշվարկով գրավեցինք 1-ին տեղը՝ դառնալով Եվրոպայի չեմպիոն: Մեր աղջիկներն այսօր էլ շատ նախանձախնդիր են ու չեմպիոն դառնալ են ուզում: Տա Աստված, որ ստացվի:
-Այս հավաքի ընթացքում շեշտը հիմնականում ինչի՞ վրա եք դրել:
-Սա արդեն մրցակցային շրջանն է, ուստի հիմնականում ի մի ենք բերում կատարածը, շտկում թերությունները, որպեսզի վարժությունները կատարվեն անթերի, որպեսզի աղջիկները կարողանան ավելի շատ կիլոգրամներ բարձրացնել եւ, ամենակարեւորը, ցուցադրել, թե ինչի են ընդունակ: Կարելի է ասել, որ սա վարպետության կատարելագործման շրջան է: Պետք է օգտագործենք մեր բացարձակ ներուժը եւ բարձրացնենք այնքան, որքան կարող ենք: Թե արդյունքում ինչ կստացվի, կտեսնենք:
-Ըստ Ձեզ՝ որն է Հայաստանի հավաքականի ամենալուրջ մրցակիցը:
-Ուժեղ մրցակիցներ շատ ունենք, բայց հիմնականը Թուրքիայի թիմն է, որը նույնպես մասնակցում է լիարժեք կազմով: Չեմ կարծում, որ ամեն բան հարթ կընթանա: Մեզ ծանր պայքար է սպասվում: Պատրաստ ենք հզոր հակահարված տալ բոլոր մրցակիցներին եւ անել հնարավորը՝ մեդալներ նվաճելու եւ, բնականաբար, շատ միավորներ վաստակելու համար, որպեսզի թիմը մեդալների հաշվարկով նույնպես լավ տեղեր զբաղեցնի:
-Գաղտնիք չէ, որ ծանրամարտում մրցակիցների մասին տեղեկություններ հավաքելն այնքան էլ հեշտ գործ չէ…
-Մենք մրցակիցներին ճանաչում ենք իրենց անուն-ազգանուններով: Մնացյալ տեղեկությունները ճշտվում են մրցումների ընթացքում: Որոշակի տեղեկություններ ունենք, իհարկե, կատարած հետազոտությունների արդյունքում, գիտենք, թե ովքեր որ մրցումներում ինչպիսի կիլոգրամներ են բարձրացրել: Բայց, մեծ հաշվով, չգիտենք, թե մրցակիցները կոնկրետ հիմա ինչի են ընդունակ, նրանք էլ, իհարկե, մեր մասին չգիտեն: Ամեն ինչ կպարզի հարթակը:
-Այն, որ առաջնությունը կայանալու է Երեւանում, ի՞նչ կտա թիմին:
-Տալիս է ձեր բոլորի աջակցությունը, բայց միեւնույն ժամանակ պատասխանատվության զգացումը որոշ մարզիկների կարող է նեղ դրության մեջ գցել: Մեր թիմում կան աղջիկներ, ովքեր բոլորովին վերջերս են մասնակցել առաջնության, մեդալակիրներ են դարձել: Նրանք այժմ համալրել են մեծահասակների հավաքականը: Մեր ամենամեծ մասնակիցը Հռիփսիմե Խուրշուդյանն է, ում բոլորս ենք ճանաչում: Բայց նրա կողքին պատանիներն են: Թիմում եւ փորձ կա, եւ երիտասարդություն: Ամեն բան նորմալ է:
-Տա Աստված՝ այս առաջնությունը եւս մեկ անգամ հաստատի այն ճշմարտությունը, որ ծանրամարտում Հայաստանը գերտերություն է:
-Տա Աստված:
Ավելի ուշ հայտնի դարձավ, որ Հայաստանի ծանրամարտի կանանց հավաքականի գլխավոր մարզիչ Արտաշես Ներսիսյանը հրապարակել է այն ծանրորդուհիների ցուցակը, ովքեր հանդես կգան Եվրոպայի երեւանյան առաջնությունում:
Կանայք
Իզաբելլա Յայլյան-55 կգ քաշային կարգ
Ալեքսանդրա Գրիգորյան-55 կգ
Անուշ Արշակյան-64 կգ
Էմմա Պողոսյան-76 կգ
Տաթեւ Հակոբյան-76 կգ
Լիանա Գյուրջյան-81 կգ
Աննա Ամրոյան-81 կգ
Հռիփսիմե Խուրշուդյան-87 կգ
Մարգարիտա Առաքելյան-87 կգ
Ջուլիետա Ավանեսյան-+87 կգ
