Կոտայքի մարզի Աբովյան քաղաքում մայիսի 29-ին կայացավ փողային նվագախմբերի «Հնչի՛ր, շեփոր հաղթական» հանրապետական շքերթ-փառատոնը՝ նվիրված հայոց բանակի 30-ամյակին։ ՀՀ ԿԳՄՍ նախարարության կազմակերպած հերթական փառատոնին մասնակցեցին ՀՀ տարբեր մարզերի՝ Սյունիք, Շիրակ, Տավուշ, Կոտայք, Արմավիր եւ այլն, ինչպես նաեւ Երեւան քաղաքի երաժշտական դպրոցների, բուհերի, այլ կազմակերպությունների 11 նվագախմբեր։ ՀՀ ԵԿՄ «Պատանի երկրապահ» ակումբը հանդես եկավ Էրեբունու, Կենտրոնի, Հրազդանի ԵԿՄ տարածքային բաժանմունքների սաների մասնակցությամբ՝ Սամվել Խաչատրյանի, Ալյոնա Ստեփանյանի եւ Միհրան Խաչատրյանի ղեկավարությամբ։
Շքերթն սկսվեց Աբովյան քաղաքի Սուրբ Հովհաննես-Մկրտիչ եկեղեցու մոտից։ Նվագախմբերի առջեւից անցնում էին պատանի երկրապահները՝ ձեռքներին ՀՀ, Արցախի Եռագույնները եւ ԵԿՄ դրոշը։ Փառատոնը կայացավ Աբովյանի քաղաքապետարանի հարակից հրապարակում։ Նվագախմբերը հրապարակ էին մտնում միմյանցից մի քանի րոպե տարբերությամբ՝ յուրաքանչյուրը ներկայացնելով 3 աշխատանք։ Պատանի երկրապահները հանդես եկան՝ ներկայացնելով նաեւ ԵԿՄ օրհներգը։ Փառատոնը վարեց դերասան Սարգիս Նաջարյանը, ով հայտարարում էր խմբերի, նրանց ղեկավարների մասին։ Նվագախմբերի շքերթին ու երաժշտական կատարումներին ներկա էին աբովյանցիները։ Հատկապես ուրախ էին մանուկները։ Փոքրիկ Լուսեն զինվորի պես էր քայլում եւ ընդառաջ գնում հրապարակ մտնող յուրաքանչյուր նվագախմբի։ Աբովյանի քաղաքային համայնքի ղեկավար Էդվարդ Բաբայանի՝ կրթության, մշակույթի, սպորտի եւ երիտասարդության հարցերի գծով օգնական Մետաքսյա Բաբայանը ողջունեց շքերթ-փառատոնի մասնակիցներին, աբովյանցիներին՝ ասելով, որ վաղ առավոտից Աբովյանում՝ տարբեր անկյուններում, հնչում են շեփորները՝ բարձր տրամադրություն հաղորդելով իրենց քաղաքացիներին։ Ուրախություն հայտնեց, որ մեր երկրում կան նման տաղանդավոր պատանիներ ու երաժշտական խմբեր՝ բոլորին մաղթելով ստեղծագործական վերելք։ Իսկ հայոց բանակին, որի 30-ամյակին էր նվիրված շքերթ-փառատոնը, մաղթեց՝ նոր հերոսական հաղթական էջեր նվիրի մեր ժողովրդին։ Այնուհետեւ համայնքապետի կողմից շնորհակալագրեր հանձնեց մասնակից նվագախմբերի ղեկավարներին։ «Պատանի երկրապահ» ակումբից շնորհակալագրի արժանացան դրոշակակիրները, թմբկահարներն ու փողահարները։ ՀՀ ԵԿՄ վարչության նախագահ Սասուն Միքայելյանի կողմից շնորհակալագրի արժանացան ՀՀ ԿԳՄՍՆ մշակույթի, մանկապատանեկան դաստիարակության կենտրոնի տնօրեն Տիգրան Բալոյանը եւ կազմակերպիչ Սամվել Բալոյանը։
Փառատոնի հանդիսավոր մասի ավարտից հետո «Պատանի երկրապահ» ակումբի սաները, ղեկավարների ուղեկցությամբ, այցելեցին ՀՀ ԵԿՄ Աբովյանի քաղաքային տարածքի բաժանմունք, ծանոթացան իրենց հասակակիցների հետ։ Բաժանմունքի փոխնախագահ Արմեն Սեդրակյանը ողջունեց պատանիներին, ովքեր ծաղիկներ խոնարհեցին Արցախյան 44-օրյա պատերազմում նահատակված անմահ հերոսներին նվիրված խաչքարի մոտ։ Շեփորահարները հնչեցրին ռազմական երգերի երաժշտություն, ԵԿՄ օրներգը։ Պատանի երկրապահները խաչքարի մոտ հանդես եկան ասմունքով։ Փոքրիկ ջութակահարը կատարեց Կոմիտասի գործերից։ Այնուհետեւ կայացավ էքսկուրսիա Կոտայքի մարզի Ակունք գյուղի մոտակա սրբավայր։ Շամիրամ լեռան հարավային ստորոտին են Ս. Պողոս-Պետրոս մատուռները, որոնցից մեկն ավերակ վիճակում էր եւ արդեն կանգուն է նախկին տեսքով։ Մատուռ-եկեղեցիների տարածքում կան հնադարյան խաչքարեր ու ժայռախաչեր: Մատուռները բարձր եւ ուղղաձիգ ժայռերի ստորոտին են։ Ժայռերն ունեն քարայրներ, որոնք վաղնջական ժամանակներից ծառայել են մարդուն, եղել են ճգնարաններ ու ուխտավայրեր։ Պատանի երկրապահները հանգստացան այստեղ, ծանոթացան սրբավայրին։ Երեկոյան վերադարձան տուն՝ եւս մի հագեցած օր ունենալով։
ԵԿՄ Էրեբունու տարածքային բաժանմունքի «Պատանի երկրապահ» ակումբի նախագահ Սամվել Խաչատրյանը տեղեկացրեց, որ արդեն 10 տարի է՝ իրենց նվագախումբը մասնակցում է հանրապետական շքերթ-փառատոների, որոնք կազմակերպվում են ՀՀ ԿԳՄՍ նախարարության կողմից եւ յուրաքանչյուր տարի նվիրված են մեր ժողովրդի կյանքում կարեւոր որեւէ իրադարձության։
