Ստեփանակերտի ջրամատակարարման խնդիրը շարունակում է առաջնահերթ մնալ հանրապետության եւ քաղաքային իշխանությունների համար: Կապված տեւական սաստիկ երաշտի ու տեղումների բացակայության հետ՝ մայրաքաղաքը սնող ջրային պաշարներն անհամեմատ նվազել են: Ոչ բավարար քանակությամբ ջուր է մղվում նաեւ գործող արտեզյան ջրհորներից, ինչի պատճառով մի շարք խիտ բնակեցված թաղամասերում երկրորդ ամիսն է, ինչ ջրանջատումները պարբերական բնույթ են կրում, եւ քաղաքապետարանի կողմից սահմանվել է խիստ ռեժիմ:
Առավել ծանր իրավիճակում են հայտնվել հատկապես 6-րդ գոտու տարածքում բնակվող ընտանիքները, որոնց ամեն օր, գրաֆիկի համաձայն, ջուր են մատակարարում ՆԳՆ արտակարգ իրավիճակների պետական ծառայության եւ Կարմիր խաչի միջազգային կազմակերպության Արցախի գրասենյակի աշխատակիցները: Նրանց կողմից թաղամասերում տեղադրվել են 3-5 տոննա տարողությամբ պլաստիկ բաքեր, եւ մարդիկ առայժմ ստիպված են ,բավարարվելե եղած հնարավորությամբ, մինչեւ քաղաքում կվերականգնվի նորմալ ջրամատակարարումը: Ուշագրավ է այն հանգամանքը, որ արտակարգ պայմաններում բնակչությանը ցուցաբերած առաքելությանը միացել են նաեւ ռուս խաղաղապահները, ովքեր մեծ տարողությամբ մեքենաներով շրջում են թաղամասից թաղամաս եւ ջուր բաժանում բնակիչներին՝ ստանալով երախտիքի եւ շնորհակալական խոսքեր…
Մայրաքաղաքում ստեղծված իրավիճակը ,Ջրմուղ-կոյուղիե ընկերության ղեկավարների եւ համակարգի պատասխանատուների մասնակցությամբ քննարկվել է ինչպես քաղաքապետարանում, այնպես էլ՝ նախագահականում, որտեղ ներկա են գտնվել Երեւանից հրավիրված մասնագետներ: Առաջ են քաշվել խնդրի լուծման մի շարք տարբերակներ, արվել ջրի լրացուցիչ պաշարներ Ստեփանակերտ հասցնելու վերաբերյալ առաջարկություններ: Քննարկումների ժամանակ փորձագետները միանգամայն արդյունավետ եւ հիմնավորված են համարել քաղաքում ներկայումս գործող ջրային համակարգը, որը շահագործման հանձնելուց հետո երբեւէ չի խաթարվել, եւ անցած 10 տարվա ընթացքում ջրամատակարարման տեսանկյունից բնակչությունից դժգոհություններ չեն եղել: Շուշիի տեխնոլոգիական համալսարանի ռեկտոր Հովհաննես Թոքմաջյանը, ով Ստեփանակերտի ջրամատակարարման ծրագրի հեղինակն է, կարծում է, որ բնակչության աճի հանգամանքով պայմանավորված՝ ջրի նկատմամբ պահանջարկն անհամեմատ մեծացել է, իսկ եղանակային անբարենպաստ պայմանները, սաստիկ շոգը եւ տեղումների բացակայությունը լուրջ խնդիրներ են ստեղծել քաղաքային իշխանությունների համար:
,Ջրմուղ-կոյուղիե ընկերության տնօրեն Գագիկ Պողոսյանի համոզմամբ. ,Մինչեւ հորդառատ տեղումներ չլինեն, նշանակալի, դրական փոփոխություն հնարավոր չէ ակնկալել, եւ քաղաքում ջրամատակարարման հարցը շարունակելու է օրախնդիր մնալե: Նրա խոսքերով, ջրանջատումներն առայժմ անխուսափելի են, եւ քայլեր են ձեռնարկվում նախկինում գործող արտեզյան ջրհորները վերագործարկելու ուղղությամբ: Միեւնույն ժամանակ համակարգի պատասխանատուները քաջ գիտակցում են, որ խնդիրն առավել լիարժեք լուծում է պահանջում, եւ պետական աջակցությամբ միայն հնարավոր կլինի նոր ջրատար կառուցել եւ ջրային լրացուցիչ պաշարներ հասցնել Ստեփանակերտ:
Իսկ նման ծրագիր, որ իրականացվում է Արցախի կառավարության եւ ,Հայաստանե համահայկական հիմնադրամի համաֆինանսավորմամբ, արդեն մշակվել ու հավանության է արժանացել երկրի իշխանությունների կողմից: Պատարա (Ասկերանի շրջան) գետի վրա սկսված են նոր ջրամբարի կառուցման աշխատանքները, որի շահագործումը նախատեսվում է 2022-ին: Նախագծողները հավաստիացնում են, որ Պատարայի ջրամբարից մղվող քաղցրահամ ջուրը, միանալով Ստեփանակերտի գլխավոր ջրատարին, լիուլի կհագեցնի բնակչության ծարավը…
