Այս տարվա հուլիսի 11-ին Վարդավառը նախատեսվում է նշել Քաշաթաղի Աղավնո գյուղում: ՙՙԱզատ Արցախ՚՚-ի թղթակցի հետ զրույցում հայտնեց ԱՀ ԿԳՄՍ նախարարության ՙՙՊատմական միջավայրի պահպանության պետական ծառայություն՚՚ ՊՈԱԿ-ի տնօրեն Արմինե Հայրապետյանը:
ՙՙՈւնենք միջոցառումներ, որոնք ավանդաբար նշում ենք այս կամ այն արգելոցում: Մեր այցելուներն ուրախությամբ են մասնակցում: Վարդավառը միշտ նշում էինք Տիգրանակերտում: Այս տարի հանգամանքներն այլ են. տարածքի ու միջավայրի ամենահարմար տարբերակն Աղավնոն է՚՚,- ասաց Ա. Հայրապետյանը՝ հավելելով, որ Վարդավառն Աղանվոյում կազմակերպելու նպատակներից է նախևառաջ տեղի բնակիչների համար օրը տոն դարձնելը: Բացի այդ, Աղավնո գյուղի տարածքով անցնում է համանուն գետը:
Վարդավառի առթիվ նախատեսվում են՝ ազգային խաղեր, ազգագրական պարի ուսուցման բաց դաս և թեյախմություն:
ՙՙԱղավնոյի բնակիչներին բարձր տրամադրություն պարգևելուց բացի, առաջարկել ենք նաև տեղական արտադրանքի համտես-վաճառք՝ այս կերպ ևս օգտակար լինելու համար՚՚,- նշեց Ա. Հայրապետյանը: Նրա հաղորդմամբ՝ առայժմ Վարդավառն Աղավնոյում նշելու համար դիմել է 40 հոգի: Մասնակցելու համար կարող են դիմել բոլոր ցանկացողները:
Ուղևորափոխադրումը կիրականացվի անվճար՝ Ստեփանակերտի Վերածննդի հրապարակից:
