Մի քանի օր առաջ «ՀՀ»-ն գրել էր, որ Արցախից տեղահանվածներն ու տուն կորցրածները դրամական աջակցություն կստանան՝ մանրամասն ներկայացնելով ծրագրի եւ դիմումների ընդունման ընթացակարգի մասին։
Ի հավելումն տեղեկացնենք, որ պատերազմի հետեւանքով Արցախի Հանրապետությունից տեղահանված կամ Արցախում բնակելի անշարժ գույքը կորցրած քաղաքացիներին 4 ամիս ժամկետով աջակցության վճարման գործընթացն սկսվել է երեկվանից՝ նոյեմբերի 10-ից։ Կվճարվի սեպտեմբեր եւ հոկտեմբեր ամիսների համար։ Գումարը կտրամադրվի անկանխիկ եղանակով՝ շահառուի քարտային հաշվին փոխանցելու միջոցով։
Աշխատանքի եւ սոցիալական հարցերի նախարարությունից տեղեկացնում են, որ «online.ssa.am» կայքէջում էլեկտրոնային դիմումի ներկայացման համար անհրաժեշտ է նախ մուտք գործել «ՀՀ կառավարության կողմից աջակցության տրամադրման առցանց դիմումներ» պատուհան, ապա «Արցախի Հանրապետության քաղաքացիների աջակցության միջոցառումներ» էջ, այնուհետեւ «Արցախի Հանրապետության տեղահանված կամ Արցախի Հանրապետությունում բնակելի անշարժ գույքը կորցրած քաղաքացիներին 4 ամիս ժամկետով ամսական դրամական օգնության դիմումներ» դաշտում սեղմել «Դիմումի մուտքագրում» կոճակը։ Պահանջվող բոլոր տվյալները լրացնելուց հետո անհրաժեշտ է սեղմել «Ավարտել դիմումի մուտքագրումը» կոճակը: Մուտքագրման ավարտը գրանցելուց հետո դիմումը կհաշվառվի փաստաթղթային ստուգման համար, որի արդյունքի (դիմումի մերժման կամ հաստատման) մասին ծանուցում կուղարկվի էլփոստի միջոցով:
Վճարման ցուցակում ներառվելու եւ ցուցակը բանկին տրամադրելու դեպքում դիմումում նշված հեռախոսահամարին կուղարկվի ծանուցում՝ վճարման ենթակա գումարի եւ բանկի նշումով: Քանի որ մեր խմբագրություն շատերն էին դիմել շահառու լինել-չլինելու հարցով, հարկ ենք համարում տեղեկացնել, որ ծրագրի շրջանակներում դրամական օգնություն տրվում է պատերազմի հետեւանքով Արցախից տեղահանված կամ Արցախում բնակելի անշարժ գույքը կորցրած (արցախահայության աջակցության ծրագրերի շրջանակներում 300.000 կամ 250.000 դրամ աջակցություն ստացած) այն քաղաքացիներին, ովքեր Հայաստանում կամ Արցախում են։
Աջակցությունը տրամադրվելու է 4 ամիս ժամկետով՝ 2021 թ. սեպտեմբեր-դեկտեմբեր ամիսներից յուրաքանչյուրի համար՝ 1. երեխաներին, 1-ին կամ 2-րդ խմբի հաշմանդամություն ունեցող անձանց՝ 50 հազ. դրամ, 2. մյուս շահառուներին (կանայք, տղամարդիկ, այդ թվում՝ կենսաթոշակառուներ) 25 հազ. դրամ։
Ծրագրի շահառու են նաեւ 2020 թ. սեպտեմբերի 27-ից հետո ծնված այն երեխաները, ում դրամական օգնություն նշանակելու դիմումը ներկայացնող ծնողը վերոնշյալ միջոցառումներից (300.000 կամ 250.000 դրամ) որեւէ մեկի շահառու է։
