Հայտնի մուլտհերոսների հետ

Ամանորի եւ Սուրբ ծննդյան տոների առթիվ «Թովմասյան հիմնադրամի» եւ «Հայը կա» հասարակական կազմակերպության նախաձեռնությամբ հունվարի 8-ին Երեւանում՝ «ԴՎԻՆ Մյուզիք Հոլ»-ում, տեղի ունեցավ «Դեպի մեծ երազանքներ» հեքիաթ-ներկայացումը։ Ծնողների, հարազատների, ուսուցիչների ուղեկցությամբ՝ ներկա էին տարբեր խոցելի խմբերում գտնվող երեխաներ Երեւանից ու մարզերից։ Մինչ ներկայացման սկսվելը՝ պատանի դերասանները, տարբեր մուլտհերոսների (կատու, մուկ, բադիկ, պինգվին եւ այլն) կերպարանքով, «ԴՎԻՆ Մյուզիք Հոլ»-ի սրահում, որտեղ տեղադրված էր տոնածառը, ներկա երեխաների հետ պարեցին, հանդես եկան իրենց դերերով, լուսանկարվեցին։ Երեխաներին այցի էին եկել նաեւ Ձմեռ պապն ու Ձյունանուշը։ Ներկայացումն սկսվեց դեռեւս 1976-ին նկարահանված «Գտնված երազ» մուլտֆիլմով՝ Ռ. Հախվերդյանի երաժշտությամբ։ Փոքրիկ աղջնակը հեքիաթների գիրքն էր ընթերցում, որը կախարդական էր։ Ու եկավ պապիկը.

-Դու դեռ չե՞ս քնել։ Չէ՞ որ արդեն գիշեր է։

-Պապիկ, այս գրքում այնքան գեղեցիկ թիթեռներ կան։ Դու ամեն ինչ գիտես։ Ասա, որտե՞ղ են նրանք ապրում։

-Քնիր, թոռնիկս։ Հիմա ուշ է։ Թիթեռների մասին ես կպատմեմ վաղը։

-Իսկ դո՞ւ:

-Էհ, թոռնիկս, ես ծերությունից կորցրել եմ քունս։

-Խեղճ պապիկ, մի՞թե քունը կարելի է կորցնել։ Եթե ես կարողանայի գտնել այն։

Այս երխոսությունից հետո աղջնակը, հետեւելով գրքի հեքիաթների՝ կենդանություն առած  թիթեռներին, որոնց դերում պատանի ու մանուկ դերասաններն էին, գնում է գտնելու իր պապիկի կորած քունը։ Ընթացքում բարի աղջկան հանդիպեցին նաեւ հեքիաթային այլ հերոսներ՝ Բիգին եւ ընկերները, Խնկո Ապերի՝ կատվի վզից զանգ կախող մկները, Պույպույ մուկիկը։ Ճառ ասող, սակայն ոչինչ չձեռնարկող «մտածող» մկանը, մյուսներին, ովքեր զանգը կախել չեն համարձակվում՝ վախենալով Կոստան կատվից ու այլ պատճառ են բռնում, որ կաղ են ու տան տեր, խորհուրդ է տալիս մեկ այլ աղջնակ՝ Օման։ Իսկ իր ցեղակիցներին օգնում է արդեն արկածներ սիրող Պույպույը։ Իսկ խելացի ու չարաճճի Պինգվին-Վինը, ով հեռացել էր ծնողներից, փոշմանել արածի համար, երազում էր տուն  դառնալ՝ «Պինգվինաշեն», տեսնել ծնողներին։ Հնչեց նաեւ այս մուլտֆիլմի երգը՝ «Ոտքերով խաչեր եմ անում, գնում եմ, գնում, / Ե՛վ ցերեկը, եւ՛ գիշերը այս օտար երկրում»։

Դահլիճում ներկա երեխաները, դիտելով «Դեպի մեծ երազանքներ» հեքիաթ-մյուզիքլ երաժշտաթատերական շոուն, եւ՛ ուրախ էին, եւ՛ ընկալեցին հեքիաթների հերոսներին, որ պետք է ունենան երազանք ու նպատակ, հավատան դրանց իրականացմանը։ Առավել կարեւորվեց դժվարությունները հաղթահարելու հնարավորությունը՝ միմյանց օգնելով, աջակցելով։ Ներկայացման վերջում երեխաներն ու ավագները ծանոթացան նաեւ հայ թագավորների պատմությանը, նրանց կատարած գործերին։ Այդ ընթացքում պատանի դերասանները հանդես եկան արդեն հայկական ռազմական պարերով։ Այսպիսով՝ երազանքներ իրականացնող Բիգին եւ ընկերները հայկական հայտնի մուլտհերոսների հետ միասին հարթեցին իրենց ճանապարհը դեպի «Երջանկության մոլորակ». աշխարհ, ուր իրականանում են մեր մեծ ու փոքր երազանքները: Կարեւորվեց հատկապես աշխատանքը, որ առանց դրա ոչինչ իրականացնել հնարավոր չէ։ Ներկայացումը համեմված էր նաեւ կատարյալ լուսային էֆեկտներով, նշված մուլտֆիլմերի նկարներով։

Վերջում «Դեպի մեծ երազանքներ» հեքիաթ-մյուզիքլի կազմակերպիչների ներկայացուցիչը դիմեց այն բարերարներին, ովքեր իրենց ներդրումով օժանդակել էին երեխաներին ներկա լինել այս գեղեցիկ շոուին. «Դուք ոչ միայն դիտորդ էիք, ներկայացման մասնակից, այլեւ յուրաքանչյուրդ ձեր ձեռք բերած տոմսով մեծ ներդրում ունեք բարեգործական մի ծրագրում։ Այն է՝ շատ շուտով Հայաստանի մարզերից մեկում կբացվի «Երազանքի կայմ»-ը։ «Թովմասյան» հիմնադրամը եւ «Հայը կա» ընկերությունն իրենց ջանքերը ներդրել են, որպեսզի մարզերի երեխաների կյանքը դարձնեն ավելի հետաքրքիր։ Եվ, շնորհիվ այդ երկու շահույթ չհետապնդող ընկերությունների, մեր մարզի երեխաները կունենան էլ ավելի գունավոր մանկություն»։