Հայաստանի տեքստիլագործական ոլորտի շուրջ մեկ տասնյակ ընկերություն առանձին միասնական տաղավարով ներկայացվել է Կաունասում հոկտեմբերի 7-9-ը կազմակերպված «Արտադրված է Լիտվայում» տնտեսական ցուցահանդեսին։ Հայ արտադրողների մասնակցությունն ապահովվել է Հայաստանի արդյունաբերողների եւ գործարարների միության ու Լիտվայի Հագուստի եւ տեքստիլ արդյունաբերության ասոցիացիայի կողմից իրականացվող «Կանաչ տեքստիլ Եվրոպայի կայուն տնտեսության համար» ծրագրի շրջանակներում։
Ողջունելով հայ գործընկերներին՝ ԼՀՏԱԱ-ի գլխավոր տնօրեն Աստա Տումիտըտեն նշել է, որ երկու կողմերի համար լավ հնարավորություն է ստեղծվել ծանոթանալու միմյանց կարողություններին, արտադրանքին, գտնելու նոր գործընկերներ ու շուկաներ։ Նրա խոսքով՝ նման միջոցառումներն իրենց նպաստը կբերեն երկկողմ տնտեսակական կապերի հետագա խորացմանը։
Լիտվայում ՀՀ արտակարգ եւ լիազոր դեսպան Հովհաննես Իգիթյանը, անդրադառնալով հայ-լիտվական մինչ օրս եղած տնտեսական հարաբերություններին, մեծապես կարեւորել է նման հարթակների պարբերաբար ստեղծման անհրաժեշտությունը, որոնք գործարար շրջանակներին փոխգործակցության, իրենց արտադրությունն ընդլայնելու նոր հնարավորություններ են ընձեռում։
Հայաստանի արդյունաբերողների եւ գործարարների միության ներկայացուցիչ Սուսաննա Խալաթյանն անդրադարձել է «Կանաչ տեքստիլ Եվրոպայի կայուն տնտեսության համար» ծրագրի նպատակներին եւ նախատեսված միջոցառումներին, իրենց կազմակերպությունների ու արտադրանքի մասին մանրամասներ են պատմել տաղավարում ներգրավված հայաստանյան ընկերությունների ներկայացուցիչները։
Ցուցահանդեսի շրջանակներում մասնակից գործարարներն ունեցել են նաեւ առանձին երկկողմ բանակցություններ։
