Հուլիսի 11-ին Երեւանի Կ. Ստանիսլավսկու անվան դրամատիկական թատրոնում տեղի ունեցավ «Փիրումյան» պարային ստուդիայի 2021 թ. հաշվետու համերգը։
Ստ. Ջրբաշյանի անվան երաժշտական դպրոցի (տնօրեն՝ Նաիրա Ներսիսյան) «Փիրումյան» ստուդիան հիմնադրվել է 2010 թ.` Ռուզաննա Փիրումյանի կողմից, ով նաեւ ստուդիայի գեղարվեստական ղեկավարն է, Վանուշ Խանամիրյանի անվան պարարվեստի գործիչների միության անդամ։ Ռ. Փիրումյանն ավարտել է Երեւանի պարարվեստի պետական քոլեջի բալետի բաժինը, որտեղ եւ դասավանդել է ավարտելուց հետո: Այժմ նա դասավանդում է Ստ. Ջրբաշյանի անվան երաժշտական եւ Ստ. Զորյանի անվան թիվ 56 դպրոցներում: Ստուդիայում ներգրավել է երիտասարդ արհեստավարժ պարուսույցների՝ օպերայի եւ բալետի ազգային ակադեմիական թատրոնի պրիմա-պարուհի Սյուզաննա Փիրումյանին, Ռուբեն Փիրումյանին եւ Լիլիթ Պետրոսյանին: Նրանք սովորել եւ ավարտել են պարարվեստի պետական քոլեջի բալետի բաժինը: Եվ արհեստավարժ այս պարուսույցների սաները՝ 66 երեխա (3-15 տարեկան), հանդես եկան պարային կատարումներով։
Համերգի հաղորդավար, դերասան Սարգիս Նաջարյանը ողջունեց ներկաներին, անդրադարձավ Արցախյան վերջին պատերազմին, եւ նրա առաջարկով եղավ լռության րոպե։ Դահլիճում հիմնականում ստուդիայի սաների ծնողներն էին, հարազատ-բարեկամներ, հյուրեր։ Անդրադառնալով հայ պարարվեստի պատմությանը՝ Ս. Նաջարյանը կարեւորեց նման ստուդիաների դերը, որոնց շնորհիվ պահպանվում է հայ մշակույթի այս տեսակը։ Կարեւորեց նաեւ այն, որ նույն պարերի միջոցով հնարավոր է ճանաչել հայկական տարազը, առանց որի պարը չի դիտվելու։ Ներկայացնելով «Փիրումյան» ստուդիան՝ Ս. Նաջարյանն ասաց, որ մշակութային այս ստուդիան իր առաջ խնդիր է դրել գործուն մասնակցությունն ու ներդրումը բերել պարարվեստի պահպանման ու զարգացման դժվարին, բայց շնորհակալ գործին: «Փիրումյան» ստուդիայի հիմնական ուղղվածությունը դասական է՝ տարբեր ժողովուրդների հոգեկերտվածքներին բնորոշ պարերով։
Համերգին մասնակից երեխաների կեսից ավելին Արարատի մարզի Մասիս քաղաքի «Էդեմ» մարզաառողջարարական համալիրի (տնօրեն՝ Ժաննա Ենգիբարյան) տարածքում գործող «Փիրումյան» ստուդիայի մասնաճյուղից էին, մնացածը՝ Երեւանից։ Երեխաները հիմնականում հանդես եկան 3՝ կրտսեր, միջին եւ ավագ խմբերով։ Որոշ պարեր 2 մասնաճյուղերի սաները կատարեցին միասնական, որոշները՝ առանձին։ Երեխաներն իրենց կատարումներով մեծ հաճույք էին պարգեւում հանդիսատեսին, եւ ծափողջույնները նրանց ու պարուսույցներին էին նվիրված։ Գեղեցիկ տարազ ու գեղեցիկ կատարում, մանկական քաղցր ժպիտ ու նազանք, մոտ 2 ժամ նման տեսարան էր թատրոնի բեմում, իսկ դահլիճում՝ գոհ հանդիսատես։ Ներկաներն ականատես եղան երեխաների պարերի՝ հայկական ու աշխարհի ժողովուրդների, ժամանակակից ու դասական, եւ այլն։ Երբեմն բեմն այնքան էր գեղեցկանում փոքրիկների ներկայությամբ, որ տարեց մի պապիկ ասաց. «Աշխարհի ամենաչքնաղ տեսարանն է»։ Սա է ստուդիայի առաքելությունը՝ համատեղ ջանքերով պահպանել դասականն ու ավանդականը, մշտապես թարմացնել ու նորացնել պարային բեմադրությունները՝ հաղորդելով արդիական շունչ ու ոգի:
Արդեն 11 տարվա պատմություն ունեցող ստուդիան հարյուրավոր երեխաների է ճանապարհել, շատերն ընտրել են պարարվեստի ճանապարհը։ Ստուդիայի սաները բազմիցս մասնակցել են փառատոների, համերգների եւ բարձր պահել իրենց գեղարվեստական ղեկավարի, պարուսույցների անունը եւ արժանացրել պատվոգրերի, դիպլոմների, շնորհակալագրերի, մեդալների, հուշանվերների, այլ պարգեւների։ Հիմնադրվելուց ընդամենը 2 տարի անց՝ 2012 թ., Պարարվեստի միջազգային օրվա առիթով, պարարվեստին մատուցած ծառայությունների համար Ռուզաննա Փիրումյանն արժանացավ Վանուշ Խանամիրյանի անվան պարարվեստի գործիչների միության պատվոգրին, եւ այսպես շարունակ: Երեխաների գեղագիտական դաստիարակությանը պրոֆեսիոնալ մոտեցման, հմուտ եւ բարեխիղճ աշխատանքի համար Հայաստանի «DocanDo» ֆեդերացիայի «Կենտրոն» մասնաճյուղի կողմից ստացած պատվոգիրը կարեւորվում է։ 2013 թ. ստուդիան պարգեւատրվել է մեդալով՝ Վրաստանում կայացած «Օրանժովի Կոբուլետի» երգի, պարի միջազգային փառատոնում 2-րդ պատվավոր տեղը գրավելու համար։
Համերգից հետո Վանուշ Խանամիրյանի անվան պարարվեստի գործիչների միության անդամ Նաիրա Զատիկյանը շնորհակալություն հայտնեց «Փիրումյան» ստուդիայի գեղարվեստական ղեկավարին, պարուսույցներին՝ նման պարեր բեմադրելու համար եւ իրենց միության կողմից հուշանվեր հանձնեց Ռ. Փիրումյանին։ Հույս հայտնեց, որ այսպես կշարունակվի ստուդիայի ճանապարհը, եւ շատ երեխաներ կճանաչեն պարարվեստի նրբությունները։ Ռ. Փիրումյանը ողջունեց ներկաներին, հայտնեց շնորհակալություն, որ միասին են…
