Բաքվում ստեղծվել է թուրքական հրամանատարության հատուկ խումբ, որը ներկայացնելու է Ադրբեջանում Թուրքիայի զինված ուժերը: Ռազմական ներկայության մեծացումը Ադրբեջանում խոսում է այն մասին, որ Անկարան չի բացառում տարածաշրջանում ռազմական գործողությունների վերսկսման հավանականությունը եւ դրանում իր ավելի մեծ ու բացահայտ մասնակցությունը։ Սրանով Թուրքիան ձգտում է ճնշում գործադրել Հայաստանի վրա՝ միաժամանակ դիրքավորվելով դեպի հյուսիս եւ հարավ ուղղություններով։
Առաքելության կազմում են չորս թուրք գեներալներ, իսկ խմբի ղեկավար է նշանակվել Թուրքիայի ցամաքային զորքերի օպերատիվ վարչության պետ, գեներալ-մայոր Բախտիյար Էրսայը: Թուրքական հրամանատարությունը կներկայացնեն նաեւ գեներալ Աբդուլա Գաթիրչին, գեներալ Էնդեր Գյուները, որը կգլխավորի հրամանատարական շտաբը, եւ Բաքվում Թուրքիայի դեսպանության ռազմական կցորդ, գեներալ Զաքարիա Յալչինը: Ի դեպ, Բախտիյար Էրսայն անմիջականորեն ներգրավված էր 2020 թ. Արցախի դեմ ռազմական գործողությունների կազմակերպման մեջ, ըստ որոշ ռազմական աղբյուրների՝ «անձամբ է ղեկավարել» Ադրբեջանի զինված ուժերի գլխավոր շտաբը:
Թուրքիայի ընդլայնվող ազդեցությունն ու ռազմական ներկայությունը կարծես թե այլընտրանք չեն թողնում նաեւ Ադրբեջանին, որպեսզի որպես իրողություն ընդունի հորիզոնականի փոխարեն աստիճանաբար ուղղահայաց դարձող հարաբերությունները։ Այս օրերին Ադրբեջանի պետական հեռուստատեսությունը (AzTV) պատրաստում է «Մենք չենք մոռացել Ղարաբաղը» վավերագրական ֆիլմը, որը, ըստ հեռուստաընկերության սոցիալական մեդիայի եւ հասարակայնության հետ կապերի բաժնի, նվիրված է «ադրբեջանական քաջարի բանակի հաղթանակին՝ գերագույն գլխավոր հրամանատար, նախագահ Իլհամ Ալիեւի ղեկավարությամբ»։ Այս տողերը կարդալիս ակամա հիշում ես մեծն Թումանյանի «Քաջ Նազար» հեքիաթը։ Թեեւ Ադրբեջանի իշխանությունները հանրության շրջանում էյֆորիկ տրամադրությունները պահելու համար ջանք չեն խնայում, սակայն ինչ-որ պահի ստիպված են լինելու առերեսվել իրականությանը։
Թուրքիայի կցորդը դառնալու մասին է վկայում նաեւ այս օրերին միանգամից երեք համատեղ զորավարժությունների անցկացումը: Մեկը Քոնյայում՝ «Sokol TurAz – 2021» ռազմաօդային ուժերի կողմից, եւ մյուսը՝ երկու երկրի հատուկ ջոկատների վարժանքներն Ադրբեջանի կողմից բռնազավթված Քաշաթաղի շրջանում։ Երրորդն էլ՝ «Երեք եղբայր-2021» Թուրքիա-Պակիստան-Ադրբեջան եռակողմ վարժանքներն են, որոնք ընթանում են բռնազավթած տարածքներից դուրս։ Ադրբեջանի եւ Թուրքիայի համատեղ զորավարժությունները Բերձորում խաթարում են անվտանգային միջավայրը եւ ապակայունացնում տարածաշրջանը։ Սա Բաքվի եւ Անկարայի առաջին համատեղ վարժանքներն են անմիջապես Արցախի բռնազավթած տարածքներում, ընդ որում՝ Հայաստանի Հանրապետության եւ Արցախի միջեւ ցամաքային կապն ապահովող Բերձորի միջանցքի անմիջական հարեւանությամբ, որի երկայնքով տեղակայված են ՌԴ խաղաղապահները:
Մյուս կողմից՝ Թուրքիան շարունակում է մեծացնել իր ներգրավվածությունը նաեւ Ադրբեջանի տնտեսության մեջ։ Երեկ Բաքվում մեկնարկել էր Թյուրքալեզու պետությունների համագործակցության խորհրդի (Թյուրքական խորհուրդ) էկոնոմիկայի նախարարների 10-րդ հանդիպումը։ Թուրքիայի առեւտրի նախարար Մեհմեդ Մուշը նշել էր, որ Թուրքիան արտադրական հզորություններ ու ներուժ ունեցող երկիր է, եւ թուրքական ընկերություններն էլ ցանկանում են աշխատել Ադրբեջանի բոլոր ոլորտներում, ինչի համար «նախարարությունները պարտավոր են ստեղծել անհրաժեշտ պայմաններ»: Այս ճանապարհով է ընթանալու Ադրբեջանի տնտեսական նվաճումը, թեեւ թուրք պաշտոնյան ընդգծել էր, որ «երկու երկրների տնտեսությունները չեն մրցում միմյանց հետ, այլ լրացնում են միմյանց»։
