Ճարտարապետության եւ շինարարության Հայաստանի ազգային համալսարան. բարձրագույն ուսումնական այս հաստատությունը գործում է Երեւանում։ Ստեղծվել է 1989 թ.՝ Երեւանի պոլիտեխնիկական ինստիտուտի ճարտարապետաշինարարական, ճարտարագիտաշինական եւ տրանսպորտի ֆակուլտետների հիմքի վրա։ Մինչեւ 2000 թ.՝ Երեւանի ճարտարապետաշինական ինստիտուտ, 2000-2014 թթ.՝ Երեւանի ճարտարապետության եւ շինարարության պետական համալսարան։ 2014 թ. հունվարի 23-ին ՀՀ կառավարության որոշմամբ «Երեւանի ճարտարապետության եւ շինարարության պետական համալսարան» պետական ոչ առեւտրային կազմակերպությունը վերակազմավորվել է «Ճարտարապետության եւ շինարարության Հայաստանի ազգային համալսարանի»։ Ունի ճարտարապետության, արդյունաբերական եւ քաղաքացիական շինարարության, շինարարության տեխնոլոգիայի, ջրաշինարարության եւ քաղաքային տնտեսության, տրանսպորտային շինարարության ֆակուլտետներ, ասպիրանտուրա, ատենախոսության պաշտպանության 2 մասնագիտական խորհուրդներ, հեռակա ուսուցման բաժին, գրադարան, հրատարակչություն։ Հրատարակում է «Ինժեներ» (2006-ից) ամսաթերթը։ Ճարտարապետության ֆակուլտետին կից գործում է ճարտարապետական նախագծման կաբինետ՝ մասնագիտական գրադարանով։
Ճարտարապետության եւ շինարարության Հայաստանի ազգային համալսարանում հուլիսի 8-ին անցկացվեցին ներբուհական քննություններ: Ճարտարապետության ֆակուլտետի դիմորդները վերջին քննությունը հանձնեցին «Գծանկար» առարկայից։ Համալսարանի «Դիզայն» մասնագիտությամբ ընդունվելու համար քննություն է հանձնել 234 դիմորդ, իսկ «Ճարտարապետություն» մասնագիտության համար՝ 173: Առավոտյան ժամը 8-ին, դեռ ավելի վաղ համալսարանի բակը մարդաշատ էր։ Դիմորդներից շատերի հետ էին նաեւ ծնողները, այլ ուղեկիցներ։ Ընդունող հանձնաժողովի պատասխանատու քարտուղար Հայկ Սարգսյանը հուլիսի սկզբից՝ յուրաքանչյուր քննության օր ողջունում է դիմորդներին, նրանց ուղեկցողներին եւ ներկայացնում օրվա քննության հետ կապված կանոնակարգը։ Ճարտարապետության ֆակուլտետի ընդունելության համար «Գծանկարի» քննությանը մասնակցեցին անցած «Գծագրություն» եւ «Կոմպոզիցիա» առարկաներից դրական գնահատական ստացած դիմորդները։ Մինչ դիմորդների անունների ընթերցումը եւ քննության հրավիրելը, Հ. Սարգսյանը տեղեկացրեց, որ «Գծանկարի» քննության համար ներկայացված 3 կիսանդրիից վիճակահանությամբ պետք է ընտրվի մեկը, որն էլ նկարելու են դիմորդները։ Բոլորի ներկայությամբ, ծնողների եւ դիմորդների մասնակցությամբ կայացավ վիճակահանությունը, որի արդյունքում քննության թեման էր «Սոկրատես»-ը։ Դիմորդներն ուրախ էին, բարձր տրամադրությամբ էլ ներկայանում էին եւ անցնում քննասենյակ՝ մինչ այդ ենթարկվելով ջերմաչափման։ Հայտարարվեց՝ քննությունը տեւելու է 8 ժամ, անցած առարկաներից 2 անգամ ավելի։ Քննության արդյունքները հրապարակվում են հաջորդ օրը, ժամը 16.00-ից հետո։
Ընթացքում զրուցեցինք ընդունող հանձնաժողովի պատասխանատու քարտուղար Հայկ Սարգսյանի հետ։ Տեղեկացրեց, որ իրենց համալսարանում միայն «Ճարտարապետություն» եւ «Դիզայն» մասնագիտությունների քննություններն են կազմակերպվում ներբուհական կարգով, իսկ մնացածում ընդունելությունը կատարվում է ԳԹԿ-ի կազմակերպած միասնական քննությունների արդյունքում։ Նշեց նաեւ՝ «Ճարտարապետություն» մասնագիտության համար նախատեսվածից ավելի շատ դիմորդ է հայտ ներկայացրել, իսկ «Դիզայնի» դեպքում մրցույթ չի լինելու. դրական գնահատական ստացողները կընդունվեն համալսարան։ Ի տարբերություն «Ճարտարապետության»՝ «Դիզայն» մասնագիտություն ընտրողները հանձնել են 2 քննություն՝ գծագրություն եւ գծանկար, իսկ ապագա ճարտարապետները հուլիսի 3-ին հանձնել են քննություն գծագրությունից, հուլիսի 5-ին՝ կոմպոզիցիայից եւ վերջինը՝ գծանկարից։ Քննությունների մեկնարկն սկսել են «Դիզայն» մասնագիտության դիմորդները հուլիսի 2-ին՝ գծագրություն առարկայից։ Այս տարի նշված 2 մասնագիտություններով ընդունված 12 դիմորդ համալսարանում կուսանեն անվճար, մնացածը՝ վճարովի։ Նշենք, որ ուսման տարեկան վճարը «Դիզայն» մասնագիտության ուսանողների համար 504 000 հազար դրամ է, իսկ ճարտարապետների համար՝ 660 հազար։
Ինչպես գիտենք, մեր հանրակրթական դպրոցներում գծագրություն չի դասավանդվում, այդ առթիվ Հ․ Սարգսյանը տեղեկացրեց, որ Երեւանի Մանուկ Աբեղյանի անվան եւ որոշ այլ հանրակրթական դպրոցներում դասավանդվում է այդ առարկան, իսկ մնացածներում տեխնոլոգիայի ընթացքում է ուսումնասիրվում գծագրությունը։ Ընդունող հանձնաժողովի պատասխանատու քարտուղարը տեղեկացրեց նաեւ՝ բուհի կողմից արվել է հնարավորը, որ դիմորդները կարողանան հանգիստ հանձնել քննությունները։ Հավելեց նաեւ, որ քննությունների ավարտից հետո տեղի կունենա ընդունելության մրցույթի հիմնական փուլի ամփոփումը, որի արդյունքները կհրապարակվեն հուլիսի 18-ին: ՃՇՀԱՀ-ի կայքէջից տեղեկանում ենք. «Ընդունելության քննությունների ավարտից եւ ընդունելության հիմնական փուլի արդյունքների ամփոփումից հետո, ըստ թափուր մնացած տեղերի, կկատարվի ընդունելության լրացուցիչ կամ երկրորդ փուլի հայտագրումը, որին կարող են մասնակցել ընդունելության քննություններից դրական միավորներ ստացած, սակայն հիմնական փուլի մրցույթից դուրս մնացած դիմորդները: Լրացուցիչ փուլի հայտագրումը կատարվելու է հուլիսի 19-26-ը՝ դիմում-հայտը «dimord.am» կայքում առցանց լրացնելու տարբերակով»:
