Արցախի եւ Ադրբեջանի սահմանին արձանագրված հերթական կրակոցներն ավելորդ անգամ փաստում են, որ իր հողի վրա խաղաղ ապրելու համար արցախցուն անհրաժեշտ են անվտանգության լրացուցիչ երաշխիքներ, ինչը ենթադրում է առաջին հերթին Արցախի պաշտպանության բանակի ուժեղացում, այն ժամանակակից սպառազինությամբ եւ տեխնիկական միջոցներով հագեցում եւ ռուս խաղաղապահ ուժերի կարողությունների մեծացում: Բաքվի վարած ռազմատենչ քաղաքականության պարագայում միայն այս պայմանների առկայությամբ Ադրբեջանի հետ շփման գծի ողջ երկայնքով կապահովվեն արցախցու անվտանգ կյանքի եւ բնականոն կենսագործունեության պայմանները:
44-օրյա պատերազմից հետո Արցախի բնակավայրերի մեծ մասը դարձել է սահմանամերձ, գյուղատնտեսական նշանակության հողամասերի զգալի մասը թշնամու ուղիղ կրակային թիրախում է: Հրադադարի խախտման Ադրբեջանի զինուժի պարբերական գործողությունների պայմաններում, փաստորեն, անհնար է դառնում նաեւ կենսական նշանակության հողատարածքների մշակումը: Այս պայմաններում Արցախի եւ Ադրբեջանի շփման գծում տեղակայված մոտ 2000 ռուս խաղաղապահները եւ 27 դիտակետերն ամենեւին բավարար չեն հրադադարի ռեժիմը վերահսկելու եւ շփման գծի երկայնքով դաշտային կամ ենթակառուցվածքային աշխատանքներ կատարող արցախցիների անվտանգությունն ապահովելու համար:
Փետրվարի 15-ին ադրբեջանական զինուժն Արցախի շփման գծում երկու անգամ խախտեց հրադադարի ռեժիմը: Ասկերանի շրջանի Խրամորթ գյուղի հարեւանությամբ ամրակայված ադրբեջանական դիրքից հրազենով հերթական կրակն էր բացվել նույն համայնքի վարչական տարածքում գտնվող վարելահողում տրակտորով գյուղատնտեսական աշխատանքներ կատարող անձանց ուղղությամբ, ինչի հետեւանքով խոցվել է տրակտորը, իսկ քաղաքացիներին հաջողվել է փրկվել ռուս խաղաղապահների միջամտության շնորհիվ միայն: Պետք է արձանագրել, որ նման դեպքերը գրանցվում են այն ժամանակ, երբ գարնանային հողագործական աշխատանքները դեռ չեն էլ սկսվել: Ադրբեջանցիների հեղինակած հրադադարի ռեժիմի խախտման դեպքերի վերլուծությունը ցույց է տալիս, որ գրեթե բոլոր գյուղատնտեսական աշխատանքներն անհնար կլինի իրականացնել առանց խաղաղապահների ներկայության:
Այս դեպքում Արցախի իշխանությունները պետք է խաղաղապահների թվի առնվազն եռապատկման հարց բարձրացնեն: Դա արդեն անհրաժեշտություն է, քանի որ Ադրբեջանն ակնհայտորեն եւ համառորեն չի ցանկանում պահպանել նոյեմբերի 9-ի եռակողմ հայտարարության դրույթները: Մյուս կողմից էլ Բաքվի այդ քայլերն Արցախի բնակչության համար ապրելու անտանելի պայմանների ստեղծման նպատակ են հետապնդում: Ադրբեջանցիների անհեռատես մտածողությամբ՝ իրենք նման ձեւով կարող են ստիպել արցախցուն լքել իր հազարամյակների բնօրրանը: Ընդհակառակը՝ այդ քայլերով ադրբեջանցիներն ավելի են ամրացնում արցախցու վճռականությունը՝ առավել ամուր կանգնելու իր հողի վրա, իսկ հրադադարի խախտման դեպքերի միակ հետեւանքն այն է լինելու, որ Արցախի պաշտպանության բանակը ստիպված պատասխանելու է, ընդ որում՝ ոչ համարժեք միջոցներով:
Նախօրեին Արցախի Հանրապետության արեւելյան սահմանագոտում ադրբեջանական զինուժի կրակոցից էլ հրազենային վիրավորում էր ստացել ՊԲ ժամկետային զինծառայողը, ով կայուն ծանր վիճակում է: Հակառակորդը դիմում է նման սադրանքների, այն դեպքում, երբ լավ գիտի, որ պատասխանը հետեւելու է: Բաքվի նման վարքագիծը հակասում է տարածաշրջանում խաղաղություն հաստատելու մասին ադրբեջանցիների առաջնորդի վերջին հայտարարություններին: Իրավիճակի ողջ անհեթեթությունն այն է, որ հրադադարի ռեժիմի խախտման երկու դեպքն էլ անմիջապես հաջորդեցին Ալիեւի՝ խաղաղություն հաստատելու պատրաստակամության մասին հերթական հայտարարությանը: Մնում է միայն հերթական անգամ տարակուսել, թե որքան հակասական են խաղաղության մասին ալիեւյան պատկերացումները:
