Արդեն 20 տարի է, ինչ Այգեստանի գեղատեսիլ բնության գրկում գործում է «Ասպետ» ռազմամարզական ճամբարը, որտեղ երեք հերթով ընդգրկվում, զինվորական կարգուկանոնին եւ զենքի օգտագործման հմտություններին ծանոթանում ու ստացած գիտելիքներն ամրապնդում են հանրապետության շրջանների կրթօջախների ավագ դասարանների աշակերտները:
Չնայած թշնամու սանձազերծած 44-օրյա պատերազմի պատճառով բազում խնդիրներ են ծագել երկրում, եւ ոչ քիչ ջանքեր են պահանջվում դրանք հաղթահարելու համար, ավանդույթը չի խախտվել, եւ պատանիների առաջ վերստին իր դռներն է բացել ճամբարը: Իսկ մտահղացումը կյանքի է կոչվել Արցախի կրթության, գիտության, մշակույթի եւ սպորտի նախարարության, պաշտպանության բանակի հրամանատարության ջանքերով:
«Ամենաուժեղ զենքը զինվորի ոգին է». այս կարգախոսով է մեկնարկել 2021-ի ռազմամարզականը, որի առաջին հյուրերն են Ստեփանակերտի, ինչպես նաեւ Շուշիից տեղահանված ավագ դպրոցների աշակերտները: Երկրորդ փուլին կներգրավվեն Մարտունու եւ Մարտակերտի, իսկ երրորդ փուլին՝ Ասկերանի ու Հադրութից տեղահանված ավագ դպրոցների սաները: Ինչպես տեղեկացրեց ճամբարի պետ, մայոր Արսեն Հարությունյանը, ում 10-րդ տարին է, ինչ վստահվում է ապագա զինվորների դաստիարակության եւ մարտական պատրաստության բարդ ու պատվաբեր գործը, տղաներին հնարավորություն կընձեռվի ծանոթանալ ժամանակակից սպառազինություններին, կկրակեն ինքնաձիգներից, կանցնեն շարային պատրաստություն, կզբաղվեն տարբեր մարզաձեւերով, կմասնակցեն մրցույթների, էքսկուրսիաների, հանդիպումներ կունենան պաշտպանության բանակի, հասարակական կազմակերպությունների ներկայացուցիչների հետ: Ասել է թե՝ բավական հագեցած են օրվա կարգացուցակն ու միջոցառումների ծրագիրը, որոնք համապատասխանում են զինծառայողների համար սահմանված նորմերին:
Եթե ԿԳՄՍ նախարար Լուսինե Ղարախանյանի կարծիքով՝ «ռազմամարզական ճամբարները հայրենիքի ապագա պաշտպանին ոգեւորելու, կամք եւ տոկունություն ներարկելու, անհրաժեշտ գիտելիքներ հաղորդելու կրթարաններ են, որոնց միջոցով երեխաները միմյանց հետ շփվում, ընկերասիրության եւ հայրենասիրության դասեր են սերտում», ապա ՊԲ գնդապետ, արցախյան երեք պատերազմների մասնակից Մխիթար Ավշարյանի համոզմամբ, ճամբարում տղաներն իրար ընկերանում են եւ այդ առաքելությունն արժանապատվորեն շարունակում բանակում, մարտի դաշտում, որտեղ, բնականաբար, ամենածանր, ճակատագրական պահերին նրանք միմյանց երբեք չեն լքում…
Ըստ ճամբարի ղեկավար Արսեն Հարությունյանի՝ 44-օրյա պատերազմը, որի ժամանակ անդառնալի կորուստներ ունեցանք, պարտավորեցնում է կոփված եւ ֆիզիկապես ուժեղ լինել, տիրապետել զինվորական գործին, պատրաստ լինել ցանկացած բարդ իրավիճակում դիմագրավելու թշնամուն եւ անառիկ պահելու հայրենիքի սահմանները:
