Հայաստանի պետական տնտեսագիտական համալսարանը (ՀՊՏՀ) եւ Շուշիի տեխնոլոգիական համալսարանը (ՇՏՀ) կրթադաստիարակչական, գիտահետազոտական եւ ուսումնամեթոդական ոլորտներում կիրականացնեն փոխշահավետ համագործակցություն, որի շուրջ ՀՊՏՀ ռեկտոր Դիանա Գալոյանը եւ ՇՏՀ ռեկտոր Հովհաննես Թոքմաջյանը ստորագրել են համագործակցության համաձայնագիր։ «Արմենպրես»-ին այս մասին հայտնեցին ՀՊՏՀ մարքեթինգի եւ հասարակայնության հետ կապերի բաժնից:
Հանդիպմանը ներկա են գտնվել ՀՊՏՀ արտաքին կապերի դեպարտամենտի տնօրեն Լուսինե Դանիելյանը եւ ԵՊՀ նորարարության տնտեսագիտության ամբիոնի վարիչ Աշոտ Մարկոսյանը։
Դիանա Գալոյանը եւ Հովհաննես Թոքմաջյանը քննարկել են համաձայնագրով նախատեսվող համագործակցային ուղղությունները, մասնավորապես անդրադարձել են վերապատրաստումներին, համատեղ հետազոտությունների իրականացմանը եւ գրադարանային ֆոնդերի օգտագործման խնդիրներին։
ՇՏՀ ռեկտոր Հովհաննես Թոքմաջյանը կարեւորել է հետպատերազմյան նոր իրողությունների պայմաններում համալսարանի կենսագործունեության շարունակականության ապահովումը եւ ուսումնական, գիտահետազոտական ուղղությունների զարգացումը, ինչպես նաեւ համաձայնագրով նախատեսված մյուս ուղղությունները՝ համատեղ ծրագրերի մշակում, դասախոսների եւ ուսանողների ակադեմիական փոխանակում, տեղեկատվական եւ մարզամշակութային միջոցառումների իրականացում։ ՇՏՀ ռեկտորը համոզմունք է հայտնել, որ ՀՊՏՀ-ի հետ համագործակցությունը կլինի բարեհաջող եւ արդյունավետ։
ՀՊՏՀ ռեկտորն ընդգծել է ՇՏՀ-ի հետ համագործակցության իր պատրաստակամությունը եւ որպես մեկնարկ՝ ՇՏՀ 5 ուսանողների հրավիրեց մասնակցելու Դիլիջանի «Տնտեսագետ» մարզաառողջարանում հուլիսի 19-22-ը կազմակերպվող ASUE Educational Camp ամառային կրթական ճամբարին։
