Հունիսի 22-ին նախկին Խորհրդային Միության ժողովուրդները հիշում են Հայրենական մեծ պատերազմի 80-ամյակը: Տարելիցին ընդառաջ Երեւանի «Լիմուշ» հրատարակչությունը լույս է ընծայել «Անվանի զինվորականը եւ տեսաբանը. Սարգիս Վարագի Սարգսյանի կյանքը եւ գիտական ժառանգությունը» («Знаменитый военный и теоретик: жизнь и научное наследие Саркиса Вараговича Саркисяна») մենագրությունը: Գրքի հեղինակն է պատմական գիտությունների դոկտոր, Երեւանի պետական համալսարանի համաշխարհային պատմության ամբիոնի պրոֆեսոր, Եվրասիական փորձագիտական ակումբի անդամ Հակոբ Հարությունյանը: Աշխատությունը պատմում է նախկին ԽՍՀՄ զինված ուժերի պաշտոնաթող գնդապետ Սարգիս Սարգսյանի (1899-1981 թթ.) անցած ուղու եւ գիտական-ստեղծագործական ժառանգության մասին:
Գնդապետ Ս. Սարգսյանը անցել է պրոֆեսիոնալ զինվորականի հերոսական ու փառահեղ ուղի: Արդեն 15 տարեկան հասակում նա ընդգրկվել է հայկական կամավորական ջոկատներում եւ մասնակցել Առաջին համաշխարհային պատերազմին, ապա կռվել է 1918 թ. Սարդարապատի հերոսամարտում:
Խորհրդային շրջանում նա զբաղեցրել է մի շարք պատասխանատու զինվորական պաշտոններ Հայկական ԽՍՀ-ում: Հայրենական մեծ պատերազմի տարիներին (1942-1945 թթ.) նա եղել է հայկական 89-րդ Թամանյան դիվիզիայի 400-րդ հրետանային գնդի հրամանատարը: Ուշագրավ է, որ գնդապետ Ս. Սարգսյանի հետ այս պատերազմին մասնակցել են նաեւ նրա ավագ որդին եւ դուստրը ամուսնու հետ, իսկ կրտսեր որդին այդ տարիներին աշխատել է Երեւանի ռազմական գործարաններից մեկում: Գործած սխրանքների համար Ս. Սարգսյանն ու նրա զավակներն արժանացել են պետական ու կառավարական բարձր պարգեւների:
Պրոֆեսոր Հ. Հարությունյանը փաստում է, որ Սարգիս Սարգսյանին կարելի է համարել հին հայկական ռազմարվեստի ուսումնասիրության հիմնադիրը հայ իրականության մեջ, որովհետեւ նրա գրչին է պատկանում «Հայ ռազմական արվեստի պատմությունից» (Երեւան, 1969 թ., «Հայաստան» հրատ., 219 էջ) արժեքավոր մենագրությունը, որը բաղկացած է 10 գլուխներից: Ժամանակագրորեն այն ընդգրկում է Հայկի եւ Բելի հանրահայտ ճակատամարտից մինչեւ արաբական առաջին՝ դեպի Հայաստան կազմակերպված արշավանքները (մ.թ. VII դ. սկիզբը):
Գնդապետ Ս. Սարգսյանի կյանքին եւ գիտական ժառանգությանը նվիրված մենագրությունը բաղկացած է 4 գլուխներից: Առաջաբանի հեղինակն է հայկական բանակի հիմնադիրներից մեկը՝ վաստակաշատ գեներալ-լեյտենանտ Մուրազ Սարգսյանը: Մասնագետների գնահատմամբ՝ այս գիրքը շատ օգտակար կլինի հայկական զինվորական ուսումնական հաստատությունների սաներին եւ ունկնդիրներին, ինչպես նաեւ բոլոր այն գիտնականներին եւ փորձագետներին, որոնք կուզենան խորանալ Հայրենական մեծ պատերազմի եւ հայկական ռազմարվեստի պատմության հիմնահարցերում: Մենագրությունը հասցեագրված է ոչ միայն այդ մասնագետներին, այլ նաեւ ընթերցողների լայն շրջանակին: Գիրքը անվճար կբաժանվի Հայաստանի Հանրապետության ռազմական ուսումնական հաստատությունների եւ ակադեմիական ու բուհական բոլոր գրադարաններին:
