Այս տարի Հայաստանի գրողների միության «Արարատ Մկրտումյան» մրցանակաբաշխությունն առանձնահատուկ էր, քանզի մայիսի 1-ին լրացավ վաղամեռիկ բանաստեղծի ծննդյան 65-ամյակը:
Արարատ Մկրտումյանի ծննդավայր Ալավերդիում, նրա շիրիմի մոտ հավաքվել էին մրցանակաբաշխության հանձնախմբի շիրակցի եւ լոռեցի անդամները, բանաստեղծի եղբայրը՝ «Արարատ Մկրտումյան» հիմնադրամի նախագահ Արթուր Մկրտումյանը, հարազատները: Հիշատակի տուրք մատուցեցին, ծաղիկներ խոնարհեցին բանաստեղծի հուշաքարին: Բազմամարդ էր Ալավերդու Սուրբ Գրիգոր Նարեկացի եկեղեցին. գրողների, մտավորականների, նաեւ մայրաքաղաքից, այլ բնակավայրերից հյուրերի մասնակցությամբ՝ եկեղեցու հոգեւոր հովիվ տեր Միքայել քահանա Շաղոյանի հանդիսապետությամբ կատարվեց հիշատակի արարողություն: Ալավերդու մշակույթի տանը կայացած մրցանակաբաշխության հանդիսությունը բացվեց Ալավերդու երգի թատրոնի սաների կատարումներով: Ներկայացվեց մրցանակաբաշխության հանձնախմբի կազմը՝ բանասիրական գիտությունների թեկնածու, «Արմավ» հրատարակչության գլխավոր խմբագիր Արմեն Ավանեսյան, բանասիրական գիտությունների թեկնածու, «Անտարես» հրատարակչության գլխավոր խմբագիր Արքմենիկ Նիկողոսյան, ՀԳՄ Շիրակի մարզային բաժանմունքի նախագահ, բանաստեղծ Անդրանիկ Կարապետյան, բանաստեղծներ Գագիկ Սարոյան, Ռոզա Հովհաննիսյան, Սոնա Անտոնյան, ՀԳՄ Լոռու մարզային բաժանմունքի նախագահ, բանաստեղծ Մանվել Միկոյան, ԲԳԹ, դոցենտ Վալերի Փիլոյան:
Արարատ Մկրտումյանի պոեզիայի եւ մրցանակաբաշխության մասին ջերմորեն խոսեց ՀԳՄ նախագահ, բանաստեղծ Էդվարդ Միլիտոնյանը. «Վերընթերցելով Արարատ Մկրտումյանի գործերը՝ ես մեկ անգամ եւս համոզվեցի, որ դրանք մաքուր հոգուց բխած բանաստեղծություններ են: Երբ մարդն օժտված է ստեղծագործելու էներգիայով, նրա գիրն առաջնային է դառնում, ապրեցնում հեղինակին երկար ժամանակ»: Նա բարձր գնահատեց հանրապետությունում իր ձեւաչափով եւ հիշատակի արարողությամբ եզակի մրցանակաբաշխությունը՝ երիտասարդ բանաստեղծների կայացման, նրանց ստեղծագործական նոր լիցքեր հաղորդելու գործում: Նա ՀԳՄ պատվոգիր հանձնեց առաջին մրցանակի արժանացած Լիլիթին, շնորհավորեց նրան նաեւ բանաստեղծությունների առաջին՝ «Հիգիենիկ երազներ» գրքի առթիվ: ՀԳՄ նախագահը պատվոգիր հանձնեց նաեւ բանաստեղծի եղբորը՝ հայ գրականության զարգացման գործում ունեցած նշանակալի ներդրման համար: Ալավերդու քաղաքային թատրոնի արտիստները ներկայացրեցին «Չբնակեցված օր կամ Անահիտ» թատերականացված կոմպոզիցիան՝ Արարատ Մկրտումյանի ստեղծագործության հիման վրա: Կատարումներով հանդես եկան Ալավերդու երգի թատրոնի սաները եւ Սուրբ Գրիգոր Նարեկացի եկեղեցու երգչախմբի մենակատար Անուշ Անանյանը:
Ալավերդու համայնքապետ Սասուն Խեչումյանին առաջարկվեց բանաստեղծի անվամբ փողոց անվանակոչել նաեւ ծննդավայր Ալավերդիում: Արթուր Մկրտումյանը խրախուսական մրցանակներ հանձնեց լոռեցի բանաստեղծներ Հրաչուհի Լոռեցյանին, Իրմա Հակոբյանին, Վիոլետա Լապտեւային, Անի Ղազարյանին, Մարինկա Ռաֆայելյանին: Ապա առաջին մրցանակի հավաստագիրը եւ Արարատ Մկրտումյանի դիմաքանդակով ոսկե մեդալը հանձնեց առաջին մրցանակակիր Լիլիթին: Նա հավաստիացրեց, որ մրցանակաբաշխությունը շարունակական է լինելու: Երիտասարդ գրողների համար դեպի գրականություն ճանապարհ հարթելու, նրանց ստեղծագործական նոր լիցքեր հաղորդելու համար Արթուր Մկրտումյանին երախտագիտություն հայտնեց Մանվել Միկոյանը. «Կան գրողներ, որոնց ստեղծագործությունները կարդալով՝ համոզվում ենք, որ ճշմարիտ գրականությունը չի հնանում: Նրանցից մեկն Արարատ Մկրտումյանն է: Այս մրցանակաբաշխությանը մասնակցած հեղինակների մի մասն արդեն կայացած գրողներ են: Նախկինում հաղթող ճանաչված Մարինե Թաթոյանն ու Մանուշակ Քոչարյանն անցած տարի դարձել են ՀԳ միության անդամներ, եւ համոզված եմ՝ այս գործընթացը շարունակվելու է: Արարատ Մկրտումյանի հոգին վերին ոլորտներում լույսերի մեջ է, որովհետեւ նրա ներկայությունը նաեւ պայմանավորում է հայ գրականության մեջ նոր անուններ»:
Հուշեր պատմեց «Լոռվա ձոր» հայրենակցական ՀԿ նախագահ, ԲԳ դոկտոր, պրոֆեսոր Սերգո Երիցյանը: Իրենց խոսքում մրցանակակիրներին շնորհավորեցին եւ մրցանակաբաշխությունը կարեւորեցին ՀՀ մշակույթի վաստակավոր գործիչ, երգիծաբան, դրամատուրգ Սամվել Խալաթյանը, ԲԳ դոկտոր, պրոֆեսոր Թերեզա Շահվերդյանը, բանաստեղծուհի Վեներա Վարդումյանը: Արարատ Մկրտումյանի ծննդյան 65-ամյակի առթիվ «Էդիթ Պրինտ» հրատարակչությունը վերահրատարակել է բանաստեղծի «Մի հայրենիք ավելի» գիրքը: Արթուր Մկրտումյանի որդին գրքի օրինակներ հանձնեց Ալավերդու գրադարանների կենտրոնացված համակարգին, քաղաքի դպրոցներին:
Գագիկ ԱՆՏՈՆՅԱՆ
Լոռի
