Լոռեցիները տոնականորեն նշեցին մեր ժողովրդի մեծանուն զավակ, հայ եւ բուլղար ժողովուրդների ազգային հերոս, անպարտելի Զորավար Անդրանիկ Օզանյանի ծննդյան 158-ամյակը: Փետրվարի 25-ին Վանաձորի կենտրոնական հատվածում զորավարի բրոնզաձույլ հոյակերտ արձանի մոտ էին հավաքվել անդրանիկասեր հայորդիներ՝ դպրոցականներ, ուսանողներ, ուսուցիչներ ու դասախոսներ, ՀԿ-ների եւ այլ կազմակերպությունների ներկայացուցիչներ, ազատամարտիկներ, հյուրեր արտերկրից, Երեւանից եւ այլ համայնքներից: Նրանց հետաքրքիր անակնկալ էր սպասվում. ունկնդրեցին առաջին անգամ հնչեցվող «Հայաստան» վերտառությամբ երգը, որի տեքստը գրող, գրականագետ Կարո Վարդանյանը տարիներ առաջ հյուսել է Խորհրդային Հայաստանի օրհներգի համար գրված երաժշտության չափով: Երգը մատուցեցին Վանաձորի պետական համալսարանի պրոֆեսոր, հայտնի երաժշտագետ, խմբավար Սերգեյ Հարությունյանի ղեկավարած «Բիայնա» երգչախմբի կատարողները: Նախաձեռնության հեղինակը «Ինտերկապ» ԲԿ-ի նախագահ, Վանաձորի պատվավոր քաղաքացի Նորայր Զուլոյանն է:
Բոլորին հետաքրքրեց Վանաձորի գլխավոր ճարտարապետ Սուրեն Աբովյանի պատմությունն այն մասին, թե ինչպես հաղթահարվեցին բազում դժվարությունները, երբ համաժողովրդական նվիրատվությունների շնորհիվ երիտասարդ քանդակագործ Գեղամ Բեգջանյանը կերտեց զորավարի առաջին բրոնզաձույլ արձանը, եւ բարեկարգման աշխատանքներից հետո այն տեղադրվեց զորավարի անունը կրող փողոցի սկզբնամասում: Շեշտեց նաեւ, որ այդ նախաձեռնության հեղինակը դարձյալ Ն. Զուլոյանն է:
Ներկաներն ուշի ուշով ունկնդրեցին Կարո Վարդանյանի ելույթը, ով խորապես փաստարկված գնահատականներով արժեւորեց աննկուն Զորավարի գործունեությունը, նրա ունեցած վիթխարի դերն ու նշանակությունը հայոց պատմության դժվարին ու ծանր ժամանակահատվածներում: «Այո,- նկատում է նա,-օրհասական պահերին Աստված մեզ միայնակ չթողեց, պարգեւեց մի զորավոր զորավար, ով հասարակ գեղջուկի ձեռքը բահի փոխարեն սուր դրեց եւ սովորեցրեց կռվել ու հաղթել «անպարտելի» թշնամիներին: Բանախոսը հանգամանալից ներկայացրեց նաեւ երկու Մեծերի՝ Հայաստանի արեւմտյան եւ արեւելյան մասերի «հայրերի»՝ Անդրանիկի եւ Հովհաննես Թումանյանի եղբայրության, բարեկամության ու անքակտելի դաշինքի մասին` վստահեցնելով, որ այդ փաստը այսօր էլ մեծ խորհուրդ ունի մեր պատմության այս հերթական դժվարին պայմաններում: Ահա ինչու մեր տոնացույցի ամենակարեւոր տոները մենք պիտի համարենք նաեւ նրանց ծննդյան օրերը (երկուսն էլ ծնվել են փետրվար ամսին) եւ առաջ շարժվենք այդ Մեծերի՝ ազգին փոխանցած պատվիրաններով:
Ապա ելույթներ ունեցան Վանաձորի թիվ 8 դպրոցի 5-րդ դասարանի աշակերտները: Ավարտից հետո ներկաները հրավիրվեցին երկաթուղայինների «Լոռի» ժամանցի կենտրոնի դահլիճ, որտեղ ցուցադրվեց «Զարավար Անդրանիկը եւ Հայաստանի առաջին Հանրապետության ծագումը» պատմափաստագրական ֆիլմը: Այս նախաձեռնության հեղինակն էլ «Ողջ մնալու արվեստը» ռազմահայրենասիրական ՀԿ-ն է, որը «Ինտերկապ» ԲԿ-ի, Երկրապահ կամավորականների միության Լոռու մարզային, Վանաձորի քաղաքային կառույցների հետ համագործակցությամբ՝ իր լուման ունեցավ Զորավարի ծննդյան օրը արժանավայել նշելու գործում:
Գագիկ ԱՆՏՈՆՅԱՆ
Լոռի
