2020 թ. աշնանացանի եռուն շրջանում Ադրբեջանի կողմից սանձազերծված 44-օրյա պատերազմի պատճառով ընթացող աշխատանքներն ընդհատվեցին, եւ նախատեսված ծրագրերը մնացին անկատար, իսկ այս տարի, բնակլիմայական ոչ նպաստավոր եղանակներով պայմանավորված, հանրապետությունում աշնանացանը մեկնարկեց փոքր-ինչ ուշացումով: Չնայած այս իրողություններին, գյուղոլորտի պատասխանատուները վստահեցնում են, որ ամեն ինչ դեռ կորած չէ, եւ հնարավոր բոլոր քայլերը ձեռնարկվելու են դժվարությունները հաղթահարելու, հողօգտագործողներին աջակցելու եւ ցանքը պատշաճ մակարդակով իրականացնելու համար:
Գյուղատնտեսությանը պատճառված վնասի չափերը հսկայական են: Բավական է նշել, որ հողատարածքների շուրջ 70 տոկոսը հայտնվել է թշնամու վերահսկողության տակ, որի կեսից ավելին զբաղեցնում էին հացահատիկային մշակաբույսերը, իսկ մնացածը՝ բանջարաբոստանային մշակաբույսերը, խաղողի եւ պտղատու այգիները: Կառավարությունն ստիպված էր նոր հայեցակարգ մշակել եւ առանձնակի ուշադրություն դարձնել հողատարածքների առավել արդյունավետ օգտագործմանը՝ կարեւորելով ինչպես հացահատիկայինների ընդլայնման, այնպես էլ նոր այգիների հիմնադրման անհրաժեշտությունը: Ու միանգամայն արդարացված է այն հիմնավորումը, որ սահմանամերձ համայնքների համար պետությունը մի շարք արտոնություններ է սահմանել առանձին ճյուղերի գծով՝ ստանձնելով փոխհատուցման երաշխավորի պատասխանատվությունը:
Գյուղի եւ գյուղատնտեսության աջակցման հիմնադրամի տնօրեն Հրանտ Սաֆարյանի հավաստմամբ՝ պետական աջակցությունից կօգտվեն բոլոր հողագործները, մասնավորապես՝ հացագործները: Նրա խոսքերով՝ շահառուներին հացահատիկի սերմացուն կտրամադրվի զեղչված գներով: Բարձրորակ ցորենի սերմը, որը 260 դրամով ձեռք է բերվել Ռուսաստանի Դաշնությունից, կվաճառվի 180 դրամով: Կփոխհատուցվի նաեւ դիզվառելիքի դիմաց: Ինչ վերաբերում է ազոտական եւ մյուս պարարտանյութերին, ապա հիմնադրամի միջոցով կսուբսիդավորվեն գարնանը: Էկոնոմիկայի եւ գյուղատնտեսության նախարարության պաշտոնական տվյալների համաձայն՝ հանրապետությունում շուրջ երկու հազար հեկտար աշնանացան է կատարվել: Բնականաբար, ցանքի աշխատանքները կազմակերպված եւ արագ թափով են ընթանում այն համայնքներում, որտեղ դաշտերը ժամանակին ականազերծվել են ու ներկայումս գտնվում են անվտանգության գոտում: Ըստ գյուղի եւ գյուղատնտեսության աջակցման հիմնադրամի տնօրեն Հ. Սաֆարյանի՝ հացահատիկի սերմացուի եւ դիզվառելիքի հայտերի թիվը շարունակ աճում է, ու նախատեսվում է մինչեւ նոյեմբերի վերջերը լիովին ավարտել աշնանացանը: Ցորենի եւ գարու բարձրորակ սերմնացուի ներկրումն այլ երկրներիցշարունակվում է, եւ, պայմանավորվածության համաձայն, 10 օրվա ընթացքում բոլոր հայտերը կբավարարվեն:
«Հաշվի առնելով ավանդական ճյուղի՝ հացագործության զարգացման ռազմավարական նշանակությունը, գալիք տարվա բերքի տակ» նախատեսվում է աշնանացանին հատկացնել 20 հազար հեկտար տարածություն:
