2021 թ. Արցախի Հանրապետության տարբեր, այդ թվում՝ թշնամու տիրապետության տակ անցած բնակավայրերից Երեւանում գործող պետական բուհեր են ընդունվել ավելի քան 100 դիմորդներ։ Արդեն ուսանող արցախցի երիտասարդների հետ սեպտեմբերի 25-ին հանդիպում ունեցավ Արցախի պետնախարար Արտակ Բեգլարյանը։ Հանդիպումը ՀՀ-ում Արցախի Հանրապետության մշտական ներկայացուցչությունում կազմակերպել էր Անուշ Եդիգարյանը։
Հանդիպմանը, որին մասնակցում էր ավելի քան 80 ուսանող, ներկա էր նաեւ ՀՀ-ում Արցախի մշտական ներկայացուցիչ Սերգեյ Ղազարյանը։ Մինչ Ա. Բեգլարյանի այցը՝ ուսանողները ծանոթանում էին միմյանց հետ։ Առավել շատ էին Երեւանի Մ. Հերացու անվան պետական բժշկական համալսարանի ուսանողները։ Երկրորդ տեղում ԵՊՀ ուսանողներն էին: Ընթացքում զրուցեցի ուսանողների հետ։ Մարինա Բաղդասարյանը Ստեփանակերտից է, ուսանում է բժշկական համալսարանի բուժական բաժնի 1-ին կուրսում։ Ավարտելուց հետո վերադառնալու է հայրենի քաղաք։ Ուրախ է. կատարվել է երազանքը, եւ համալսարանն ավարտելուց հետո կկարողանա օգտակար լինել իր երկրին։ Ճարտար քաղաքից Խորեն Օհանյանը Երեւանի ճարտարագիտական համալսարանի ուսանող է՝ էներգետիկայի մասնագետ է դառնալու։ Ասաց՝ անպայման վերադառնալու է հայրենի Ճարտար եւ իր մասնագիտությամբ է աշխատելու։
Քաշաթաղի շրջանից այստեղ էին 5 ուսանող, ովքեր չհասցրեցին 12-րդ դասարանն ավարտել հարազատ դպրոցներում: 3 հոգի՝ Բերձորից՝ Հայկ Դավթյանը, ով ուսանում է բժշկական համալսարանում, Քնարիկ Հակոբյանը՝ ԵՊՀ արեւելագիտության ֆակուլտետի չինարենի բաժնում, Գայանե Ըռքոյանը՝ Երեւանի ճարտարագիտական համալսարանի ճարտարապետության ֆակուլտետում։ Վանիկ Ասոյանն ու Լյուդմիլա Բաբայանը Քարեգահից են։ Լյուդմիլան ԵՊՀ միջազգային հարաբերություններ բաժնի ուսանող է։ Վանիկն այժմ բնակվում է Թալինում եւ ուսանում է ԵՊՀ ֆիզիկայի ֆակուլտետում։ Նա, Հայկը, Գայանեն եւ Քնարիկն ուսանում են անվճար, ընդունվել են բարձր գնահատականներ ստանալով։ Եվ տխուր, եւ ուրախ էին՝ հանդիպել են գրեթե մեկ տարի անց։ Ասկերանի շրջանի Պատարա գյուղի դպրոցում եղել եմ մի քանի անգամ։ Պատարայի ու Բերձորի աշակերտները հաճախ էին հանդիպում՝ մարզական միջոցառումներ, փոխայցեր։ Ուրախալի է՝ Պատարան տեղում է, այստեղ նաեւ քաշաթաղցի ընտանիքներ են բնակություն հաստատել պատերազմի հետեւանքով տեղահանվելուց հետո։ Պատարայի դպրոցի շրջանավարտ Աննա Ավանեսյանը ԵՊՀ է ընդունվել պետպատվերով։ Ասաց՝ անշուշտ վերադառնալու է հայրենիք եւ կաշխատի հարազատ դպրոցում։ Այսօր բնագիտական առարկաների մասնագետների կարիք շատ կա։ Ուսանողների հիմնական մասը պատրաստ է բուհն ավարտելուց հետո Արցախ վերադառնալ, իհարկե, որոշները նպատակ ունեն նաեւ ուսումը շարունակել մագիստրատուրայում, այլ երկրների բուհերում։
Ողջունելով ներկաներին՝ ԱՀ պետնախարար Ա. Բեգլարյանը շնորհավորեց ուսանողներին բուհ ընդունվելու առթիվ եւ կարեւորեց նման հանդիպումները։ Նա նշեց, որ ԱՀ կառավարությունը մշտապես կօժանդակի արցախցի ուսանողներին, որպեսզի հնարավորինս լավ կրթություն ստանան, դառնան պիտանի մասնագետ եւ վերադառնան Արցախ։ Հավաստեց նաեւ՝ կառավարությունը պատրաստ է օգնել արտասահմանյան բուհերում ուսանելու հարցում, իհարկե՝ նրանց, ովքեր կկարողանան լավ սովորել, ձգտել հասնել նպատակին։ Իր օրինակով տեղեկացրեց, որ եթե մարդը նպատակ է դնում իր առջեւ եւ ցանկանում է իրագործել, անպայման արդյունքի կհասնի։ Ա. Բեգլարյանը կարեւորեց նաեւ այն, որ բացի մասնագետ լինելուց, պետք է ուսանողներն ունենան պետական մտածողություն, լինեն երկրին պիտանի մասնագետներ, օգտակար՝ հասարակությանը։ Համոզմունք հայտնեց նաեւ, որ ներկա բոլոր ուսանողները կարող են հասնել իրենց նպատակներին, դառնալ լավ մասնագետներ, եթե դա ցանկանան։ «Նոբելյան մրցանակակիրները ձեզանից առավել չեն, պարզապես ձգտել են հասնել մի նպատակի»,- հավելեց Ա. Բեգլարյանը։
Ընթացքում ԱՀ պետնախարարին հարցերով ու առաջարկներով դիմեցին ուսանողները։ Մինչ օրս որոշ ուսանողներ դեռ չեն գրանցվել իրենց բուհերում, վճարովի կարգով ուսանողներին հետաքրքրում էր՝ պետության կողմից կլինի՞ օժանդակություն, հարցադրում հնչեց, որ հեռու բնակավայրերից եկող ուսանողներին տրվի ճանապարհածախսի փոխհատուցում եւ այլն։ Պետնախարարը պատասխանեց բոլորի հարցերին, արձանագրվեցին խնդիրներն ու առաջարկները։
ՀՀ-ում Արցախի մշտական ներկայացուցիչ Ս. Ղազարյանը տեղեկացրեց, որ անցած տարի պատերազմի սկսվելուց անմիջապես հետո նույն տարածքում մոտ 100 կամավորներ են աշխատել՝ օգնելով տեղահանված մեր հայրենակիցներին։ Այդ գործում էլ մեծ է եղել Ա. Եդիգարյանի նախաձեռնությունը։ Ս. Ղազարյանը նույնպես կարեւորեց, որ ուսանողները լինեն նախաձեռնող, ազատ իրենց մտածելակերպում, աշխատեն լավ սովորել: Կարեւորեց նաեւ այն, որ ինքն ու ներկա բոլոր ուսանողները ներկայացնում են Արցախ աշխարհը, եւ բոլորն են Արցախի մշտական ներկայացուցիչներ։ Հորդորեց բարձր պահել արցախցու անունը, ինքնուրույն ընթանալ գործնական ճանապարհով, հաղթահարել ներքին վախը։ Ուսանողները գոհ էին հանդիպումից, ուրախ, որ պետական այրերը հետաքրքրվում են իրենց խնդիրներով։
