Վերջին շրջանում տարբեր հարթակներ, այդ թվում` ԶԼՄ-ներ հաճախ են օգտագործում «մանիպուլյացիա» բառը: Ընդ որում` ամենատարբեր առիթներով եւ երբեմն առանց հասկանալու բառի ուղղակի կամ փոխաբերական իմաստը: Որովհետեւ այն, ըստ էության, ուժեղ է հնչում` ենթատեքստում ցուցադրելով օգտագործողի թույնի չափը, նրա միտվածության աստիճանը, ոմանց դեպքում` նաեւ վախը: Հասկանալի է` այդ բառի օգտագործումն արդյունավետ գործիք է հատկապես օտարաշունչ քամիների դեմ աշխատող խոչընդոտներին հարված հասցնելու համար: Հույսը նրա վրա է, որ ընթերցողները բառարանում այդ բառի իմաստը փնտրելու փոխարեն պարզապես կարձանագրեն, որ ինչ-որ սարսափելի բան է տեղի ունեցել…
Այս ամենում դրական միայն մի բան կա. բառը կիրառողը պարպում է իր ագրեսիան: Հուսանք` անմիջապես ազատվում է նաեւ բացասական էներգիայից, այլ ոչ թե անցնում «մանիպուլյացիա»-ի այլ հնարավորությունների փնտրտուքի…
Ըստ «Վիքիպեդիայի»` «Մանիպուլյացիա» տերմինի լատինական անվանումը (manipulus) ունի երկու նշանակություն. ա) բուռ (manus-ձեռք, pie-լցնել), բ) փոքր խումբ, փունջ (manus+pi-արմատի թույլ ձեւը)։ Երկրորդ իմաստով այս բառը, մասնավորապես, նշանակել է մարտիկների ոչ մեծ ջոկատ (մոտ 120 մարդ) հռոմեական բանակում»: Օքսֆորդի բառարանում մանիպուլյացիա (manipulation) բառը սահմանված է որպես հատուկ նշանակության առարկաների կառավարում, մեխանիկական կառավարում, ինչպես նաեւ ձեռքերով կատարված շարժումներ: Կիրառման ոլորտների ընդլայնման արդյունքում նշված իմաստին միանում է նաեւ այդ տերմինի կիրառումը տեխնիկայում։ Առաջին հերթին` դա լծակների հմուտ գործածումն է ձեռքերով։ Հենց լծակները եւ բռնակները հաճախ անվանում են մանիպուլյատորներ։
Փոխաբերական իմաստով Օքսֆորդի բառարանը սահմանում է մանիպուլյացիան որպես «մարդկանց վրա ներգործելու, մարդկանց կամ առարկաները հմտությամբ կառավարելու ակտ՝ առանձնակի նվաստացուցիչ ենթատեքստով, ինչպես նաեւ գաղտնի կառավարում կամ մշակում»։ Այդ կերպ «մանիպուլյացիա» տերմինը քաղաքական բառարանում փոխարինեց նախկինում գերակշռող «մաքիավելլականության» տարբերակին:
Լրագրությունը ոչ միայն տեղեկատվության ապահովման գործիք է, այլեւ միջոց` ազդելու հասարակական կարծիքի վրա: Նույնիսկ ինչ-ինչ բառերի` սխալմամբ օգտագործումը, երբ ազդում է այդ կարծիքի վրա, կարող է առաջացնել իրավական հետեւանքներ:
