Այս օրերին հանրակրթական դպրոցներում, կրթամշակութային այլ կառույցներում կազմակերպվում են տոնական արարողություններ՝ նվիրված նորանկախ Հայաստանի բանակի կազմավորման 31-ամյա տարեդարձին։ Կարեւոր միջոցառումներ, որոնց հիմնական մասնակիցը մատաղ սերունդն է։
Կոմպոզիտոր, ՀԽՍՀ ժողովրդական արտիստ Ավետ Տերտերյանի անվան արվեստի դպրոցը գործում է Երեւանի Դավիթաշեն վարչական շրջանում, ունի 30 տարվա պատմություն։ Օրերս այստեղ կայացավ Հայոց բանակի օրվան նվիրված տոնական ցերեկույթ։ Հանդիսությունների դահլիճը ձեւավորված էր օրվան համահունչ՝ պատերին դպրոցի կերպարվեստի սաների նկարներն էին։ ՀՀ օրհներգի կատարմամբ հանդես եկավ դպրոցի փողային նվագախումբը՝ Արման Պեպանյանի գլխավորությամբ։ Ներկաները հոտնկայս հարգեցին նաեւ Արցախյան գոյամարտի սկզբից մինչ մեր օրերը նահատակված մեր քաջորդիների անմահ հիշատակը։ Արարողությունը վարող Անի Չանախչյանը ողջունեց տոնի մասնակիցներին՝ տեղեկացնելով, որ դահլիճում ներկա են Դավիթաշեն վարչական շրջանի ղեկավար Ռոման Համբարձումյանը, տեղակալ Հրաչյա Հակոբյանը, աշխատակազմի ղեկավար Մխիթար Մարտիրոսյանը, կրթության, մշակույթի եւ սպորտի բաժնի պետ Մարիամ Մկրտչյանը, այլ կառույցների աշխատակիցներ, ՀՀ ԵԿՄ Դավիթաշենի տարածքային բաժանմունքի նախագահ Սարգիս Գրիգորյանը, «Սասունցի Դավիթ» ջոկատի հրամանատար Սամվել Մաթեւոսյանը, ազատամարտիկներ, ծնողներ, հյուրեր, դպրոցի ուսուցչական անձնակազմը՝ տնօրեն Արթուր Հովհաննիսյանի գլխավորությամբ։
Անդրադարձավ հայկական զինված ուժերի կազմավորման պատմությանը՝ հայոց երկրի անվտանգության երաշխավոր կառույցի անցած հերոսական ուղուն՝ մաղթելով այսուհետ միայն հաղթանակներ ու հերոսական ճանապարհ մեր բանակին։ Շնորհավորանքի խոսքով հանդես եկավ Դավիթաշենի վարչական շրջանի ղեկավար Ռ. Համբարձումյանը՝ ասելով, որ բանակը մեր երկրի անվտանգության խորհրդանիշն է։ Եվ չնայած բանակի՝ վերջին պատերազմում կրած պարտությանը՝ Ռ. Համբարձումյանը հավատում է, որ Հայոց բանակը գտնելու է իր փառավոր ճանապարհը։ Փառք տվեց նահատակներին եւ երկիրն այսօր պահող մեր զինվորներին։ Այնուհետեւ համերգային մասով հանդես եկան դպրոցի երաժշտական խմբերի սաները՝ բոլորը զինվորական համազգեստներով։ Վոկալ բաժնի (ուսուցիչ՝ Շահանե Չալյան) սաների կողմից հնչեցին ռազմահայրենասիրական երգեր պատանի երգիչների կողմից։ Ոգեւորիչ էին պատանի կատարողների երգերը՝ «Սահմանին…», «Գինի լի՛ց…» եւ այլն։ Ավետ Բարսեղյանի խոսքերով եւ երջանկահիշատակ Արթուր Գրիգորյանի երաժշտությամբ «Կյանք ու կռիվ» երգը հնչեց խմբի կողմից։
Ամբողջ դահլիճը հուզվեց, շատերի աչքերին արցունքներ կային։ Մարտական ընկերներ կորցրած ազատամարտիկ-զինվորականները հիշեցին իրենց անցած ճանապարհը մարտադաշտում։ Դասական վոկալի սան Արամե Հունանյանի կողմից հնչեց «Մարտիկի երգը»՝ հիանալի մատուցմամբ։ Արվեստի դպրոցի սաները հանդես եկան նաեւ թատերական ներկայացումով (ղեկավար՝ Լուսինե Արշակյան)։ Մարտադաշտում զինվորները հայրենի երկրի սահմանն են պաշտպանում, հերոսանում, վիրավորվում, նահատակվում, իսկ տանը նրանց մայրերը որդիների նամակներն են ընթերցում եւ հավատով սպասում՝ հերոս տղան տուն է գալու։ «Վեր կա՛ց, եղբայր…» երգը Սյուզիի կողմից հնչեց Կարինեի կիթառի ու դաշնամուրի հնչյունների ուղեկցությամբ։ Դաշնակահար Հասմիկ Գրիգորյանը երկար տարիներ բնակվում էր Արցախի Քաշաթաղի շրջկենտրոն Բերձորում եւ դաշնամուր էր դասավանդում այդ քաղաքի երաժշտական դպրոցում։ Արցախյան 44-օրյա պատերազմից հետո Բերձորն էլ մնաց թշնամու տիրապետության տակ, եւ Հ. Գրիգորյանն էլ շատերի նման տեղափոխվել է Երեւան։ Բերձորում նա ղեկավարում էր նաեւ Սուրբ Համբարձման եկեղեցու երգչախումբը, որը 2022 թ. օգոստոսի 18-ին նրա գլխավորությամբ նույն սրբատանը վերջին անգամ շարական ու տաղեր երգեց սուրբ պատարագի ընթացքում։ Ժողնվագարանների համույթը հանդես եկավ Գագիկ Դանիելյանի ղեկավարությամբ։ Համերգն ավարտվեց, եւ դպրոցի սաները ներկաների ծափերի տակ բեմ բարձրացան։ Նրանց ելույթը ողջունեց, ներկաներին շնորհավորեց ու Համո Սահյանի բանաստեղծությամբ հանդես եկավ ճանաչված հաղորդավար, դերասան Արսեն Ղազարյանը։
