Հայաստանի գեղարվեստի պետական ակադեմիայի եւ Իրանի Իսլամական Հանրապետության արվեստների ակադեմիայի միջեւ հուշագիր կնքվեց՝ բարձրագույն կրթության զարգացման եւ միջազգայնացման ուղղությամբ աշխատելու, ակադեմիական, մշակութային եւ գիտական համագործակցությունն ու փոխանակումը կրթության, հետազոտության բնագավառներում ընդլայնելու նպատակով:
Հուշագրի ստորագրման հանդիսավոր արարողությունը տեղի ունեցավ երեկ Գեղարվեստի պետական ակադեմիայում: Հայկական կողմից այն ստորագրեց ՀԳՊԱ ռեկտոր Արամ Իսաբեկյանը, իսկ իրանական կողմից՝ ՀՀ-ում ԻԻՀ մշակույթի կենտրոնի խորհրդական Սեյյեդ Հոսեյն Թաբաթաբային:
Ավելի ուշ ՀՀ-ում Իրանի Իսլամական Հանրապետության դեսպան Աբաս Բադախշան Զոհուրին կմեկնի Իրան, որտեղ ՀՀ դեսպանատանը դեսպանի ներկայությամբ փաստաթուղթը կստորագրի նաեւ Իրանի արվեստների ակադեմիայի ներկայացուցիչը:
«Մեր երկրների պատմական կապերը խորն ու բարեկամական են: Մենք գիտենք այս տարածաշրջանում ձեր դիրքորոշումը, ինչը կարեւոր է մեր երկրի համար: Պատերազմից հետո այս պայմաններում մեզ նման համաձայնագրի առաջարկ անելը շատ է ուրախացնում: Սա նոր բարեկամության սկիզբ է նաեւ արվեստի, մշակույթի բնագավառում»,- ասաց ռեկտորն ու հավելեց, որ Իսպահանում լինելու առիթ է ունեցել. հիացած է մշակույթով, գեղեցկությամբ, մաքրությամբ:
ՀՀ-ում Իրանի Իսլամական Հանրապետության դեսպան Աբաս Բադախշան Զոհուրին էլ շեշտեց, որ այլ քաղաքների բնակիչները եւս շատ լավ վերաբերմունք ունեն հայերի հանդեպ: Դեսպանն ասաց՝ Իրանի եւ Հայաստանի միջեւ պատմամշակութային կապերը խորն են, ընդլայնված եւ վաղեմի: «Իրանը գիտության, տնտեսության եւ շատ այլ ոլորտներում լուրջ ձեռքբերումներ ունի, եւ նկատելի են մշակույթի բնագավառի հաջողությունները: Իրանում երբեք չեն մոռանում այն մշակութային արժեքները, որոնք ստեղծել են հայերն ու փոխանցել Իրանի ժողովրդին: Խորհրդային Միության տարիներին մշակութային փոխհարաբերություններում բացեր են եղել, որոնք լրացնելու համար պետք է մեծ ջանքեր գործադրել, եւ նմանատիպ հանդիպումները, միջոցառումները կնպաստեն հարաբերությունների սերտացմանը»,- նշեց դեսպանը:
Աբաս Բադախշան Զոհուրին հավելեց, որ Արցախյան 44-օրյա պատերազմն ու տարածաշրջանում տեղի ունեցող իրադարձությունները ցույց տվեցին, որ Հայաստանն ու Իրանը մշակույթի հիման վրա պետք է առավել զարգացնեն տարբեր ոլորտներում կապերն ու համագործակցությունը: «Մենք վերջերս նկատում ենք նաեւ պատմական որոշ խեղաթյուրումներ, ինչը պահանջում է մեր զգոնությունն ու ուշադրությունը տարբեր հարցերի նկատմամբ: Խոսքը մեզանից ոչ հեռու երկրների մասին է: Մենք պետք է հստակ փորձենք պահպանել այն, ինչ ունենք ու թույլ չտանք, որ մեր պատմամշակութային արժեքներն ու կոթողները խեղաթյուրվեն»,- ընդգծեց դեսպանը:
Միջոցառմանը ներկա էր ՀՀ ԿԳՄՍ նախարարի տեղակալ Կարեն Թռչունյանը, որը հույս հայտնեց, որ համագործակցություններ կլինեն ոչ միայն մշակույթի, այլեւ կրթության եւ գիտության բնագավառում, եւ դասախոսների, ուսանողների փոխանակման արդյունքում կապերն առավել կամրապնդվեն ու կմոտեցնեն երկու ժողովուրդներին:
ՀՀ-ում ԻԻՀ մշակույթի կենտրոնի խորհրդական Սեյյեդ Հոսեյն Թաբաթաբային էլ ասաց, որ երկուստեք ջանքեր են գործադրվել, եւ նման փաստաթղթի ստորագրումը իրականություն է դարձել, ուստի քայլեր է պետք ձեռնարկել ամեն ինչ գործնական դաշտ տեղափոխելու համար: Նա տեղեկացրեց, որ, համագործակցելով Հայաստանի նկարիչների միության հետ, արդեն իսկ իրագործել են «Իրանն իմ աչքերով» մրցույթը, որին մասնակցել են հայ արվեստագետներ: Առաջիկայում կընտրվեն հաղթողներն ու Հայաստանում ցուցահանդես կբացվի: Լիահույս են, որ մրցույթն ամենամյա կդառնա:
Միջոցառմանը ներկա էին նաեւ ՀՀ նկարիչների միության նախագահ Սուրեն Սաֆարյանը, ՀՀ ժողովրդական նկարիչ Փարավոն Միրզոյանը եւ այլք:
