ՀՀ շուկայի վերահսկողության տեսչական մարմինը ներկայումս բետոնի ամրանավորման համար օգտագործվող պողպատե արտադրանքների նկատմամբ վերահսկողություն է իրականացնում կառավարության 2019 թ. հունիսի 6-ի թիվ 730-Ն որոշման հավելվածով սահմանված ստուգաթերթի հիման վրա։ Սրա մշակման համար հիմք է եղել կառավարության 2006 թ. փետրվարի 2-ի թիվ 179-Ն որոշմամբ հաստատված տեխնիկական կանոնակարգը։ Բայց սա էլ իր հերթին կառավարության 2021 թ. ապրիլի 22-ի թիվ 607-Ն որոշմամբ ուժը կորցրած է ճանաչվել։ Միաժամանակ նույն այս որոշմամբ հաստատվել է բետոնի ամրանավորման համար օգտագործվող պողպատե արտադրանքներին ներկայացվող պահանջների նոր տեխնիկական կանոնակարգ, որում տեղ գտած պահանջները ստուգաթերթում ամրագրված չեն:
Սա հաշվի առնելով՝ գործադիրը անհրաժեշտ է համարել նշյալ 2019 թ. որոշումում փոփոխություն կատարել՝ հնարավորություն ընձեռելով տեսչական մարմնին ստուգել 2021 թ. որոշմամբ հաստատված պահաջների պահպանումը։ Նախագիծը իրավական ակտերի նախագծերի հրապարակման միասնական կայքում դրված է քննարկման մինչեւ հունիսի 14-ը։
Նոր տեխնիկական կանոնակարգում տեղ են գտել մի շարք պահանջներ, որոնք նախկինում չկային, ուստի դրանց վերաբերյալ հարցերը ներառված չեն տեսչական մարմնի համապատասխան ստուգաթերթում: Հաշվի առնելով այն, որ ստուգումների կազմակերպման եւ անցկացման մասին օրենքով մեր երկրի տարածքում բոլոր ստուգումներն անցկացնում են բացառապես կառավարության կողմից հաստատված ստուգաթերթերի հիման վրա, անհրաժեշտություն է առաջացել 2019 թ. որոշումում փոփոխություններ անել բետոնի ամրանավորման համար օգտագործվող պողպատե արտադրանքների նկատմամբ ստուգման ստուգաթերթում։
Այսպիսով, ինչպես պնդում է գործադիրը, նախագծի ընդունման նպատակն է սահմանել բետոնի ամրանավորման համար օգտագործվող պողպատե արտադրանքների նկատմամբ ներկայացվող անվտանգության պահանջները, որոնք կարտացոլվեն հենց այդ պողպատե արտադրանքների ստուգման վերաբերյալ ստուգաթերթում։ «Եվ բետոնի ամրանավորման համար օգտագործվող պողպատե արտադրանքների վերաբերյալ ստուգաթերթի հաստատումը կամբողջացնի տեսչական մարմնի կողմից ոլորտում իրականացվող վերահսկողությունը՝ հնարավորություն ընձեռելով տեսչական մարմնին պատշաճ վերահսկողություն անել»:
Հարց է ծագում՝ իսկ բետոնի ամրանավորման համար օգտագործվող պողպատե արտադրանքների ստուգման անցկացման մեթոդը որն է լինելու՝ միայն փաստաթղթայի՞նը։ Պարզվում է՝ ստուգումը երեք մեթոդով կլինի՝ փաստաթղթային, տեսազննման եւ փորձաքննության ձեւով։ Փաստաթղթային կստուգվի օրինակ այն, թե ՀՀ տարածքում համապատասխանության պարտադիր գնահատման ենթակա եւ շրջանառության մեջ գտնվող բետոնի ամրանավորման համար օգտագործվող պողպատե արտադրանքներն արդյոք ուղեկցվո՞ւմ են համապատասխանության սերտիֆիկատով: Տեսազննությամբ կլինի այն, թե ՀՀ տարածքում համապատասխանության պարտադիր գնահատման ենթակա եւ շրջանառության մեջ գտնվող պողպատե արտադրանքներն արդյոք ուղեկցվո՞ւմ են համապատասխանության ազգային նշանի մակնշմամբ:
Իսկ փորձաքննությամբ կստուգվի, թե, ասենք, 14 մմ-ից պակաս տրամագծով ամրանային ձողերի մեխանիկական ցուցանիշներն արտադրողի մոտից առաքման ժամանակ, ինչպես նաեւ բետոնի նախալարման համար օգտագործվող A 600 եւ բարձր դասի ամրանային ձողերի մեխանիկական ցուցանիշները համապատասխանո՞ւմ են սահմանված նորմերին: Կամ՝ արդյո՞ք մեխանիկական փորձարկումների արդյունքները սահմանված նորմերից պակաս չեն։ Կամ՝ արդյո՞ք պատրաստի ամրանային ձողերում քիմիական տարրերի զանգվածային մասերը համապատասխանում են նորմերին: Նաեւ՝ արդյո՞ք պողպատե արտադրանքների մակերեւույթի վրա չկան կեղեւանքներ, գլոցածալքեր, փչուկներ եւ այլ տեսակի մետաղի գլոցման արատներ, որոնք կարող են խոչընդոտել դրանց օգտագործումը (սա կլինի եւ տեսազննում, եւ փորձաքննություն):
Նախագծի ընդունումից հետո պետական բյուջեի եկամտային եւ ծախսային մասերում փոփոխություններ չեն սպասվում: Շատ կարեւոր է, որ վերահսկողությունն իրապես պատշաճ ու խստորեն արվի։
