ԵԱՀԿ Մինսկի խմբի համանախագահող երկրներից մեկը՝ ԱՄՆ-ը, սկսել է Արցախի շուրջ տեղի ունեցող իրադարձությունները կոչել իրենց իսկական անուններով: Ստացվում է, որ, որպես միջնորդ երկիր, պարտավորված լինելով հանդես գալ չեզոքության դիրքերից՝ ԱՄՆ-ը այդ սկզբունքից հրաժարվելու լուրջ հայտ է ներկայացնում: Այս երկիրն օբյեկտիվորեն արդեն չի կարողանում ավանդական հավասարության նշաններ դնել հայկական եւ ադրբեջանական կողմերի միջեւ, ինչը կարող է բացատրվել միայն մեկ հանգամանքով՝ Բաքվի սադրանքներն ու ագրեսիվ գործողությունները տանում են տարածաշրջանային նոր էսկալացիայի: Վաշինգտոնում հասկացել են, որ Արցախի Հանրապետության եւ ժողովրդի դեմ Ադրբեջանի սպառնալից գործողություններին եւ հայտարարություններին չարձագանքելով՝ վերջինիս խրախուսում են նոր եւ շատ ավելի վտանգավոր հետեւանքներով արկածախնդրության, ուստի որոշել են այլեւս հրաժարվել այդ քաղաքականությունից:
Այս միտման մասին է փաստում նախօրեին ԱՄՆ-ի Սենատի արտաքին հարաբերությունների հանձնաժողովի լսումների ժամանակ ԱՄՆ պետքարտուղար Էնթոնի Բլինկենի հայտարարությունը: Վերջինս շեշտել է, որ ԱՄՆ-ը հանդես է գալիս Արցախում Հայաստանի եւ Ադրբեջանի միջեւ հակամարտությունը երկարաժամկետ սկզբունքով լուծելու օգտին եւ դեմ է միակողմանի քայլերին:
Նրա խոսքով՝ ինքն անձամբ անմիջականորեն շփվել է եւ՛ Հայաստանի, եւ՛ Ադրբեջանի ղեկավարության հետ՝ փորձելով խթանել Արցախի Հանրապետության հարցի երկարաժամկետ քաղաքական կարգավորման հեռանկարները: Էնթոնի Բլինկենը, տեղեկացնելով, որ Վաշինգտոնը մշակում եւ խթանում է վստահության ամրապնդման տարբեր միջոցառումներ, շեշտել է. «Մենք դեմ ենք ցանկացած միակողմանի գործողությունների, հատկապես Ադրբեջանի կողմից, որոնք միայն սրում են իրավիճակը»:
ԵԱՀԿ Մինսկի խմբի համանախագահ երկրի նման կտրուկ հայտարարությունը աննախադեպ է արցախյան գործընթացներին օբյեկտիվ գնահատականներ տալու առումով: Միջնորդ երկրները միշտ փորձել են հասցեական հայտարարություններ չանել, որպեսզի չխաթարեն բանակցային գործընթացը: Մշտապես միջնորդական առաքելության չեզոք դիրքից հրաժարվելու ԱՄՆ-ի այս քայլը, թերեւս, խոսում է այն մասին, որ Ադրբեջանի գործողություններն արդեն իրական սպառնալիք են դառնում տարածաշրջանի անվտանգության համար: Սա նշանակում է որ համաշխարհային հանրությունը բաց ակնարկում է, որ հալած յուղի տեղ չի ընդունում ադրբեջանաթուրքական քարոզչության կեղծ եւ ցինիկ դրույթները, թե, իբր, 44-օրյա պատերազմով պատասխանել են ՀՀ-ի տարածքային նկրտումներին, եւ որ Արցախի հիմնախնդիրը տարածքային է:
ԵԱՀԿ երկրներն այլեւս ստիպված են Ալիեւի ճակատին ուղիղ ասել, որ Բաքվից հնչող մանկամիտ փաստարկները եւ իրավիճակի կեղծ գնահատականներն այլեւս չեն ուզում լսել: Մյուս կողմից էլ՝ Բլինկենի հայտարարությունը կոշտ պատասխան էր Ալիեւի՝ վերջերս արած հերթական խոսքին, թե ԵԱՀԿ Մինսկի խումբն այլեւս անելիք չունի, որ Արցախի հիմնահարցն ադրբեջանաթուրքական ռազմական ագրեսիայի միջոցով լուծվել է:
ԱՄՆ պետքարտուղարի այդ հայտարարությունից կարելի է միանշանակ եզրակացնել, որ ԵԱՀԿ միջնորդ երկրները, ի վերջո, հասկացել են, որ արցախյան հակամարտության կողմերի միջեւ 30 տարի հավասարության նշան դնելով եւ աչք փակելով Ադրբեջանի ռազմատենչ հռետորաբանության առաջ՝ կանաչ լույս են վառել վերջինիս համար՝ միջազգային ահաբեկիչների մասնակցությամբ լայնածավալ ագրեսիա իրականացնելու Արցախի ժողովրդի դեմ, որն ընդամենը միջազգային իրավական նորմերին համապատասխան ինքնորոշման որոշում է ընդունել եւ արդեն երեք տասնամյակ պայքարում է իր այդ իրավունքի ճանաչման համար:
