Արդեն 10 տարի Լոռիում նշվում է հայոց նորագույն ազատագրական պայքարի նահատակների հիշատակի օրը: Հայ գաղտնի բանակի (ԱՍԱԼԱ) գործողություններն աշխարհին հիշեցրին, որ Հայ դատը փակված չէ: Այդ գործողությունները վերստին միջազգային օրակարգ բերեց Արմենոցիդը ճանաչելու եւ ցեղասպան երկրից պատասխան պահանջելու խնդիրը:
Հայ առաքելական եկեղեցու Վանաձորի Ս. Մարիամ Աստվածածին եկեղեցու Նահատակաց պուրակում ԱՍԱԼԱ-ի նահատակների հուշակոթողի մոտ ոգեկոչվեց եւ հարգանքի տուրք մատուցվեց զինյալ պայքարում մարտիրոսված հերոսների հիշատակին: Ներկա էին ԱՍԱԼԱ-ի համակիրներ Հայաստանից եւ արտերկրից, Լոռու մարզպետարանի աշխատակիցներ, գրողներ, մտավորականներ, ԵԿՄ Լոռու մարզային կառույցի անդամներ: Օրհնանքի աղոթքով հանդես եկավ Գուգարաց թեմի առաջնորդ գերաշնորհ տեր Հովնան եպիսկոպոս Հակոբյանը, ով կարեւորեց հայ ազգի ապագա երթում Գաղտնի բանակի պայքարն ու նահատակների հիշատակը վառ պահելը: Բանախոսեցին նաեւ Վանաձորի փոխքաղաքապետ, պատմաբան Արման Բերնեցյանը, ՀԳՄ Լոռու մարզային բաժանմունքի նախագահ, բանաստեղծ Մանվել Միկոյանը, ԵԿՄ մարզային վարչության նախագահ, գնդապետ Կամո Հովհաննիսյանը, պատմաբան Ռուբեն Պարսամյանը, Չարենցի անվան գրականության եւ արվեստի թանգարանի տնօրեն, գրականագետ, գրող Կարո Վարդանյանը:
«Երախտագիտությամբ պետք է հիշենք վանաձորցիներ Պողոս Հակոբյանին, Արա Հարությունյանին, Ռազմիկ Մադարյանին, Վահե Միկիչյանին եւ «Ինտերկապ» ԲԿ-ին, որոնց նախաձեռնությամբ մեկ տասնամյակ առաջ կանգնեցվեց այս հուշաքարը: Վերջին տարիներին Վանաձորում հայրենասիրական միջոցառումների զգալի մասը կազմակերպում են «Ինտերկապը» եւ ԵԿՄ Լոռու մարզային կառույցը, որոնց նույնպես պետք է արժանին մատուցել»,- գնահատեց Մ. Միկոյանը:
Ազգային սրբազան գործի համար ընկած մարտիկների անուններն ու գործը խնկարկելուն նվիրված միջոցառման հաճելի անակնկալը Կարո Վարդանյանի «Պայթյուններ Թուրքիայում… եւ ոչ միայն» գրքի՝ անգլերենով հրատարակության ազդօրինակի ներկայացումն էր Նահատակաց պուրակում: Վերջում հնչեց Սամվել Խալաթյանի՝ ԱՍԱԼԱ-ին նվիրված բանաստեղծությունը: Մասնակիցները ծաղկեպսակ դրեցին եւ ծաղիկներ խոնարհեցին հուշարձանին:
Գագիկ ԱՆՏՈՆՅԱՆ
Լոռի
