Հայաստանի գեղարվեստի պետական ակադեմիայի կենտրոնական մասնաշենքի մոտ տեղի ունեցավ իտալացի նկարիչ Անտոնիո Պեռռոտտայի մեծանկար ստեղծագործության` որմնանկարի հանդիսավոր բացումը։ Նախագիծն իրականացվել է Հայաստանում Իտալիայի դեսպանության աջակցությամբ, «Erevan Street Art Fest» նախագծի շրջանակներում։ Ակադեմիայի ռեկտորի ժամանակավոր պաշտոնակատար Միքայել Այվազյանի խոսքով՝ «Street Art» նախագիծը Հայաստանում այնքան էլ զարգացած չէ, եւ հույս հայտնեց, որ իտալացի մեծ արվեստագետի աշխատանքը խթան կդառնա ոչ միայն Երեւանում, այլեւ մարզերում արվեստի այս ճյուղի զարգացման համար:
Գաղափարի հեղինակ եւ կազմակերպիչ Դավիթ Խաչատրյանը խոսեց մեծանկար ստեղծագործության իրականացման ընթացքում ծագած բարդությունների, Հայաստանում արվեստի այս տեսակի մուտքի, նախագիծը մարզերում իրականացնելու եւ նկարչի պրոֆեսիոնալիզմի մասին: Նրա խոսքով՝ դեռ տարիներ առաջ է միտքը ծագել` իրականացնել «Մուրալիզմի» ուղղությամբ արվեստի զարգացումը, եւ այսօր այս նախագծի շրջանակներում այն կայացած է։
«Արվեստի ոլորտի ներկայացուցիչների կողմից որքան ուզում է՝ փայլուն մտքեր լինեն, միեւնույն է, այն մնում է թերի կամ կիսատ, երբ չկան օգնության պատրաստ ձեռքեր: Բարեբախտաբար, այս անգամ մենք չբախվեցինք այդ խնդրին եւ իսկապես մեծ ու շոշափելի արդյունք ունեցանք»,-նշեց Դավիթ Խաչատրյանը:
Հայաստանում Իտալիայի դեսպան Ալֆոնսո Դի Րիզոն ներկա հյուրերի համար բացահայտեց, որ մի քանի ամիս առաջ է նամակի միջոցով ծանոթացել նախագծին եւ առանց վարանելու իր համաձայնությունն է տվել՝ վստահություն հայտնելով, որ այն մեծ դիտելիություն է ապահովելու: Դեսպանը կարծում է, որ այն չի կարող կարծրացած մնալ միայն Երեւանի ներսում, պետք է նման միջոցառումներ իրականացվեն նաեւ մարզերում` առաջին հերթին արվեստի զարգացումն ապահովելու համար:
Անտոնիո Պեռռոտտայի նկարում ներկայացված են չորս կերպարներ, որոնցից առաջինը հենց արվեստագետն է` ձեռքի մեջ վրձին. նկարի կենտրոնական հատվածում Պեռռոտտան պատկերել է հունական աստվածուհի Դեմետրային, աջ կողմում Միքելանջելոյի Դավիթի դեմքն է, իսկ ձախ կողմում` Նապոլեոն Բոնապարտի քրոջ` Կարոլինա Բոնապարտի պատկերը:
«Երբ հայտնվում ես օտար երկրում որպես արվեստագետ, քեզ համար առաջին հերթին բացահայտում ես այդ երկրի մշակույթն ու մարդկանց եւ նրանց տածած սերն արվեստի նկատմամբ: Այս օրերի ընթացքում ինձ շատ էին հանդիպում տարբեր մարդիկ եւ իրենց հիացմունքն արտահայտում նկարի հաջողված լինելու վերաբերյալ: Ցանկությունս մեծ է, որ ակադեմիայի ուսանողները եւս իրենց ուսումնառության տարիներին իրականացնեն այսպիսի նախագծեր: Հեշտ ոչինչ չի տրվում. այսպիսի աշխատանքներ ես նույնպես իրականացրել եմ ակադեմիայում սովորելու տարիներին: Ճիշտ է՝ ես մեծ ստեղծագործություն եմ թողնում Երեւանում, բայց քաղաքի մի մասը կտանեմ ինձ հետ»,- նշեց Անտոնիո Պեռռոտտան:
Իտալացի նկարիչը նաեւ հույս հայտնեց, որ ապագայում եւս մեկ անգամ կլինի Հայաստանում ոչ որպես արվեստագետ, այլ հասարակ զբոսաշրջիկ` սեփական աչքերով Հայաստանը բացահայտելու համար:
Սյուզի ԴԱՎԹՅԱՆ, Լիլիթ ՄՈՒՐԱԴՅԱՆ
ՀՊՄՀ 2-րդ կուրսի ուսանողուհիներ
