Ծնվել եմ 1960 թ. Ապարանի շրջանի Վարդենուտ գյուղում: Գերազանցությամբ՝ ոսկե մեդալով ավարտել եմ ծննդավայրի միջնակարգ դպրոցը: Ծառայել եմ խորհրդային բանակում: Ավարտել եմ Երեւանի պետական համալսարանի բանասիրական ֆակուլտետը: Աշխատանքային գործունեությունս սկսել եմ 1979 թ. Ապարանի շրջանային «Ծաղկունք» թերթից՝ գրական աշխատող: Ապա՝ «Ավանգարդ» թերթ (թղթակից, պատասխանատու քարտուղարի տեղակալ, բաժնի վարիչ), «Հայաստանի Հանրապետություն» օրաթերթ (մեկնաբան, բաժնի վարիչ), «Հայ գործարար» պարբերաթերթ (տնօրեն-գլխավոր խմբագիր): 2010 թվականից՝ «Հայաստանի Հանրապետություն» օրաթերթի խմբագիր, 2019-ից՝ գլխավոր խմբագրի տեղակալ:
…Շնորհակալություն հայրենի կառավարությանը, որ պատճառ դարձավ, որպեսզի վերադառնամ… իմ սկիզբը:
Իսկ եթե ավելի որոշակի խոսելու լինեմ, թերթի՛ մասին, ապա որպես «հնաբնակ», այս ոլորտում «կռիվ տված» նվիրյալ ու անդավաճան անձնավորություն, ապա պիտի ցավով խոստովանեմ, որ «Հայաստանի Հանրապետություն» թերթի փակվելու հետ առավել է նվազում այն նվիրյալների թիվը, ովքեր, իրոք, հպարտորեն են կրել իրենց մասնագիտությունը եւ հավատարմորեն ծառայել են թերթ ստեղծելու անչափ ծանր ու պատասխանատու գործին: Այո, «ՀՀ»-ն ավելի քան 3 տասնամյակ լավ դարբնոց է եղել այս մասնագիտության նվիրյալներից շատերի համար, եւ ասես յուրօրինակ վերջին մոհիկանների պես մենք էլ` թերթի աշխատողներս, այսօր «վերեւների» թեթեւ, քամահրական ձեռքով տպագիր մամուլի հետ ցավալիորեն պատմության գիրկն ենք անցնում: Հուսանք, ոչ անվերադարձ…
Վաչագան ՍԱՐԳՍՅԱՆ
