Շուրջ 30 հեկտար տարածություն կզբաղեցնի Մարտունու շրջանի Կարմիր Շուկա համայնքում կառուցվող բնակելի նոր թաղամասը, որի շահառուները պատերազմի հետեւանքով Ադրբեջանի օկուպացրած գյուղերի բնակիչներ են: Տեղահանված ավելի քան 40 ընտանիք, գերակշիռ մասը՝ թաղավարդցիներ, կորցնելով տունուտեղ, ունեցվածք, սեփականաշնորհված հողատարածք, ցանկություն են հայտնել վերաբնակություն հաստատել կառուցվող նոր թաղամասում՝ չկորցնելով ծննդավայր վերադառնալու հույսը:
Ինչպես Կարմիր Շուկայի համայնքի ղեկավար Նարեկ Աթայանն է վկայում, նոր թաղամասի շինարարության ծրագիրը ստանձնել է «Հայաստան» համահայկական հիմնադրամը: Այն իրականացնում է «Հիմնաքար» ընկերությունը, ում հրավերով Ռուսաստանից հրավիրված մասնագետների բրիգադը, նախագծի համաձայն, փայտե կոնստրուկցիաներով 150 առանձնատուն կկառուցի կենցաղային բոլոր հարմարություններով:
5 բնակարան արդեն պատրաստ է շահագործման: Ն. Աթայանի խոսքերով` դրանք շատ հարմարավետ են եւ հավանության են արժանացել շահառուների կողմից: Հաշվի առնելով բազմանդամ ընտանիքների առաջարկությունները` նախատեսվում է ընդլայնել բնակարանների մակերեսները եւ լրացուցիչ ննջասենյակներ ավելացնել: Նախագահ Ա. Հարությունյանն անձամբ է ծանոթացել շինարարության աշխատանքներին եւ ոլորտի պատասխանատուներին հանձնարարել նոր նախագծեր մշակել բազմանդամ ընտանիքների համար: Տեղում նա քննարկել է նաեւ թաղամասի ենթակառուցվածքների ու կենսական նշանակության շինարարության ապահովման հարցերը եւ կարեւորել բնակչության համար սոցիալ-կենցաղային պայմանների ստեղծման անհրաժեշտությունը:
Կարմիր Շուկայում ընթացքի մեջ է եւս 2 բազմաբնակարան շենքերի շինարարությունը, որի պատվիրատուն Արցախի ներդրումային հիմնադրամն է: Համայնքի ղեկավարի հավաստմամբ` մինչեւ տարեվերջ կավարտվեն հարդարման աշխատանքները, ու շահագործման կհանձնվեն: Ընդ որում` նոր բնակարաններն առաջին հերթին կհատկացվեն 44-օրյա պատերազմում զոհված եւ հաշմանդամ դարձած զինվորների ընտանիքներին:
