«Մանկական Եվրատեսիլ» երգի մրցույթին վավեր են համարվելու միայն այն տոմսերը, որոնք հանդիսատեսը գնել է «tomsarkgh.am»-ից եւ «Telcell»-ից: Այս մասին երեկ լրագրողների հետ հանդիպմանն ասաց Հանրային հեռուստաընկերության գործադիր տնօրեն Հովհաննես Մովսիսյանը՝ հորդորելով չգնել վերավաճառվող տոմսեր, որոնք հավանական է՝ կեղծ են. «Լսել ենք մրցույթի տոմսերի վերավաճառքի մասին: Մենք ոչինչ չենք կարող անել այդ ուղղությամբ, որովհետեւ վաճառքը չի վերահսկվում: Մարզահամերգային համալիրի մուտքի մոտ վավեր են լինելու միայն «tomsarkgh.am» կայքից եւ մրցույթի ցուցադրության գլխավոր հովանավոր «Telcell»-ից գնված տոմսերը: Շուկայից, սեւ շուկայից գնված տոմսերը վավեր կարող են չլինել, կարող են լինել կեղծ, եւ գնորդները կարող են դառնալ խաբեության զոհ, ինչի պատճառով հնարավոր է՝ տհաճ իրավիճակ ստեղծվի համալիրում»:
Նա խնդրեց զգույշ լինել ու չօգտվել վերավաճառքից՝ եւս մեկ անգամ նշելով, որ Հանրային հեռուստաընկերությունն ու Եվրոպական հեռարձակողների միությունը չեն կարող պատասխանատվություն կրել: Անդրադառնալով տոմսերի արագ սպառմանը՝ Մովսիսյանն ասաց, որ դա անսպասելի է եղել: «Սա նաեւ մեր հանրային կապերի աշխատանքի արդյունքն է: Արդեն կարծում ենք, որ պետք է քիչ խոսել մրցույթից, որովհետեւ շատերն են ուզում ներկա լինել դահլիճում, իսկ տոմսերը քիչ էին»,- շեշտեց նա՝ հիշեցնելով, որ տոմսերը վաճառվել են երկու փուլով ու շատ արագ են սպառվել:
Հովհաննես Մովսիսյանի խոսքով՝ տեխնիկական աշխատանքների արդյունքում մարզահամերգային համալիրում քչացել է նստատեղերի թիվը: Տոնին շատերին մասնակից դարձնելու նպատակով են մրցույթի մեկնարկը գեղեցիկ համերգային ծրագրով ազդարարել դեկտեմբերի 5-ին Հանրապետության հրապարակում: «Մանկական Եվրատեսիլ» երգի մրցույթի գործադիր ղեկավար Մարտին Օսթերդալը հիացած է մրցույթի կազմակերպչական աշխատանքներով: Նրան գրավում են մրցույթը հյուրընկալող կողմի՝ Հայաստանի նախաձեռնած բազմաբովանդակ միջոցառումներն ու հայերի հյուրընկալությունը: Հայկական կողմն էլ նշում է՝ «Մանկական Եվրատեսիլը» փայլուն կազմակերպելու համար համագործակցում են եւ՛ հայ, եւ՛ արտասահմանցի բարձրակարգ մասնագետների հետ:
Օսթերդալը խոստովանեց՝ ուրախ է, որ «Մանկական Եվրատեսիլը», որոշակի դժվարություններ հաղթահարելով` կայացել է որպես հրաշալի երիտասարդական ու մանկական մրցույթ. «Ամեն տարի մրցույթի ժողովրդականությունն աճում է, մենք բազմաթիվ տաղանդավոր արտիստների ենք տեսնում բեմում, մրցույթը գնալով ավելի լավն է դառնում, մասնակիցները՝ եւս»:
Օսթերդալի խոսքով՝ իրենք շատ բարձր են գնահատում Հայաստանի գործընկերների կատարած նախապատրաստական աշխատանքը: «Բացման արարողությունը նորություն էր. ես ապշած էի՝ տեսնելով ստեղծագործական միտքը, որակը: Պատվիրակությունների համար կազմակերպված միջոցառումների ծրագիրը գերազանց է: 16 պատվիրակություններն էլ հիացած են, տպավորված են ոչ միայն կազմակերպման որակով, բեմով, այլեւ այն ջերմ ընդունելությամբ ու հյուրընկալությամբ, որին արժանացել են: Ըստ իս՝ դա ձեր մշակույթի մի մասն է, ինչը շատ բարձր ենք գնահատում»,-շեշտեց մրցույթի գործադիր ղեկավարը:
Մարտին Օսթերդալը դժվարացավ ասել, թե որ երկրների ներկայացուցիչներն են ֆավորիտ ու շեշտեց՝ բոլոր մասնակիցներն են շնորհալի եւ հնարավոր չէ կանխատեսել, թե ով կհաղթի. «Այս մրցույթում միշտ էլ կարեւորվել է վոկալը. այդպես եղել է, այդպես մնում է: Լավ ելույթ ունենալու համար պետք է արտառոց կատարում, արտառոց ելույթ, հզոր երգ, վոկալ: Չեմ կարծում, որ դա փոխվել է: Ինձ համար շատ հետաքրքիր է վերջին տարիներին մրցույթում լեզուների բազմազանությունը: Տեսել ենք շատ պետությունների ներկայացուցիչների, որոնք շատ լավ են ելույթ ունենում իրենց լեզվով: Այդ միտումից ես գոհ եմ»:
Հանրային հեռուստաընկերության գործադիր տնօրենը մեծ պատիվ է համարում հոբելյանական մրցույթը Երեւանում հյուրընկալելը: Նա նշեց՝ մրցույթի շրջանակներում ներգրավել են բազմաթիվ մասնագետների ոչ միայն Հայաստանից, այլեւ արտերկրից: Այժմ համալիրի տարածքում աշխատում է հազարից ավելի մասնագետ. «Փորձել ենք յուրահատուկ նշել մրցույթի հոբելյանը եւ Երեւան ենք հրավիրել մրցույթի հաղթողներին: Նրանցից շատերն են եկել Հայաստան ու ելույթ են ունեցել մրցույթի բացման համերգին, որը տեղի է ունեցել դեկտեմբերի 5-ին Հանրապետության հրապարակում: Հաղթած մասնակիցները ելույթ են ունենալու նաեւ բուն մրցույթի ընթացքում: Հույս ունեմ՝ հանդիսատեսը կհավանի այն համարը, որը պատրաստել ենք, քանի որ երկար ենք աշխատել դրա իրագործման ուղղությամբ»:
Անդրադառնալով հաղորդավար Ռոբին ռոբոտին՝ Հովհաննես Մովսիսյանը շեշտեց, որ նրա մասնակցությունը ցույց է տալիս Հայաստանի տեխնոլոգիական ներուժը:
