Արցախում շարունակում է համալրվել «ԱրՄաթ» ինժեներական լաբորատորիաների ցանցը, որոնց թիվն անցնում է երկու տասնյակից: Չնայած 44-օրյա պատերազմի հետեւանքով նորագույն տեխնոլոգիաներով հագեցած լաբորատորիաների մի զգալի մասը մնացել է թշնամու օկուպացրած տարածքներում, սակայն ծրագրի հեղինակները չեն վհատվում եւ իրենց ձեռնարկումներում ավելի վճռական են, հետեւողական: Այդ մասին են վկայում հետպատերազմյան շրջանում հանրապետության կրթօջախներում, մասնավորապես՝ սահմանամերձ բնակավայրերում, ցանցի ընդլայնման եւ տեղեկատվության հուսալիության ապահովման ուղղությամբ իրականացվող գործընթացները:
Օրերս Ներքին Հոռաթաղի (Մարտակերտի շրջան) միջնակարգ դպրոցում հերթական ինժեներականի բացման արարողությանը ներկա էին ԿԳՄՍ նախարար Անահիտ Հակոբյանը, շրջվարչակազմի պատասխանատուները: Կրթօջախի տնօրինությունը նախապես հոգացել է ընդարձակ եւ կահավորված կաբինետի խնդրի մասին, իսկ գլխավոր հովանավորը ջանք չի խնայել Երեւանից գյուղ հասցնելու պահանջվող տեխնիկան եւ սարքավորումները՝ հաճելի անակնկալ մատուցելով աշակերտներին: «ԱրՄաթ» ինժեներական լաբորատորիայի ծրագրի ղեկավար Սեդրակ Վարդանյանի խոսքով՝ ձեռք բերված ժամանակակից սարքավորումները եւ բարձր ճշգրտությամբ մշակված ծրագրերը դպրոցականներին հնարավորություն կտան զարգացնել իրենց գիտելիքները եւ ստանալ համալիր տեխնոլոգիական (ինժեներական) կրթություն, ինչն այսօր աշխարհում խիստ պահանջված է: Նրա համոզմամբ՝ մեր ժամանակներում, երբ զբաղվածության մեծ խնդիր կա, շատ կարեւոր է, որ երեխաները մասնագիտական կողմնորոշման հարցում ճիշտ վճիռ կայացնեն եւ կատարելագործելով «ԱրՄաթ» լաբորատորիայում ունեցած փորձն ու գիտելիքները, կարողանան ինժեներական կրթություն ստանալ:
Ըստ ծրագրի պատասխանատուների՝ սկզբնական շրջանում աշակերտները կծանոթանան տեղեկատվական տեխնոլոգիաների հիմունքներին, կսովորեն մոդելավորում եւ ռոբոտաշինություն: Ծրագրի համակարգող Անի Ղազարյանը որոշ նրբություններ է «գաղտնազերծում» եւ կոնկրետ օրինակներով ապացուցում Հայաստանում գործող նմանատիպ լաբորատորիաների առավելությունը, վստահեցնում, որ արդյունավետ, լիարժեք դասընթացներ կազմակերպելու դեպքում դրական էներգիա կարող են ստանալ դպրոցականները: Ավելին, ընդլայնելով հետաքրքրությունը ժամանակակից տեխնոլոգիաների կիրառման ձեւերի եւ մեթոդների նկատմամբ, հետագայում վստահ քայլեր կկատարեն տեխնիկայի ու գիտության բնագավառում, բարձրագույն կրթություն ստանալուց հետո ձեռք կբերեն հարուստ գիտելիքներ եւ պահանջված մասնագետներ կդառնան տնտեսության համար:
«Որպեսզի ինժեներական կրթությունը հասանելի լինի ամեն մի աշակերտի համար, մենք մտադիր ենք «ԱրՄաթ» լաբորատորիաներ բացել Արցախի բոլոր դպրոցներում: Եվ մենք հետեւողականորեն կյանքի ենք կոչելու այդ ծրագիրը,- խոստանում է Սեդրակ Վարդանյանը:- Անկախ առաջադիմության աստիճանից, լաբորատորիան բաց պիտի լինի յուրաքանչյուր երեխայի առաջ, եւ նրա նախասիրություններով պայմանավորված՝ նա անպայման պիտի ընդգրկվի որեւէ խմբում, դրսեւորի իր ընդունակությունները: Հատկանշական է, ամառային արձակուրդի ժամանակ, ծրագրի շրջանակում, նրանք ընդգրկվելու են կազմակերպվող դասընթացներին եւ ձանձրանալու առիթ չեն ունենալու, մանավանդ որ, պարապմունքներն «ընդմիջվելու են» ուշագրավ էքսկուրսիաներով, մրցույթներով եւ ցուցահանդեսներով: Ուսման մեջ առավել աչքի ընկած աշակերտներն ընդգրկվելու են Հայաստանում եւ Արցախում կազմակերպվող ճամբարներում»:
Ս. Վարդանյանը հավելեց նաեւ, որ լավագույն աշխատանքներ ներկայացրած թիմերը հնարավորություն կունենան մասնակցելու աշնանը Երեւանում կազմակերպվող ցուցահանդեսին, որտեղ Արցախը կներկայացվի առանձին տաղավարով: Ըստ որում, լավագույն աշխատանքների համար հաղթողները կպարգեւատրվեն ինժեներական սարքավորումներով, ինչպես նաեւ կարժանանան դրամական մրցանակների:
