Արդեն 30 տարի շարունակ Հայաստանի անկախության վավերագիրը հանդիսացող «Հայաստանի Հանրապետություն» պաշտոնաթերթը այսօր էլ քայլում է ժամանակի պահանջներին համահունչ՝ արձագանքելով առկա մարտահրավերներին եւ փոփոխություններին։ Ժամանակակից թվային տեխնոլոգիաների դարաշրջանում տպագիր մամուլի համար լրացուցիչ խնդիրներ կան լուծելու։ Այդ ճանապարհին օրաթերթն այսուհետ ընթերցողներին է ներկայանալու վերափոխված կայքէջով։
«Արմենպրես» լրատվական գործակալության տնօրեն Արամ Անանյանի խոսքով, 30-ամյակը բավականին հետաքրքիր եւ կարեւոր առիթ է առաջ նայելու եւ նոր թվային վերափոխման անցնելու համար։ «Թերթն ուներ կայքէջ, որը ժամանակին ամբողջությամբ բավարարում էր այդ շրջանի պահանջներին, սակայն թվային տեխնոլոգիաները զարգանում են, եւ անհրաժեշտ էր ժամանակի պահանջներին համապատասխան կայքէջով ներկայանալ ընթերցողներին»,- ասաց նա «ՀՀ» օրաթերթի վերաթարմացված կայքի շնորհանդեսին։ Նշենք, որ «Հայաստանի Հանրապետություն» օրաթերթը եւ «Ռեսպուբլիկա Արմենիա» ռուսալեզու թերթը «Արմենպրես» մեդիահոլդինգի անդամներ են։
Կարեւորելով սոցիալական եւ այլ մեդիա հարթակներում ներկայությունը, Անանյանը հույս հայտնեց, որ թվային վերափոխման եւ նոր կայքէջի շնորհիվ օրաթերթը կդիվերսիֆիկացնի եւ կբազմապատկի իր ընթերցողների շրջանակը ոչ միայն Հայաստանում, այլեւ սփյուռքի հայախոս ընթերցողների շրջանում։ «Ոգեւորիչ է այն, որ թերթը պատրաստ է թվային վերափոխմանը։ Հնարավորինս մոտարկվել են թերթի թղթային եւ էլեկտրոնային տարբերակները, ունենալու ենք նաեւ վիդեոարտադրանք։ Կոտրվում է այն կարծրատիպը, որ տպագիր թերթը ամենապահպանողական լրատվամիջոցն է, այնինչ այն ամենադասական, ամենավստահելի տարբերակն է թե՛ թղթային, թե՛ էլեկտրոնային տարբերակներով եւ միտված է ապագային»,- մեկնաբանեց «Արմենպրեսի» տնօրենը։
«Հայաստանի Հանրապետություն» օրաթերթի գլխավոր խմբագիր Արթուր Ղարագյոզյանը բարձր գնահատեց ստեղծման առաջին իսկ օրվանից թերթի բոլոր աշխատակիցների ներդրումը սկսած «ՀՀ»-ի հիմնադիր խմբագիր Այդին Մորիկյանից, որոնց ջանքերի շնորհիվ օրաթերթն այսօր էլ չի կորցրել իր այժմեականությունը, առանձնանում է թեմատիկ բազմազանությամբ։ «Ունենալով պետական կարգավիճակ, մենք չենք անդրադառնում միայն պաշտոնական լուրերին. այսօր օրաթերթի խնդիրն այլեւս զուտ լրահոսը փոխանցելը չէ, այլ շեշտը դրվում է վերլուծությունների, մեկնաբանությունների եւ արժեքավոր տեղեկատվության վրա»,- ասաց Ղարագյոզյանը՝ հավելելով, որ եթե առանձնացվի եւ ներկայացվի յուրաքանչյուր թեմայի բովանդակությունը ըստ բաժինների, ապա դրանցից մի քանի հատոր արժեքավոր գիրք կարելի է տպագրել։
Օրաթերթի գլխավոր խմբագիրն ափսոսանք հայտնեց, որ ՀՀ միակ պետական հայալեզու պաշտոնաթերթի 30-ամյակը, որի հոբելյանը լրացել է 2020 թ. հոկտեմբերի 9-ին, հասկանալի պատճառներով հնարավոր չեղավ ըստ արժանվույն նշել։ Անդրադառնալով թերթի ընթերցող լսարանին, նա ընդգծեց, որ սահմանափակումներ չկան, որին էլ միտված է թեմատիկ բազմազանությունը։ Նպատակն այն է, որպեսզի պաշտոնաթերթի ասելիքն ուղղված լինի ամբողջ հասարակությանը եւ ներգրավի բոլոր խմբերին։ Ի դեպ, «ՀՀ»-ն բացել է դռները նաեւ սփյուռքի մամուլի հետ լայն համագործակցության համար։
Ինչ վերաբերում է թղթային եւ էլեկտրոնային կրիչներով հանդես գալուն, ապա դրանք ոչ թե բացառելու, այլ լրացնելու են մեկը մյուսին։ Կլինեն նյութեր, որոնք մինչեւ թերթում լույս ընծայվելը կտեղադրվեն կայքում, ինչպես նաեւ կայքում կտեղադրվեն անոտացիոն նյութեր, որոնք հնարավոր կլինի ընթերցել միայն տպագիր տարբերակում։
Թերթի 20-ամյակին նվիրված մեկ անգամ արդեն նշել ենք, որ երբ «անկախություն» եւ «ազատություն» ասվածն այլեւս զուտ բառեր չէին, այլ նյութականացման ուղին բռնած հայ ազգի դարավոր երազանքը, երբ Հայկական ԽՍՀ Գերագույն խորհրդի կողմից օգոստոսի 23-ին ընդունված Անկախության հռչակագրով հիմքեր էին ստեղծվում հայոց պետականության վերականգնման համար, պատմական նման ժամանակաշրջանում պետք էր նոր խոսք, նոր ձայն, որն առավել ճշգրիտ եւ ամբողջական կարտահայտեր ժամանակի շունչը, հենց այդ ձգտումով էլ ՀՀ Գերագույն խորհրդի սեպտեմբերի 6-ի որոշմամբ ստեղծվեց «Հայաստանի Հանրապետություն» օրաթերթը։ Եվ նորանկախ հանրապետության կայացմանը զուգահեռ ինքնահաստատման եւ կայացման ճանապարհ է առայսօր անցնում նաեւ թերթը: «Հայաստանի Հանրապետություն» օրաթերթը խորապես գիտակցում է, որ յուրաքանչյուր օր կապ է ստեղծում անցյալի եւ ապագայի միջեւ:
