Չնայած Իրանում արդեն մեկ ամիս ընթացող բողոքի ակցիաներին՝ երկրի քաղաքական ղեկավարությունն ակտիվացնում է գործողություններն իր հյուսիսային սահմանների մոտ: Ակտիվությունը դրսեւորվում է բոլոր ուղղություններով: Իրանական ԶԼՄ-ները հրապարակում են Հայաստանի եւ Ադրբեջանի սահմանների երկայնքով մեծ ծավալի զորավարժությունների մեկնարկի մասին տեսանյութերը: Երեկ էլ մեկնարկեցին Իսլամական հեղափոխության պահապանների կորպուսի ցամաքային զորքերի «Հզոր Իրան» կարգախոսով եռօրյա զորավարժությունները: Սրան զուգահեռ ԻԻՀ-ի քաղաքական բարձրագույն ղեկավարությունն ավելի հաճախ է խոսում Հայաստանի եւ Ադրբեջանի միջեւ հարաբերությունների կարգավորման միջնորդի կարգավիճակում հանդես գալու իր պատրաստակամության մասին: Այդ մասին Իրանի նախագահ Իբրահիմ Ռաիսին հայտարարել էր Ղազախստանի մայրաքաղաք Աստանայում Ադրբեջանի նախագահի հետ հանդիպմանը։ «Իսլամական Հանրապետությունը պատրաստ է օգտագործել իր մեծ ներուժը Ադրբեջանի եւ Հայաստանի միջեւ վեճերը լուծելու համար»,- ասել էր Ռաիսին։
Իրանը մի կողմից միջնորդական առաքելության պատրաստակամություն է հայտնում, մյուս կողմից՝ Հայաստանի, Ադրբեջանի, Նախիջեւանի եւ Թուրքիայի սահմանի երկայնքով մեծաթիվ զորքեր կուտակում եւ զորավարժություններ անցկացնում: Այլ կերպ ասած՝ Թեհրանը Բաքվի նկատմամբ կիրառում է մտրակի եւ բլիթի դասական քաղաքականությունը՝ լավ իմանալով, որ Ադրբեջանը ներկայում բոլորովին այլ վեկտորում է եւ հետեւում է բացառապես Թուրքիայի հրահանգներին:
Անկախ քաղաքականություն վարելու դեպքում՝ Իրանի միջնորդական ջանքերի մասին առաջարկն անտեսելուց առաջ Ադրբեջանը լրջորեն կմտածեր, քանի որ այդ երկրում իրանական կողմնորոշում ունեցող շիա մահմեդականների ազդեցության գործոնը շատ մեծ է, եթե չասենք՝ գլխավորը: 44-օրյա պատերազմից հետո Բաքուն «պարտք» է մնացել միանգամից մի քանի պետության, եւ այսօր իր արտաքին քաղաքականությունը վերջին հաշվով որոշում են այդ երկրների մայրաքաղաքներում:
Ներկայում նանոտեխնոլոգիաների զարգացման առումով աշխարհում 6-րդ երկիր համարվող Իրանն ունի առաջադեմ եւ գերժամանակակից ռազմարդյունաբերություն, ինչի հետ հաշվի չնստելն ուղղակի հնարավոր չէ: Այս երկիրն ունի հզոր բալիստիկ հրթիռների համալիր եւ նորագույն պահանջներին համապատասխանող ԱԹՍ-ներ: Իրանական «Շահեդ» անօդաչու թռչող սարքերն իրենց տեխնիկական չափանիշներով գերազանցում են թուրքական «Բայրաքթարներին»: Իրանական զինանոցի մյուս ԱԹՍ-ները, մասնավորապես՝ ինքնասպանները իրենց անորսալիությամբ եւ մեծ քանակի լիցք տեղափոխելու կարողությամբ գերազանցում են այլ երկրների նմանատիպ արտադրանքներին: Այսօր նման լավ հագեցած զինանոց ունեցող երկիրը հայտարարում է, որ թույլ չի տա տարածաշրջանում սահմանի որեւէ փոփոխություն, առաջին հերթին՝ իր հյուսիսային սահմանների մոտ, եւ ցանկացած նման փորձ կվերածի մղձավանջի:
Բաքուն կարող է անտեսել բլիթի տեսքով Իրանի դիվանագիտական միջնորդության առաջարկները, սակայն չի կարող չտեսնել մտրակը՝ ռազմական գործոնը: Այս ամենին զուգահեռ՝ Իրանն ուժեղացնում է իր ներկայությունը ՀՀ-ում՝ բոլոր հիմնական ոլորտներում: Սյունիքում հյուպատոսություն բացելուն զուգահետ Թեհրանը կտրուկ ակտիվացնում է տնտեսական համագործակցությունը Հայաստանի հետ: Վերջերս հայտարարվեց նաեւ Հայաստանում մեքենաշինական գործարանի համապատասխան հոսքագիծ բացելու նախագծի մասին: Այն ուժեղացնում է Թեհրանի տնտեսական համագործակցությունը Հայաստանի հետ, ինչն էլ իր հերթին նշանակում է ուժեղացնել տնտեսական ցամաքային հաղորդակցության ուղիները, որոնք անցնում են Սյունիքի ողջ երկայնքով՝ հարավից հյուսիս:
