Ուկրաինական ճգնաժամի թեժ պահին, երբ ՌԴ նախագահ Վլադիմիր Պուտինը զգուշացնում է, որ Ռուսաստանի համար ռազմական բնույթի սպառնալիքների դեպքում սեփական զինանոցում ունեցած զինատեսակներով հարված կհասցնի առանց բացառության բոլորին, Իլհամ Ալիեւը շտապեց հերթական՝ իր երկրի համար անխոհեմ քայլն անել:
ՌԴ առաջնորդի կտրուկ ուղերձից երկու օր անց արդեն Բաքվի ղեկավարը հայտարարեց, թե իրենք աջակցում են Ուկրաինայի տարածքային ամբողջականությանը, ինչպես մյուս երկրները, եւ դրա մասին բացահայտ են ասում: Ուկրաինայի տարածքային ամբողջականությանն աջակցելու մասին խոսել այն պահին, երբ ընթացող պատերազմը Դոնեցկի եւ Լուգանսկի ինքնորոշման իրավունքի պաշտպանության համար է, միանշանակ փաստում է ոչ միայն խոսքով, այլեւ գործով Ռուսաստանի դեմ դուրս գալու մասին:
Ալիեւն այդ օրն իրեն, կարելի է ասել, ավելին թույլ տվեց: Նկատելով, որ Ադրբեջանը լավ հարաբերություններ ունի ՌԴ-ի հետ՝ Բաքվի առաջնորդը հայտարարել է, թե միջազգային իրավունքի սկզբունքները ոչ մի դեպքում չպետք է խեղաթյուրվեն քաղաքական գերակայության պատճառով: Սա Մոսկվայի դեմ արվող բացահայտ դեմարշ է, այն դեպքում, երբ Արցախում հրադադարի պահպանման երաշխավորը ՌԴ խաղաղապահ զորախումբն է: Միգուցե, Ալիեւը հավատացե՞լ է վերջին ասուլիսում ադրբեջանցի լրագրողի հարցին պատասխանելիս Վլադիմիր Զելենսկու այն հայտարարությանը, թե ՌԴ-ն Ուկրաինայում իր նպատակին հասնելուց հետո կանցնի Ադրբեջանին:
Բաքվի առաջնորդի հայտարարությունը ենթադրում է ռազմական օգնություն պատերազմող Ուկրաինային, ինչն անում է նաեւ նրա ավագ եղբայրը՝ Թուրքիան: Վերջինս բիզնեսի ձեւակերպման տակ ոչ միայն բայրաքթարներ է տրամադրում Ուկրաինային, որոնց հարվածներից են հիմնականում կորուստներ կրում ՌԴ զինված ուժերը, այլեւ «Գորշ գայլեր» ծայրահեղական խմբավորման գրոհայիններ է տեղափոխում Ուկրաինա:
«ՎարԳոնզո» նախագծի լրագրոη Սեմյոն Պեգովը վերջերս հայտնեց, որ Թուրքիայի նախագահ Ռեջեփ Թայիփ Էրդողանը թուրքական ազգայնական «Գորշ գայլեր» կազմակերպության մի մեծ խումբ է ուղարկել Ուկրաինա: Ըստ աղբյուրի՝ նրանք Լեհաստանով են Ուկրաինա ներթափանցել: Պատերազմներ լուսաբանելու մեջ մասնագիտացած այս կայքը համարվում է Կրեմլին մոտ կանգնած աղբյուր, որը տիրապետում է հետախուզական հիմնավոր տվյալների: Ավելորդ չէ հիշեցնելը, որ այս նախագիծն էր, որ առաջինը բարձրաձայնեց Սիրիայի հյուսիսում Թուրքիայի վերահսկողության տակ գտնվող տարածքներում արցախյան պատերազմին մասնակցելու համար ջիհադիստ ծայրահեղականների պատրաստման եւ Ադրբեջան տեղափոխման մասին, ինչը հետագայում հաստատվեց բազմաթիվ փաստերով եւ Արցախի ՊԲ ուժերի կողմից գերի վերցված երկու ահաբեկիչների դեպքերով:
Ռուսաստանն արդեն լուրջ դժվարությունների է հանդիպում Ուկրաինային աննախադեպ ծավալի զենք եւ կենդանի ուժ մատակարարելու պատճառով, ինչի հետեւանքով վերջինս հրաժարվում է խաղաղության պայմանագիր կնքելուն ուղղված բանակցություններից եւ շարունակում է պատերազմը: Այս դեպքում ՌԴ-ն առարկայորեն ստիպված է թիրախավորել Ուկրաինային աջակցողներին, եւ բացառված չէ, որ պատերազմի խորացման որոշակի փուլում նաեւ հարվածներ հասցնի այդ պետություններին:
Հատկանշականն այն է, որ Վլադիմիր Պուտինի կոշտ հայտարարությանը ոչ պակաս կոշտ պատասխանեց Թուրքիան՝ հենց ՆԱՏՕ-ի անունից: Մեւլութ Չավուշօղլուն Լատինական Ամերիկա կատարած շրջագայության ժամանակ հայտարարեց, որ Հյուսիսատլանտյան դաշինքը Ռուսաստանին անհրաժեշտ պատասխան կտա դաշնակիցներից մեկի վրա հարձակման դեպքում։ Հայտարարելով, թե ՆԱՏՕ-ն չի պատրաստվում միջամտել Ուկրաինայի հակամարտությանը՝ Թուրքիայի ԱԳ նախարարն ասաց. «Բայց եթե որեւէ դաշնակցի վրա նույնիսկ ամենաչնչին հարձակումը լինի, մենք համապատասխան կերպով կպատասխանենք»։
Այսպիսով, ադրբեջանաթուրքական զույգը հետզհետե ավելի է ընդգծում իր դիրքորոշումն ուկրաինական հակամարտության եւ, մասնավորապես, ՌԴ-ի հանդեպ: Ուկրաինայում ճգնաժամի ձգձգման դեպքում այդ հակառուսական գիծն ավելի է խորանալու: ՌԴ-ի եւ թուրք-ադրբեջանական զույգի հարաբերությունների ցանկացած լարում իր ազդեցությունն է ունենալու Արցախի Հանրապետության շուրջ ձեւավորված ներկայիս ստատուս քվոյի վրա: Դա եւս մեկ կարեւոր հանգամանք է ՀՀ անվտանգային համակարգի արդյունավետությունը բարձրացնելու եւ դիվերսիֆիկացնելու հրամայականի համար:
