«Արմենպրես» պետական լրատվական գործակալությունը եւ Հայաստանի պետական տնտեսագիտական համալսարանը սկսում են լայն համագործակցություն, որի մեկնարկը տրվեց երեկ գործակալության տնօրեն Արամ Անանյանի եւ ՀՊՏՀ ռեկտոր Դիանա Գալոյանի միջեւ փոխըմբռնման հուշագրի ստորագրմամբ։
«Արմենպրես» լրատվական գործակալության տնօրեն Արամ Անանյանն ուրախություն հայտնեց ՀՊՏՀ-ի հետ համագործակցության համար՝ նշելով, որ այն իրականություն է դառնում ՀՊՏՀ ռեկտորի թիմի ջանքերի շնորհիվ։ Արամ Անանյանն ընդգծեց, որ գործակալության համար եւս համագործակցության առաջին եւ պատեհ առիթն է պրոֆիլային բուհի հետ։ Նա ընդգծեց, որ տեղյակ է տնտեսագիտական մայր բուհում կատարվող բարեփոխումներին եւ իր հիացմունքն արտահայտեց «Ամբերդ» հետազոտական կենտրոնի գործունեությամբ։ «Իսկապես, մեծ աշխատանք է կատարում «Ամբերդը», ձեզ հաջողվել է ակումուլացնել թե՛ գիտելիքը, թե՛ հմտությունը եւ թե՛ փորձը,- ասաց գործակալության տնօրենը եւ հավելեց.- Լիահույս եմ, որ մեր համագործակցությունը շատ ավելի մեծ արդյունք է ունենալու, քան ակնկալում ենք»։
ՀՊՏՀ ռեկտոր Դիանա Գալոյանը նշեց, որ ՀՊՏՀ-ն գործընկերների լայն ցանց ունի, սակայն ԶԼՄ-ների հետ համագործակցության շարքում «Արմենպրես» պետական լրատվական գործակալության հետ գործընկերությունը առաջինն է, եւ ուրախալի է, որ այն սկսվում է նման հեղինակավոր լրատվամիջոցի հետ։ Բուհի ռեկտորն ընդգծեց, որ տնտեսագիտական մայր բուհը բարեփոխումների շրջանում է, եւ այս համատեքստում շատ է կարեւորում բուհի դրական կերպարի ստեղծումն ու լրատվամիջոցների հետ համագործակցությունը։
Նոր գործընկերությունը ՀՊՏՀ-ն սկսում է ակադեմիական հաստատությունների եւ զանգվածային լրատվամիջոցների համագործակցության կարեւորության գիտակցմամբ եւ բավական լայն է՝ համալսարանի եւ համալսարանի «Ամբերդ» հետազոտական կենտրոնի աշխատանքների հանրայնացում, հետազոտական կենտրոնի կողմից գործակալությանը փորձագիտական կարծիքի եւ մասնագիտական տեղեկության տրամադրում, ուսանողների փորձառության, համատեղ միջոցառումների կազմակերպում, կդիտարկվի նաեւ տնտեսագիտության եւ լրագրության ոլորտում համատեղ կրթական նախաձեռնությունների իրականացումը։
Հուշագրի ստորագրումից հետո «Արմենպրես» պետական լրատվական գործակալության տնօրենն այցելեց «Ամբերդ» հետազոտական կենտրոն, ծանոթացավ կենտրոնի գիտահետազոտական գործունեությանը։
