Թուրքիայի նախագահ Ռեջեփ Թայիփ Էրդողանը The New York Times-ին տված հարցազրույցում ասել է, որ Անկարան ստիպված է գնացել ռուսական C-400 զենիթահրթիռային համալիրների ձեռքբերման գործարքին, քանի որ ԱՄՆ-ն հրաժարվել է վաճառել իր Patriot ՀՕՊ համակարգը:
«Կարծում եմ՝ արժեր դա անել։ Մենք իրավունք ունենք ամրապնդել մեր պաշտպանությունը, ինչպես կամենանք», – ընդգծել է Էրդողանը։
Միաժամանակ Թուրքիայի առաջնորդը կարևորել է ամերիկացիների հետ հարաբերությունների «պաշտպանությունն» ու «ամրապնդումը»։
2018 թվականի դեկտեմբերին Պետդեպարտամենտը հավանություն էր տվել Թուրքիային Patriot ՀՕՊ համալիրների վաճառքին։ Գործարքի գումարը 3,5 մլրդ դոլար էր կազմել։ Սակայն այդ ժամանակ Թուրքիան արդեն C-400-ի մատակարարման համաձայնագիր էր կնքել։
Ընդ որում՝ ԱՄՆ-ը պահանջել է Թուրքիայից հրաժարվել ռուսական համակարգերից հօգուտ Patriot-ի՝ չեղարկելով նորագույն F-35 կործանիչների վաճառքը և պատժամիջոցներ սահմանելով պաշտպանական-արդյունաբերական համալիրի ղեկավարների դեմ:
C-400 համալիրների մատակարարման համաձայնագիրը թյուրըմբռնում է առաջացրել Թուրքիայի ու ԱՄՆ-ի հարաբերություններում։ Քննարկվում է համալիրների երկրորդ գնդի մատակարարման հնարավորությունը։
