Միանալով մայրաքաղաք Ստեփանակերտում գործող «Թումո» ստեղծարար տեխնոլոգիաների կենտրոնին՝ Մարտակերտում բացված առաջին «Թումո տուփի» շրջանառությամբ Արցախում ազդարարվեց կրթական ծրագրերի ընդլայնման գործընթացի սկիզբը:
«Սա մեր վստահ քայլերից մեկն է, որ ձեռնարկել ենք Արցախի պատանիների ու երիտասարդների համար,- Մարտակերտ քաղաքում կայացած հանդիսավոր միջոցառմանը հայտարարել է «Թումոյի» տնօրեն Մարի Լու Փափազյանը:- Ճանաչելով ու սիրելով Արցախը, այստեղ սովորող երիտասարդությանը՝ համոզված եմ, որ նորաբաց «Թումո տուփը» կընդլայնի պատանիների եւ աղջիկների ներգրավվածությունմ ուսուցման ծրագրերին, կնպաստի տեխնոլոգիաների եւ դիզայնի ոլորտներում հմտանալու արվեստին»: Ապա հավելել է, որ առաջիկայում «Թումո-Հայաստան» նախագծի շրջանակներում «տուփեր» կբացվեն նաեւ Մարտունի եւ Ասկերան քաղաքներում՝ ամրապնդելով կենտրոնի նյութատեխնիկական բազան, կձեռնարկվեն համալիր այնպիսի միջոցառումներ, որպեսզի կրթական ծրագրերը հասանելի լինեն երիտասարդներին:
Բարձր գնահատելով «Թումո» ստեղծարար տեխնոլոգիաների կենտրոնի, Հայկական բարեգործական ընդհանուր միության եւ ԱՀ կառավարության համագործակցությամբ մեկնարկած նոր ծրագրերը՝ պետական նախարար Արտակ Բեգլարյանը համոզմունք է հայտնել, որ «տեխնոլոգիական կրթության շրջանակների ընդլայնումը պատանիներին հնարավորություն կտա ստանալու լիարժեք գիտելիքներ եւ կյանքի կոչել ապագային միտված ծրագրերը»:
Տիկին Փափազյանի հավաստմամբ՝ փոքր «տուփերի» միջոցով տեխնոլոգիական ուսուցումը հասանելի կդառնա նաեւ փոքր համայնքների պատանիներին, եւ «նրանք ստիպված չեն լինի 2.5 ժամ ճանապարհ կտրել Մարտակերտից Ստեփանակերտ հասնելու համար»: Բնականաբար, պարապմունքներին կարող են մասնակցել ոչ միայն Մարտակերտ քաղաքի, այլ նաեւ շրջակա բնակավայրերի սովորողները, որոնց երթեւեկելու համար բարեգործական խողովակներով կհատկացվեն տրանսպորտային միջոցներ:
Հատկանշական է, որ մուտք գործելով Արցախ՝ 2015-ից սկսած, 7 տարվա ընթացքում «Թումոն» Հայկական բարեգործական ընդհանուր միության աջակցությամբ կրթել է 6 հազարից ավելի ուսանողների, վարել գրեթե 300 դասընթաց՝ աշխատարար ավելի քան 100 դասընթացների ընդգրկմամբ: «Թումոյի» ծրագրին հետեւելու համար, որը ներառում է 14 ոլորտ, միայն Մարտակերտից շաբաթվա կտրվածքով Ստեփանակերտ են ժամանում 300-350 սովորողներ, ովքեր մեծամասամբ հետաքրքրված են տեխնոլոգիաների եւ դիզայնի գիտելիքների խորացմամբ: Այստեղ նրանք մասնակցում են տարբեր նախագծերի՝ գործնական պարապմունքներում ձեռք բերելով փորձ եւ հմտություն:
Տեխնոլոգիական կրթության խրախուսումը համարելով Արցախի կառավարության առաջնահերթություններից մեկը՝ պետնախարար Արտակ Բեգլարյանը կարեւորում է «Թումոյի» առաքելությունը եւ վստահաբար ողջունում «մայր կառույցի» կողմից «Թումո տուփերի» բացման գործընթացը՝ նոր համայնքների ընդգրկմամբ: Ծրագրի փորձառական նշանակությունը երիտասարդ սերնդի համար կարեւորում է նա եւ կրթության, գիտության, մշակույթի եւ սպորտի նորանշանակ նախարար Անահիտ Հակոբյանը, ով կարծում է, որ ստեղծարար տեխնոլոգիաներն այսօր շատ են անհրաժեշտ պատերազմի հետեւանքները հաղթահարող, «բարդ ու դժվարին ժամանակների խաչմերուկում հայտնված» երիտասարդներին, որոնք ուսման ծարավը կարող են հագեցնել եւ «Թումո» կենտրոնի կողմից կազմակերպվող արդյունավետ դասընթացների միջոցով: Իսկ որ ուսուցման փուլերը պիտի ապահովվեն «տուփերի» միջոցով ու դրանք հասանելի լինեն նաեւ փոքր համայնքներին, դրանում համոզված են կրթական համակարգի բոլոր պատասխանատուները:
