Հայ առաքելական եկեղեցու Գերմանիայի թեմը կազմավորվել է 1991 թ.՝ Ամենայն հայոց կաթողիկոս Վազգեն Առաջինի կոնդակով։ Թեմի հիմնադիր առաջնորդն էր տ. Գարեգին արքեպիսկոպոս Բեքջյանը (1991-2018)։ Նրա հրաժարականից հետո՝ 2018-ի ապրիլի 15-ին, Թեմական-Պատգամավորական ժողովը նոր առաջնորդ է ընտրել տեր Սերովբե վարդապետ Իսախանյանին։ 2019 թ. մայիսի 12-ին Մայր Աթոռ Սուրբ Էջմիածնում թեմակալ առաջնորդը ձեռնադրվել է եպիսկոպոս՝ ձեռամբ Գարեգին Բ Ամենայն հայոց կաթողիկոսի։
Գերմանիայի Շտուտգարտ քաղաքում գործել է նաեւ հայ եկեղեցական համայնք, որը, միանալով Գյոփինգենի եկեղեցական միությանը, վերանվանվել է Բադեն-Վյուրթեմբերգի հայ համայնքի։ 2011-ից Շտուտգարտի Լութեր եկեղեցում մատուցվում է սուրբ պատարագ։ Համայնքում գործում է «Սուրբ Մեսրոպ Մաշտոց» շաբաթօրյա դպրոցը։ Կազմակերպվում են հայ մշակույթի օրեր Շտուտգարտում, ինչպես նաեւ այլ միջոցառումներ ու ձեռնարկներ՝ հոգեւոր, կրթական, մշակութային եւ սոցիալական ոլորտներում։ 2008-ից համայնքի հոգեւոր հովիվն է տեր Տիրատուր քահանա Սարդարյանը, ով այս օրերին մայր հայրենիքում է. եկել է բարեգործական առաքելությամբ։
Հունվարի 29-ին Երեւանի Սուրբ Աննա եկեղեցու տարածքում գտնվող Հայ եկեղեցու համաշխարհային երիտասարդաց միավորման շենքում տեղի ունեցավ բարեգործական միջոցառում։ Հայ առաքելական եկեղեցու Գերմանիայի թեմը ձեռնարկել է նյութական աջակցություն Արցախի Շուշիի շրջանից տեղահանված եւ ՀՀ տեղափոխված, ինչպես նաեւ հերոսական Բերդաձորում, Լիսագոր գյուղում բնակվող մեր հայրենակիցների համար։ Այժմ Շուշիի շրջանից տեղահանված եւ ՀՀ-ում բնակվող բազմազավակ, զոհված եւ վիրավոր զինվորականների ընտանիքների համար գերմանահայերը հատկացրել են աջակցություն սննդի եւ հիգիենայի պարագաների տեսքով։ Օժանդակությունը հատկացնում էր տեր Տիրատուր քահանա Սարդարյանը։ Ներկա էր նաեւ Արցախի նախագահի՝ սփյուռքի հարցերով խորհրդական Ազատուհի Սիմոնյանը։ Ներկայումս ՀՀ տարբեր մարզերում բնակվում է շուշեցի 15 բազմազավակ ընտանիք, որից մեկը՝ Քարինտակից, մնացածը՝ Շուշի քաղաքից։ Բոլոր ընտանիքներն իրենց հասանելիքն ստացան։
Արցախյան վերջին՝ 44-օրյա պատերազմի ընթացքում Շուշիի շրջանից (ք. Շուշի եւ Քարինտակ) ներկայացված է 14 զոհվածի՝ ժամկետային, կամավորական, աշխարհազորային, պահեստազորային ընտանիք։ Վիրավորները 11 հոգի են, կա նաեւ 1 անհայտ կորած։ Երեւանում աջակցություն հատկացվեց 41 ընտանիքի։ Շուշի քաղաքից Արթուր Ղուլյանը վիրավորվել է պատերազմի ընթացքում, ունի 2 երեխա։ Այժմ բնակվում են Երեւանում՝ վարձով։ Ինքը չի աշխատում, ուսուցչուհի կինը ժամանակավոր դասաժամեր ունի։ Գրիգորի եւ Անուշ Առուստամյաններն ունեն 4 դուստր, ավագը՝ Մարիան, 12 տարեկան է։ Լիլիթ եւ Տաթեւիկ քույրիկների եւ բարեկամուհու հետ էին եկել իրենց հասանելիքը տանելու։ Բնակվում են Երեւանում։ Ծնողներն ինչ-որ գործով գնացել են Ստեփանակերտ։ Գեղեցկուհի աղջնակները կարոտում են իրենց տանը, սիրելի քաղաքին։ Բոլորն էլ տեր Տիրատուրի կողմից ստացան նաեւ Նոր Կտակարան ու օրհնանք։ Գոհ են մեր հայրենակիցները Գերմանիայի հայ համայնքից, որ ինչ-որ ձեւով օժանդակում է իրենց։ Ամենակարեւորը սփյուռք-Արցախ-մայր հայրենիք կապն է։ Դժվար է հատկապես անմահ հերոսների հարազատների համար։ Քարինտակից Արցախյան առաջին գոյամարտի մասնակից, Քարինտակի 1992 թ. հունվարի 26-ի հերոսամարտին քաջաբար մասնակցած Արթուր Առաքելյանը, ով արժանացել էր «Մարտական խաչ» երկրորդ աստիճանի շքանշանի, հերոսաբար նահատակվեց որդու՝ Կամոյի հետ, Քարինտակի մատույցներում 2020 թ. հոկտեմբերի 29-ին։ Այժմ նրանց ընտանիքները բնակվում են Արարատի մարզում՝ Մասիսի տարածաշրջանի Սայաթ-Նովա գյուղում։
Երեւանում բնակվող որոշ ընտանիքների համար նախատեսած աջակցությունը որոշված էր հատկացնել բնակարաններում՝ պայմաններին ծանոթանալու նպատակով։ Ընթացքում տեր Տիրատուրն ու Ա. Սիմոնյանը զրուցում էին շուշեցիների հետ, հետաքրքրվում նրանց վիճակով, որպեսզի կարողանան աջակցել հատկապես աշխատանքի տեղավորման հարցում։ Ներկայացնելով ծրագիրը՝ տեր Տիրատուրն ասաց. «Ծրագիրը կոչվում է «Սուրբ Ծննդյան հույս», ունի հույսի գաղափար, որ մարդիկ իրենց միայնակ չզգան։ Արդեն 10 տարի է՝ Սուրբ Ծննդյան տոնից առաջ եւ հետո մենք գալիս ենք Հայաստան եւ այցելում կարիքավոր ընտանիքների՝ բերելով Հույսի լուրը, որ իրենք մենակ չեն, կան մարդիկ՝ իրենց համար մտածում ու աղոթում են եւ ներկայանում փոքրիկ նվերներով։ Սա հատկապես լավ առիթ է սփյուռքում եւ մայր հայրենիքում բնակվող մեր հայրենակիցներին միմյանց հետ կապելու։ Այս տարի որոշեցինք օժանդակությունը հատկացնել արցախցիներին։ Նվիրատվությունները հավաքվում են այնտեղի մեր համայնքի անդամների կողմից, եւ Գերմանիայի ՀԱԵ թեմի առաջնորդարանի ու այստեղի թեմերի հետ որոշվում է՝ ում հատկացնել»։
Այն հարցին՝ ինչու են որոշել հատկապես Շուշիի շրջանի բնակիչներին այս անգամ հատկացնել աջակցություն, տեր Տիրատուրը պատասխանեց՝ դա Արցախի նախագահի՝ սփյուռքի հարցերով խորհրդական Ազատուհի Սիմոնյանի հետ են որոշել։ Հատկապես կարեւորեց այն, որ Բերդաձորի ենթաշրջանում այսօր էլ բնակվում են մեր հայրենակիցները, չեն լքել իրենց տները։ Նախատեսված է այցելություն Արցախ։ Այդ ընթացքում տեր Տիրատուրն ու նրան ուղեկցողները կայցելեն Բերդաձորի գյուղեր եւ տեղում կհանձնեն աջակցությունը։ Ծանոթանալով բնակչության խնդիրներին՝ կփորձեն հնարավոր օգնություն ցուցաբերել հետագայում։ Բայց ամենակարեւորը դարձյալ Հույսի արթնացումն է, որ բերդաձորցիները միայնակ չեն։ Ազատուհի Սիմոնյանը, ներկայացնելով Գերմանիայի հայոց թեմի գործունեությունը մայր հայրենիքում, ասաց. «Բազում անգամ են գերմանահայերն օժանդակել հայրենիքին, հատկապես՝ Արցախին, ինչպես 44-օրյա պատերազմի ընթացքում ու հետագայում, դրանից առաջ։ Վերջերս Բերդաձորի ենթաշրջանի գյուղերի բոլոր ընտանիքներին հատկացրել են 3-ական գառ՝ ընդհանուր՝ 300։ Թեմի աջակցությամբ տպագրվել է «Շուշի» գիրքը։ Գերմանիայի թեմի առաջնորդի օժանդակությամբ Ստեփանակերտի Ք. Քոքսի անվան վերականգնողական կենտրոնին հատկացվել է գույք։ Սա հերթական ծրագիրն է, եւ համատեղ ենք որոշել հատկացումը Շուշիի շրջանի բնակչությանը, ովքեր բնակվում են մեր հայրենիքի 2 հատվածում։ Առաջնահերթությունը տրվել է զոհված, վիրավոր զինծառայողների եւ բազմազավակ ընտանիքներին»։
