Վարդենուտ գյուղը (Արագածոտնի մարզ) եւս իր բաժին մասնակցությունն ունեցավ Արցախյան 44-օրյա պատերազմին: Եվ այդ մասնակցությունը ոչ միայն նյութական օգնության տեսքով էր, այլեւ իր ջահել որդիների` արցախայն պայքարին անձնվեր զինվորագրումով եւ, ցավոք, հերոս զավակներից երկուսի նահատակությամբ:
Նրանք` Արայիկ Սարգսյանը եւ Կարեն Նիկողոսյանը, ապրում են ու կապրեն երախտապարտ սերունդների հիշողության մեջ: Վկան` նաեւ այն խաչքարը, որը տեղադրվել է գյուղի կենտրոնում, եւ որի բացման հանդիսավոր արարողությունը կայացավ շաբաթ օրը: Բազմամարդ էր գյուղի կենտրոնական հրապարակը, եւ վարդենուտցիների ու հյուրերի ներկայությամբ էլ, տեր Մաղաքիայի ձեռամբ, կատարվեց նահատակ հերոսների հիշատակին նվիրված խաչքարի օծման արարողության սրբազան կարգը:
«Ժողովուրդն է ծնել,- իր ելույթում մասնավորապես նշեց Ապարան համայնքի Վարդենուտի վարչական տարածքի ղեկավար Կամո Սահակյանը,- Արայիկին, Կարենին ու բոլոր նրանց նմաններին եւ ժողովուրդն էլ երբեք չի մոռանա իր հերոսներին: Նրանք բոլորն արդեն հավերժի ճամփորդներ են, որ կռվի դաշտ ելան ոչ թե զոհվելու, այլ ապրելու եւ մեզ ապրեցնելու անսասան հավատով լցված, սերունդների համար ապագա կերտելու, անամպ երկինք ապահովելու սուրբ առաքելությամբ զինված… Անմահները մեզ հրամայում են, եւ նրանց անձնուրաց հայրենասիրությունը մեզ միշտ պարտավորեցնելու է` խոնարհումով հիշել սրբազան գործի համար նահատակվածներին: Պատմությունն իմաստուն ուսուցիչ է, իսկ իրենք արդեն պատմություն են դարձել, իրական լեգենդներ են: Նրանց հոգիների անմահ ջահերն են, որ երկնային հեռուներից լուսավորում են եւ կշարունակեն լուսավորել մեր ու ապագա սերունդների անցնելիք ուղին…»:
Հպարտ են, այո՛, վարդենուտցիներն իրենց հերոս զավակներով, եւ այդ հպարտությունն առավել է ամրապնդվում ու զորանում այն անձանց շնորհիվ, ովքեր հոգու պարտք են համարել իրենց հնարավորությունների սահմաններում արժանին մատուցելու նրանց հիշատակին: Խոսքը, մասնավորապես, Սեւակ եւ Աննա Նիկողոսյանների մասին է, ում ընտանիքի նվիրատվությամբ էլ իրականացվել է խաչքարի տեղադրումը: Այս նվիրական գործին մեծապես աջակցել են Վազգեն Նիկողոսյանը եւ բոլոր նրանք, ովքեր մասնակից են եղել աստվածահաճո այս ձեռնարկը հաջողությամբ կյանքի կոչելուն:
Ելույթ ունեցողներից յուրաքանչյուրն իր հերթին ընդգծեց հերոսների հիշատակի հանդեպ ապրողներիս պարտքի ու պատասխանատվության մասին, կարեւորեց հավատարմությունը նրանց պատվիրանին` ամուր պահել-պահպանել հող հայրենին, պատրաստ լինել նրա պաշտպանության սրբազան գործին: Գյուղի դպրոցի սաների պատրաստածն էլ երդման ու հավատարմության յուրօրինակ դրսեւորում, սրտի անկեղծ ու նվիրական խոսք էր…
Միջոցառումը վերածվեց, կարելի է ասել, յուրօրինակ ու անկրկնելի հայրենասիրական դասի, իսկ խաչքարն, անկասկած, սրբատեղի է դառնալու հերոսների համագյուղացիների` վարդենուտցիների համար:
