Հայ եւ ռուս փորձագետները երեկ Կլոր սեղանի շրջանակներում քննարկեցին հումանիտար ոլորտում երկու երկրների հարաբերություններին առնչվող արդի հիմնախնդիրները: «Ինտեգրացիա եւ զարգացում» հետազոտության եւ վերլուծության հասարակական կազմակերպության նախագահ, Եվրասիական փորձագիտական ակումբի համակարգող, քաղաքական վերլուծաբան Արամ Սաֆարյանն ասաց, որ հայ-ռուսական արդի հիմնախնդիրներից մեկը լեզվի պահպանման եւ զարգացման հարցն է:
«Հայ եւ ռուս ժողովուրդներն ունեն բարիդրացիական ջերմ հարաբերություններ, եւ նրանց կապող օղակներից մեկը լեզուն է: Շատ կարեւոր է հասկանալ, թե ինչ մակարդակի վրա է գտնվում ռուսաց լեզվի եւ գրականության, ինչպես նաեւ՝ երկու ժողովուրդների պատմության դասավանդման մակարդակը մեր դպրոցներում եւ բուհերում»,- ասաց Սաֆարյանը: Նա հույս հայտնեց, որ ծավալված քննարկումների արդյունքում կառաջարկվեն նոր լուծումներ եւ մեխանիզմներ` ռուսաց լեզվի դասավանդման արդիականացման հետ կապված:
Նա նշեց, որ տասնյակ հազարավոր մեր հայրենակիցներ այսօր գտնվում են Ռուսաստանի Դաշնությունում` աշխատանքային միգրանտի կարգավիճակով: Հազարավոր երիտասարդներ բարձրագույն կրթություն են ստանում Ռուսաստանի բուհերում: Հայաստանում տուրիստական ամենամեծ հոսքն ապահովում են Ռուսաստանի քաղաքացիները, եւ ավելի քան 100 հազար Ռուսաստանի քաղաքացիներ այսօր ժամանակավոր բնակություն են հաստատել Հայաստանում:
«Այս ամենը նշանակում է, որ կյանքն է ստիպում օրեցօր էլ ավելի լավ տիրապետել ռուսաց լեզվին եւ գրականությանը: Որոշ պրոֆեսորներ եւ դասախոսներ ահազանգում են, որ բուհերում ռուսաց լեզվի իմացության մակարդակը բավարար չէ: Բայց մենք ունենք նաեւ երիտասարդներ, ովքեր ռուսաց լեզվով մեծ պատվով ներկայացնում են հարազատ բուհերը Ռուսաստանում եւ այլ երկրներում»,- ասաց Արամ Սաֆարյանը:
Նա վստահեցրեց, որ ռուսաց լեզվին լավ տիրապետելը չի նշանակում չուսուցանել այլ երկրների լեզուներ: Անհրաժեշտ համարեց գտնել նոր լուծումներ ռուսաց լեզվի իմացության մակարդակը ուժերի ներածին չափով առաջ տանելու համար:
Հայաստանում «Մոսկվայի տան» ներկայացուցիչ Տատյանա Գրոնսկայան եւս կարեւորեց թեմայի վերհանումն ու դրա շուրջ քննարկումների ծավալումը. «Կարծում եմ, որ հաջորդ տարի ԱՊՀ երկրներում ռուսաց լեզվի տարվա անցկացման ծրագիրը եւս դրականորեն կազդի այս հիմնախնդրի լուծման վրա եւ կտա նոր հնարավորություններ առաջ մղելու, պահպանելու ռուսաց լեզուն»:
Կլոր սեղանի կազմակերպիչներն էին Հաղորդակցության զարգացման ազգային գիտահետազոտական ինստիտուտը (Մոսկվա), ԵՊՀ միջազգային հարաբերությունների ֆակուլտետի Ռուսագիտության կենտրոնը, «Ինտեգրացիա եւ զարգացում» ՀԿ-ն եւ Եվրասիական փորձագիտական ակումբը։ Կլոր սեղանին առցանց մասնակցեցին նաեւ Մոսկվայից ժամանած փորձագետները:
