Հայ հեղափոխական դաշնակցություն կուսակցությունն իր հսկայական ավանդով, Հայաստանի, Արցախի եւ սփյուռքի կյանքում ունեցած ուրույն դերակատարմամբ փետրվարի 5-ին մեծ հանդիսավորությամբ նշեց 131-ամյակը: Պաշտոնական հանդիսությանը ներկա էին Հայաստանի ու Արցախի քաղաքական, հասարակական գործիչներ, հոգեւոր դասի ներկայացուցիչներ: Միջոցառման բացման արարողությունն սկսվեց մեկ րոպե լռությամբ` ի հիշատակ հայրենիքի համար կյանքը չխնայած հերոսների: Դրան հետեւեց կուսակցության մասին պատմավավերագրական ֆիլմի ցուցադրությունը:
ՀՅԴ Հայաստանի գերագույն մարմնի ներկայացուցիչ Իշխան Սաղաթելյանն իր ելույթում առանձնահատուկ շեշտեց չարված գործերի մասին բարձրաձայնելու անհրաժեշտությունը եւ արդեն արված գործերի արդյունքների ամփոփման կարեւորությունը: «Առիթ է նաեւ հանրայնացնելու Դաշնակցության մոտեցումները եւ տեսակետները առանցքային հարցի վերաբերյալ: 1890 թվականին հիմք դրվեց մի կազմակերպության, որին վճռորոշ դեր էր վիճակվել կատարել հայ ժողովրդի պատմության մեջ: Դաշնակցության պատմությունն անհնար է տարանջատել հայ ժողովրդի պատմությունից: Պայքարի ու նվիրումի անմնացորդ 131 տարիների ընթացքում Դաշնակցությունը հավատարիմ է մնացել իր առաքելությանը՝ ծառայել Հայաստանի ու հայության ազատագրության դատին»,- նշեց Իշխան Սաղաթելյանն իր ելույթում:
ՀՅԴ կուսակցության ներկայացուցիչների ելույթների առանցքը արցախյան հիմնախնդիրն էր. Հայ հեղափոխական դաշնակցության բյուրոյի ներկայացուցիչ Հակոբ Տեր-Խաչատրյանն իր խոսքում նշեց, որ իրենց մշտական ուշադրության կենտրոնում է Արցախը: Պատերազմից հետո կուսակցությունը լծվել է Արցախի վերականգնման աշխատանքներին, սակայն արդարության վերականգնման համար դեռ շատ անելիքներ կան:
Հանդիսության ընթացքում ելույթ ունեցող կուսակիցներն անդրադարձան նաեւ հայ-թուրքական հարաբերությունների կարգավորման նպատակով սկսված բանակցային գործընթացին: Հատուկ ընդգծվեցին հայ ժողովրդի կողմից նախապայմաններով հարաբերությունների հաստատման առաջնահերթությունը եւ որեւէ պարտադրանքի բացառումը:
