Ընդամենը հինգ տարվա կենսագրություն ունի Զինծառայողների ապահովագրության հիմնադրամը, որի ծնունդն ազդարարվեց 2016 թ. ապրիլյան քառօրյա պատերազմից հետո: Սակայն, դատելով անցած ժամանակաշրջանում կառույցի իրականացրած աշխատանքներից, դժվար չէ համոզվել այն իրողության մեջ, որ հիմնադրամը պատվով է կատարում իր առջեւ ծառացած խնդիրները` նպատակ հետապնդելով որոշակիորեն «թեթեւացնել» արցախյան պատերազմների ընթացքում զոհված, առաջին եւ երկրորդ կարգի հաշմանդամ դարձած, ինչպես նաեւ անհետ կորած զինծառայողների ընտանիքների սոցիալական բեռը, տրամադրել ֆինանսական աջակցություն, նրանց համար ստեղծել կենսական պայմաններ:
Ըստ վիճակագրական տվյալների` ընդհանուր առմամբ, 4813 շահառու է ընդգրկված ծրագրում, որից 691-ը՝ Արցախից: Այս նպատակով տարբեր կառույցների պատասխանատուներ հաճախ են Ստեփանակերտ այցելում, հանդիպում շահառու ընտանիքների անդամների հետ, ունկնդրում նրանց առաջարկությունները, քննարկումներ կազմակերպում, փորձում օգնել նրանց ոչ միայն ֆինանսապես, այլ նաեւ զբաղվածության խնդիր լուծել:
Հիմնադրամի տնօրեն Կարինե Սարգսյանի խոսքով` որի գլխավորած պատվիրակությունն օրերս հերթական այցով Արցախում էր, մարդիկ, վստահելով կառույցին, միաժամանակ սպասելիքներ ունեն: «Նրանց զավակները զոհվել են հայրենիքի ազատագրության համար մղված մարտերում, հաշմանդամ դարձել՝ կորցնելով աշխատունակությունը,- ասում է Կ. Սարգսյանը:- Մենք պարտավոր ենք հոգալ նրանց ընտանիքների հոգսերը, կյանքի համար կենսական նորմալ պայմաններ ստեղծել: Խնդրի անհրաժեշտությունը զգում է մեզնից յուրաքանչյուրը: Պատահական չէ, որ հազարավոր (գուցե միլիոնավոր) աջակիցներ ունենք Հայաստանում եւ արտերկրում: Եվ, կարծում եմ, սխալված չեմ լինի նշել, որ կառույցը այս տեսանկյունից համախմբում է համայն հայությանը»…
Համամիտ լինելով Զինծառայողների ապահովագրության հիմնադրամի ղեկավարի կարծիքին` ԱՀ պետնախարար Արտակ Բեգլարյանը բարձր է գնահատում կառույցի գործունեությունը, որը միտված է շահառուների շրջանում սոցիալական տարբեր ծրագրերի իրագործմանը: Միաժամանակ նա այն համոզմանն է, որ շարունակաբար պետք է «բարձրացվի աշխատանքի արդյունավետության շեմը», պետական լիազորված մարմիններն առավել ակտիվ պիտի համագործակցեն հիմնադրամի հետ եւ ընդլայնեն աջակցության հնարավորությունները:
Գոհունակություն արտահայտելով «փոխըմբռնման համար»` հիմնադրամի տնօրեն Կ. Սարգսյանն ընդգծեց, թե հենց «համագործակցության խորացման» եւ զարգացման նոր ծրագրեր մշակելու նպատակով են իրենք Ստեփանակերտում: Իսկ համընդհանուր խնդիրների լուծման գործում հիմնադրամի գործունեությունը ոչ թե պիտի սահմանափակվի շահառուներին ֆինանսական աջակցություն տրամադրելով, այլ կառույցը պիտի դառնա համայն հայությանը համախմբող մի հարթակ, որտեղ հանուն գաղափարի իրագործման կկենտրոնացվի աջակիցների ողջ ներուժը:
