Պատերազմից դուրս եկած Արցախը ոչ միայն հաղթահարում է դժվարությունները, իր զավակների օգնությամբ բուժում վերքերը, այլեւ քայլեր է ձեռնարկում երկրի տնտեսական վիճակը բարելավելու, աշխատաշուկայում պատշաճ դիրք գրավելու, մասնավորապես՝ շինանյութի արտադրությամբ սեփական կարիքները հոգալու համար: Իսկ նման վճիռներ կայացնելու հանգամանքը, բնականաբար, ավերված բնակավայրերը ոտքի կանգնեցնելու, առաջին հերթին՝ սեփական օջախներից տեղահանված ընտանիքների բնակարանային պայմանները բարելավելու խնդիրն է, որն այսօր հրամայաբար ծառացած է իշխանությունների առաջ:
Գաղտնիք չէ, որ շինանյութի ներկրումն Արցախ ինչպես բեռնափոխադրումների, այնպես էլ գների առումով բավական թանկ է նստում: Ահա թե ինչու տնտեսավարողներն առավել ձեռնտու տարբերակ են փորձում գտնել: Եվ ուշագրավ է, որ այդ ուղղությամբ նրանց փնտրտուքներն ապարդյուն չեն անցնում: Ընդամենը մեկ շաբաթ առաջ Խաչենի տարածքում մեկնարկեցին գունավոր մետաղների արտադրման գործարանի մոնտաժման աշխատանքները: Իսկ օրերս Իվանյան համայնքում շահագործված ցեմենտի նորակառույց գործարանը տվեց առաջին արտադրանքը:
«Սավա» ընկերության հիմնադիր տնօրեն Վահե Հակոբյանի հավաստմամբ՝ արդեն 50 տոննա ցեմենտ է տեղափոխվել շինհարթակներ, որը որակի տեսանկյունից չի զիջում տարածաշրջանում արտադրվողներից: Ընդ որում՝ այն ավելի ուժեղ է, քան դրսից ներկրվող ցեմենտը: Անդրադառնալով իրացման հետ կապված խնդիրներին՝ նա նշեց, որ թողարկվող ապրանքը գլխավորապես իրացվելու է հանրապետությունում՝ հաշվի առնելով շինանյութի մեծ պահանջարկը, իսկ մնացած արտադրանքը կարտահանվի: Տնօրենի խոսքերով՝ այդ հարցում եւս արգելքներ չեն լինի, քանի որ նախապես պայմանավորվածություն է ձեռք բերվել վստահելի գնորդների հետ: «Ինչ խոսք, իրացման հիմնական շուկան կդառնա Արցախը: Բայց թող այն տպավորությունը չստեղծվի, թե ցեմենտ բացառապես արտադրում ենք մեր կարիքների համար,- ասաց նա:- Մենք բավականաչափ հայտեր ունենք եւ դրսից, ինչը թույլ կտա աշխատել բարձր արտադրողականությամբ ու եկամուտներ ստանալ՝ գործարանում աստիճանաբար ապահովելով նոր տեխնոլոգիաների կիրառումը»: Վահե Հակոբյանի տեղեկացմամբ՝ տարվա կտրվածքով առայժմ 65-70 տոննա ցեմենտ կարտադրվի, իսկ հետագայում, թողարկման ծավալներն ավելացնելով, այն կհասցվի 100 հազար տոննայի:
Հատկանշական է, որ ձեռնարկության գործունեությունը միայն ցեմենտի արտադրությամբ չի սահմանափակվի: Ինչպես հավելեց ընկերության հիմնադիր տնօրենը, շուկա են հանվել նաեւ այնպիսի արտադրանքներ, ինչպիսիք են բետոնե տարբեր կոնստրուկցիաները, աղյուսը, գազաբետոնե բլոկները եւ այլն, որոնց պահանջարկը մեծ է բնակարանաշինության մեջ:
