«Russia-armenia.info» կայքը նշում է իր հիմնադրման տասնամյակը: Գլխավոր խմբագիր Արամ Խաչատրյանի ղեկավարությամբ այն ձեռք է բերել կայուն լսարան՝ ռուսալեզու տեղեկատվական հարթակում օբյեկտիվ հրապարակումների միջոցով նաեւ ռուսական լսարանին տեղեկացնելով այն իրադարձությունների մասին, որոնք տեղի են ունեցել եւ ունենում են Հարավային Կովկասում՝ մասնավորապես Հայաստանում: Մեր օրերում, երբ պատմության կեղծարարները ձգտում են «դիմագիծ ձեռք բերել» ոչ թե սեփական ազգային ճանապարհի, այլ բնիկ եւ հնագույն ժողովուրդների դերի մասին ստահոդ լուրերի տարածմամբ, կարեւորվում է այնպիսի ԶԼՄ-ների աշխատանքը, որոնք փակում են կեղծիքի ճանապարհը՝ ի շահ մարդկության:
Կայքը բազմաթիվ շնորհավորանքներ է ստացել տարբեր կառույցների ու անհատների կողմից: Շնորհավորողների թվում է նաեւ «Ռուսաստանի հայերի միություն» համահայկական հասարակական կազմակերպության նախագահ, ՌԴ նախագահին կից ազգային հարցերի խորհրդի նախագահության անդամ, ՅՈՒՆԵՍԿՕ-ի բարի կամքի դեսպան Արա Աբրահամյանը: «Անցած տասնամյակը դարձել է ձեր տեղեկատվական ռեսուրսի ոչ միայն ձեւավորման, այլեւ ժողովրդականություն ձեռք բերելու ժամանակաշրջան, ռեսուրս, որը, անշուշտ, անհրաժեշտ է եւ պահանջված՝ շնորհիվ նրանց պրոֆեսիոնալիզմի, քաղաքացիական դիրքորոշման ու ստեղծագործական ակտիվ փնտրտուքի, ում ջանքերով գործում է:
Եվ այսօր ինչպես Ռուսաստանի, այնպես էլ Հայաստանի կյանքում ճակատագրական իրադարձությունների ժամանակաշրջանում ձեր տեղեկատվական պորտալը մնում է տեղեկատվական անզիջում պայքարի առաջնագծում, հայրենասիրության ու արդարության դիրքերում եւ ամեն օր հանրությանն է հասցնում տեղի ունեցող իրադարձությունների էությունը՝ հավատարիմ մնալով պատմական արդարության սկզբունքներին: «Russia-armenia.info» տեղեկատվական պորտալին մաղթում եմ ակտիվ աշխատանքի երկար տարիներ եւ նոր բարձունքների նվաճում»,- նշված է Արա Աբրահամյանի շնորհավորանքի տեքստում:
«ՀՀ»-ն միանում է հնչած շնորհավորանքներին՝ կայքին մաղթելով անխափան գործունեություն եւ այնպիսի հնարավորություններ, որոնք խոսքի իրական ազատություն են ապահովում մեր կյանքի բոլոր ոլորտներում:
