Վանաձորի պետական համալսարանի դասախոս, խմբավար Սերգեյ Հարությունյանի ստեղծագործական բեղմնավոր գործունեությունն արժանվույնս գնահատվեց. համալսարանի գիտխորհրդի որոշմամբ նրան շնորհվեց պրոֆեսորի կոչում, իսկ ՀՀ բարձրագույն որակավորման կոմիտեն հաստատեց այդ որոշումը: Հիմա մաեստրոն Լոռիում առաջին երաժիշտն է, որ կրում է պատվավոր պրոֆեսորի կոչումը:
Սերգեյ Հարությունյանն իր գործունեությունն սկսել է 1977 թ. Երեւանի Կոմիտասի անվան կոնսերվատորիայի խմբավարական բաժինն ավարտելուց հետո, հայրենի քաղաք Վանաձորում՝ մանկավարժ-խմբավար, հանրակրթական եւ երաժշտական դպրոցներում լծվելով մատաղ սերնդի գեղագիտական դաստիարակության նվիրական գործին: Այդ տարիներին էլ նա դառնում է առաջին, հիրավի, շրջադարձային նորամուծության հեղինակը. մինչ այդ ընդունված մանկական եւ կատակ երգերը նա փոխարինում է Նարեկացու, Շնորհալու, Եկմալյանի եւ մեծն Կոմիտասի հոգեզմայլ երգերով, շարականներով: Այդ նրա շնորհիվ նաեւ իր գոյությունը դժվարին տարիներին պահպանեց Մարգահովիտ գյուղի երաժշտական դպրոցը, որի տնօրեն նշանակվել էր 1983 թ.:
Ավելին, 2001 թ. գյուղական երաժշտական հիշյալ դպրոցը դարձավ արվեստի դպրոց: Իսկ հայրենի քաղաքում ստեղծեց իր առաջին քառաձայն «Երիտասարդական» երգչախումբը, որի կազմը բաղկացած էր կամավոր սկզբունքով ընդգրկված սիրողական երգիչներից: Նորաստեղծ խմբի կատարողական որակն այնքան բարձր էր, որ համերգներով հանդես եկան ոչ միայն մեր, այլեւ արտասահմանյան երկրներում, մասնակցեցին նաեւ մրցույթ-փառատոների: 1997 թ. նա ստանձնում է ՎՊՄԻ-ի արվեստի ամբիոնի խմբավար-դասախոսի գործը, հիմնում է «Բիայնա» երգչախումբը, մասնակցում Գյումրիում կայացած «Վերածնունդ» միջազգային մրցույթ-փառատոնին եւ նվաճում առաջին կարգի մրցանակը: Առանձնահատուկ գնահատանքի է արժանի նրա ծառայությունը Կոմիտասի ստեղծագործական ժառանգության հանրահռչակման գործում: Երաժշտագետը հեղինակել եւ հրապարակել է Կոմիտասի երգերի մի ժողովածու, որտեղ յուրօրինակ մատուցմամբ կատարել է 24 ստեղծագործությունների փոխադրումներ՝ իգական եռաձայն եւ քառաձայն երգչախմբերի համար՝ անաղարտ պահելով Կոմիտասի երաժշտական ոգին: Իր կյանքում նա համատեղել է նաեւ աշխարհիկն ու հոգեւորը:
2002 թ. շնորհաշատ հայորդին հավաքում է շնորհալի մանուկների եւ Գուգարաց թեմում հիմնում «Սբ Տիրամայր» երգչախումբը, որի կատարողական արվեստի որակը, մասնագետների վկայմամբ, գնահատանքի է արժանի ոչ միայն հոգեւոր, այլեւ աշխարհիկ կտրվածքով: Վանաձորի քաղաքապետարանի աջակցությամբ երգչախումբը համերգներով հաջողությամբ հանդես է եկել ԱՄՆ Փասադենա, Մոնտեբելո, Գլենդել քաղաքներում: Թեմակալ առաջնորդի օրհնությամբ մաեստրոն 2004 թ. հիմնադրում է նաեւ արական երգչախումբ, որը 2013-ին, ձուլվելով «Սբ Տիրամայր» երգչախմբին, վերածվում է երկսեռ քառաձայն երգչախմբի: Այս նոր երգչախումբը մինչեւ օրս մասնակցում է պատարագների մատուցմանը Գուգարաց թեմում՝ Վանաձորի Սբ Աստվածածին եկեղեցում:
Գագիկ ԱՆՏՈՆՅԱՆ
Լոռի
