Վանաձորի Հովհ. Թումանյանի անվան պետական համալսարանի դահլիճում ցուցադրվեց Իվան Անտոնյանի հեղինակած ֆիլմը՝ «Ֆորտունա» հեռուստաընկերությամբ հեռարձակվող «Լոռու արվեստագետներ» շարքից: Ֆիլմը նվիրված էր Կիրովականի առաջին գրական խմբակի հիմնադիր, մատենագետ Ռիմա Մկրտչյանին:
Բացման խոսքով հանդես եկավ Ի. Անտոնյանը: Նա, ողջունելով հանդիսականներին, ներկայացրեց նաեւ ֆիլմի նախապատմությունը: Այն նկարահանվել է շուրջ յոթ տարի առաջ, աշխատանքները կատարվել են Ռիմա Մկրտչյանի բնակարանում, աշխատավայրերում՝ Վանաձորի թիվ 2 դպրոցում, գուսան Զաքարյանի անվան թիվ 3 մշակույթի տանը, ներկայացվել են կադրեր Ռիմա Մկրտչյանի արխիվից:
Ֆիլմը նախ ցուցադրվել է «Ֆորտունա» հեռուստաընկերությամբ, ապա Վանաձորի գուսան Զաքարյանի անվան թիվ 3 մշակույթի տան մեծ դահլիճում՝ Ռիմա Մկրտչյանի 80-ամյա հոբելյանի առթիվ: Այնուհետեւ տարբեր տարիների ընթացքում Իվան Անտոնյանի անմիջական ջանքերի շնորհիվ ֆիլմը ցուցադրվել է Երեւանի «Նարեկացի» արվեստի միությունում, Արմավիրի մարզի Արտաշատի միջնակարգ դպրոցի համացանցային հարթակով եւ մեծ հետաքրքրություն է առաջացրել հատկապես համացանցում: Վկան գրառված դրական հաղորդագրություններն են աշխարհի տարբեր կողմերից:
Ֆիլմի մասին դրական կարծիք են արտահայտել ՀՀ մշակույթի նախարարության ոսկե մեդալակիր, Երեւանի «Նարեկացի» արվեստի միության նախկին տնօրեն, անվանի ռեժիսոր Լեւոն Իվանյանը, ՀՀ նախագահի մրցանակի դափնեկիր, Վանաձորի պատվավոր քաղաքացի, բանաստեղծ, արձակագիր Վահագն Մուղնեցյանը, հայ թատրոնի եւ կինոյի սիրված դերասան Սոֆիկ Սարգսյանը եւ շատ ու շատ անվանիներ: Ֆիլմի նկարահանման եւ երեւանյան ցուցադրության համար Ռիմա Մկրտչյանը պարգեւատրվել է պատվոգրերով Լոռու նախկին մարզպետ Արթուր Նալբանդյանի եւ «Արվեստագետ» ՀԿ-ի նախագահ Իվան Անտոնյանի կողմից:
Ֆիլմի՝ ՎՊՀ-ում ցուցադրությունից հետո խոսք ասացին վաստակաշատ դասախոս, բանասիրական գիտությունների դոկտոր, պրոֆեսոր Թերեզա Շահվերդյանը, ՀՀ մշակույթի վաստակավոր գործիչ, երգիծաբան, դրամատուրգ Սամվել Խալաթյանը եւ Վանաձորի գրադարանների կենտրոնացված համակարգի տնօրեն, բանաստեղծ, թարգմանիչ Խորեն Գասպարյանը: Նրանք կարեւորեցին «Լոռու արվեստագետներ» ֆիլմաշարի դերը մշակութային կյանքում, Ռիմա Մկրտչյանի վաստակը գրական-մշակութային աշխարհում եւ Իվան Անտոնյանի ավանդը արվեստի գործիչներին հանրությանը ներկայացնելու գործում:
Ասմունքեցին ընկեր Ռիմայի սաները՝ Վանաձորի պոեզիայի թատրոնի սաներ Անի Ալթունյանն ու Համլետ Երիցյանը: Այնուհետեւ մորը մեծարելու առաքելության կարեւորության մասին խոսեցին ՀԳՄ պատվավոր անդամ, բանաստեղծուհի, մանկա-գիր Ռոզա Վարդանյանը եւ մանկագիր, բանաստեղծուհի Մարտուհի Սարգսյանը:
Միջոցառման ավարտին Ռիմա Մկրտչյանի որդին՝ ՀՀ մշակույթի նախարարության ոսկե մեդալակիր, Վանաձորի պոեզիայի թատրոնի ղեկավար Ջիվան Սարգսյանն ասմունքեց հայ գրողների` մայրական թեմայով բանաստեղծություններ եւ Շիրազի բանաստեղծությամբ ներկայացրեց դաշնամուրային գեղեցիկ կատարում: Միջոցառումը վարում էր Վանաձորի պոեզիայի թատրոնի արտիստուհի, բանաստեղծուհի Հրաչուհի Լոռեցյանը:
Ա. Հ.
