Ավելի քան 3 մլրդ դրամ է կազմում Կարկառ գետի վրա Ասկերանի շրջակայքում կառուցվող ջրամբարի արժեքը, որի շահագործման պարագայում շուրջ 2 հազար հեկտար այգիներ եւ ցանքատարածքներ ոռոգման հնարավորություն կունենան:
44-օրյա պատերազմի հետեւանքով Ասկերանի շրջանի մեկ տասնյակի հասնող համայնքներ զրկվել են ոռոգման ջրից: Թշնամու հսկողության տակ են անցել գյուղատնտեսական նշանակության հողերը սնուցող ջրանցքները: Հատկապես դժվարին իրավիճակում են հայտնվել Նախիջեւանիկի ենթաշրջանի տնտեսությունները, որոնց սեփականատերերի հիմնական զբաղմունքը այգեգործությունն ու հացագործությունն են, անասնապահությունը: Վերջին տարիներին այստեղ հիմնադրված նռան եւ խաղողի այգիները գրեթե մնացել են անջրդի: Ջրի սակավության պատճառով լիարժեք չի ոռոգվում նաեւ Նախիջեւանիկում տարեսկզբին հիմնադրված մոտ հարյուր հեկտարի հասնող խաղողայգին: Իսկ գաղտնիք չէ, որ սահմանամերձ բնակավայրերում ներդրումներ կատարելը ռիսկի հետ է կապված, եւ անվտանգության երաշխիքներ են պահանջվում:
«Ջրային տնտեսություն» ՓԲԸ գլխավոր տնօրեն Գեորգի Հայրիյանի խոսքով, մեկնարկած ծրագիրն ավարտին հասցնելուց հետո ոռոգովի կդարձվեն ոչ միայն Նախիջեւանիկի ենթաշրջանի, այլեւ Խրամորթի, Խանապատի եւ մի շարք համայնքների ցանքատարածքներ եւ այգիներ: «Պոմպակայանի միջոցով Կարկառի ջուրը 1200 մ տրամաչափի խողովակներով կհասնի Նախիջեւանիկի բարձունքը: Իսկ տեղանքից ինքնահոս կերպով վայրկյանում շուրջ 320 լիտր ջուր կհասնի սահմանամերձ դաշտեր ու այգիներ: Ջրավազանից կօգտվեն նաեւ Ասկերանին հարող տարածքների, Խանապատի եւ Խրամորթի հողօգտագործողները»,- ասում է Գ. Հայրիյանը՝ վստահեցնելով, թե մինչեւ տարեվերջ ջրամբարի շինարարական աշխատանքների առաջին փուլը կհասցվի ավարտին:
Ըստ գլխավոր տնօրենի, 1 մլրդ դրամ կծախսվի ներքին ջրատար ցանցի կառուցման եւ կահավորման համար: Իսկ որ աշխատուժի պակաս չի զգացվում, եւ սահմանված ժամկետներում շահագործվելու է Կարկառի ջրամբարը, դրանում ոչ մի կասկած չի կարող լինել: Միայն «հիշյալ հարթակում» ջրատարի վրա 7 շինկազմակերպություն է աշխատում:
Գյուղոլորտի պատասխանատուները բավական արդյունավետ եւ աշխատատար գնահատելով ծրագիրը, համոզված են, որ Ասկերանի շրջանում արտադրվող գյուղատնտեսական մթերքների տեսակարար կշռում անհամեմատ աճ է գրանցվելու, եւ ոռոգման շնորհիվ բարձրացվելու է հողի բերքատվությունը: Այդ կարծիքը կիսում է եւ Խանապատի գյուղապետ Սամվել Շահրամանյանը, ով վստահ է, որ ջրամբարից անհրաժեշտ քանակությամբ ջուր ստանալու դեպքում շատերը կցանկանան նոր այգիներ հիմնադրել ու վերականգնել «Խանապատի անուշ խաղողի եւ խինդողնի գինու համբավը»:
