Ջավախքից է բանաստեղծ եւ լրագրող Հակոբ Սրապյանը, ով այսօր դարձավ 65 տարեկան եւ շարունակում է իր ստեղծագործական աշխատանքը՝ այս անգամ «Հայաստանի Հանրապետություն» օրաթերթի էջերում մշակութային թեմաներով հոդվածներ հեղինակելով:
Ծնվել է Ախալքալաքի շրջանի Օլավերդ գյուղում 1956 թ. նոյեմբերի 18-ին: 1984 թ. ավարտել է Երեւանի պետական համալսարանի բանասիրության ֆակուլտետը: Մանկավարժական գործունեությունից բացի, սկզբնական շրջանում զբաղվել է լրագրությամբ, ստեղծագործել է: 1991-ից արդեն աշխատել է հայ մամուլում՝ եղել է «Հայաստան» թերթի մշակույթի բաժնի վարիչը, միաժամանակ` «Նոր Գլաձոր» եւ «Ձայն վիրահայոց» թերթերի գլխավոր խմբագիրը: Արցախյան ազատամարտի տարիներին՝ 1988-94 թթ. հաճախ է եղել մարտական թեժ կետերում եւ մամուլում ներկայացրել այդ հերոսական օրերի մասին:
Հոգով բանաստեղծ-գրող է Հակոբը, եւ նրա բանաստեղծությունները դարձել են երգեր, որոշները՝ ռազմահայրենասիրական («Շարասյան քայլերգ», «Քայլերգ» եւ այլն)։ Վեց գիրք՝ «Տառապանքի շղթա» (1992 թ.), «Վրնջացող լռություն» (1995 թ.), «Տասներկու արծվային թռիչք» (1998 թ.), «Անձրեւն ու աղջիկը» (2002 թ.), «Փախուստ խնջույքից» (2003 թ.), «Ծանր փոշի» (2012 թ.), արդեն տպագրվել են: Արցախյան ազատամարտին եւ Արծվաշենի 4500 բնակչության տարհանումն իրենց կյանքի գնով ապահոված 12 ազատամարտիկներին է նվիրված «Տասներկու արծվային թռիչք» փաստագրական գիրքը, որն արժանացել է ՀՀ ՊՆ եւ ՀՀ ժուռնալիստների միության հատուկ մրցանակին: 2007 թ. հրատարակել է իր ծննդավայրի մասին պատմող «Գյուղը լեռան ծոցում» փաստագրական գիրքը: 2001-ից Հայաստանի գրողների միության անդամ է: Իր երկրին նվիրված լրագրող բանաստեղծն աչքի է ընկնում բարի ու համեստ բնավորությամբ, հարգված ու սիրված է աշխատանքային բոլոր տարիների ընկերների կողմից: Ջավախքեցի հարեւանս՝ Գեւորգ Բասենցյանը, մշտապես սիրով է խոսում իր կնքահոր՝ Հակոբի մասին, հպարտանում, որ ստեղծագործող բարեկամ ունի:
Նրա ստեղծագործությունները տարբեր բեմերում հնչեցրել են այնպիսի անհատականություններ, որոնք չափազանց խստապահանջ են եղել այն բանաստեղծությունների ընտրության հարցում, որոնք պետք է ներկայացնեին հանրությանը: Խոսքը ժողովրդական արտիստներ, ասմունքի վարպետներ Վլադիմիր Աբաջյանի, Ազատ Գասպարյանի, ինչպես նաեւ դերասաններ Սարգիս Վարդեւանյանի, Գայանե Ալեքսանյանի եւ այլոց մասին է:
Հոբելյարի ծննդյան օրվա եւ Հայաստանի գրողների միությունում տեղի ունեցած միջոցառումները լուսաբանելու համար Հակոբ Սրապյանը ՀԳՄ նախագահ Էդվարդ Միլիտոնյանի կողմից արժանացավ պատվոգրի եւ հուշանվերի՝ գրիչ: Է. Միլիտոնյանը բարձր գնահատեց Հ. Սրապյանի ստեղծագործական աշխատանքը եւ հանձնելով պատվոգիրն ու նվիրելով գրիչը՝ մաղթեց նոր ստեղծագործություններ, առողջություն ու հաջողություն:
Ավելացնենք, որ 2011 թ. Հակոբ Սրապյանը պարգեւատրվել է Հայաստանի գրողների միության «Գրական վաստակի համար» մեդալով:
Հ. Գ. «Հայաստանի Հանրապետություն» օրաթերթի խմբագրակազմը շնորհավորում է աշխատանքային ընկերոջը՝ մաղթելով առողջություն, ստեղծագործական ավյուն եւ հաջողություններ:
