Արդեն մեկ ամիս է, ինչ ԱՀ խորհրդարանի գիտության, կրթության, մշակույթի, երիտասարդության եւ սպորտի հարցերի մշտական հանձնաժողովում շրջանառվում է «Հանրակրթության մասին» օրենքում փոփոխություններ ու լրացումներ կատարելու մասին» օրենքի նախագիծը: Հարցն Ազգային ժողով է ներկայացրել կրթության, գիտության, մշակույթի, երիտասարդության եւ սպորտի նախարար Անահիտ Հակոբյանը:
Կառավարության լիազոր ներկայացուցչի փոխանցմամբ, «Հանրակրթության մասին» օրենքում փոփոխություններ եւ լրացումներ կատարելու անհրաժեշտությունը պայմանավորված է հանրակրթության կառավարման, ներառականության եւ բովանդակության բարեփոխումներով:
Ըստ նախարարի, ձեռնարկվող քայլերը թույլ կտան մեծացնել համակարգի գործառնության արդյունավետությունը, խրախուսել համակարգի զարգացման հնարավորությունները, ապահովել եւ զարգացնել ուսուցիչների մասնագիտական կատարելագործման շարունակականությունը, կատարելագործել ուսումնական հաստատությունների կառավարման մեխանիզմները: «Համակարգում ուսուցչի մասնագիտական չափանիշների ներառումը հնարավորություն կտա հստակեցնելու ուսուցչի աշխատանքային առաջխաղացման հեռանկարը, այն դարձնել չափելի եւ տեսանելի, ինչպես նաեւ փոխկապակցել վարձատրության համակարգին`՝ տարակարգերի շնորհման միջոցով,- կարծում է Ա. Հակոբյանը:- Մասնագիտական չափանիշի սահմանումը հնարավորություն կընձեռի նաեւ հստակեցնել ուսուցիչների մասնագիտական զարգացման քաղաքականությունը`՝ հրաժարվելով միատեսակ եւ միաչափ վերապատրաստումներից, անցում կատարելով կարիքի վրա հիմնված եւ մասնագիտական չափանիշի պահանջներից բխող վերապատրաստումներին: Իսկ մասնագիտական չափանիշներն իրենց հերթին կհստակեցնեն ուսուցչական կադրերի պատրաստման գործընթացից անհրաժեշտ պահանջները եւ կնպաստեն մասնագիտական կրթության ծրագրերի վերափոխմանը»:
Նախարարի խոսքով, ուսումնական հաստատություններում կառավարումը՝ ուսումնադաստիարակչական գծով գործադիր մարմնի եւ վարչատնտեսական մասի համակարգողի միջեւ տարանջատելու արդյունքում, «կապահովի» արհեստավարժ եւ արդյունավետ կառավարում`՝ գործառույթների եւ պատասխանատվության հստակ բաշխմամբ: Նա կարեւոր փոփոխություն է համարում բացասական կամ անբավարար միավորային շեմից հրաժարվելը (գիտելիքը արժեւորելու տեսակետից): Արդյունքում՝ նախատեսվում է ունենալ առավել արդարացի գնահատում, հատկապես հաշվի առնելով հանրակրթության ներառականությունը, ինչը կվերացնի երկտարեցության երեւույթը: Դա իր հերթին իրականում կնպաստի սովորողների առանձին խմբի սոցիալական մեկուսացմանը եւ խնդրի խորացմանը: «Բացի այդ, անգամ սովորողի կողմից տրված նվազագույն չափով պատասխանը բացասական չի կարող համարվել, քանի որ այն նույնպես փոքր, բայց դրական քայլ կարող է դիտվել ու խթանել ուսման առաջընթացը,- վստահ է Ա. Հակոբյանը:- Նախատեսվում է չափորոշիչով հստակ սահմանել գնահատման սկզբունքները, նպատակները եւ չափանիշները, իսկ գնահատման գործիքակազմը սահմանել առանձին միասնական կարգով»:
Անդրադառնալով բարեփոխումներից ակնկալվող դրական տեղաշարժերին, նախարարը նշեց, թե օրենքի լրամշակման արդյունքում հնարավոր կլինի առավել արդյունավետ իրականացնել նաեւ կրթության առանձնահատուկ պայմանների կարիք ունեցող երեխաների կրթության կազմակերպման գործընթացը եւ ապահովել յուրաքանչյուր երեխայի համար մատչելի ու հասանելի կրթության հնարավորություն: «Կրթության առանձնահատուկ պայմանների կարիքի գնահատումը երեխայի կրթական ծրագրերին մասնակցության դիտարկումն է, ուսումնական ծրագրի յուրացման դժվարությունների պատճառների վերհանումը, երեխայի զարգացման հնարավորությունների բացահայտումը եւ կրթության առանձնահատուկ անհրաժեշտ պայմանների սահմանումը, բացառիկ ունակությունների վերհանումը: Օրենքում առաջարկվող փոփոխություններն ու լրացումները հենց հստակեցնում են այս քաղաքականությունը»,- վստահ է Ա. Հակոբյանը: Նա հավելեց նաեւ, որ հանրակրթության կառավարման ոլորտում առաջարկվող փոփոխությունը թույլ կտա մի կողմից նվազեցնել վարչարարությունը եւ մեծացնել համակարգի ճկունությունը, մյուս կողմից՝ հնարավորություն կընձեռի նվազեցնելու այն ռիսկերը, որոնք տարբեր ուսումնական հաստատություններում արմատավորված պրակտիկաներում դիտարկվում են ներկայումս, որոնց արդյունքում խորհրդի կողմից շատ հաճախ իրականացվում են ոչ համարժեք ընտրություններ: Նախարարը չի բացառում, թե «Հանրակրթության մասին» օրենքում փոփոխություններ եւ լրացումներ կատարելու մասին» օրենքի նախագծի ընդունման արդյունքում փոփոխությունների անհրաժեշտություն կառաջանա նաեւ ենթաօրենսդրական մի շարք իրավական ակտերում:
