Լաչինի միջանցքի փակման 100-րդ օրվա պայմաններում ՌԴ ԱԳՆ պաշտոնական ներկայացուցիչը հայտնում է իր պետության մտահոգությունը, որ կողմերը փոխզիջման չեն գնում: Մարիա Զախարովան նաեւ մտահոգություն էր հայտնել, որ գնալով մեծանում է թշնամական հռետորաբանությունը, եւ Արցախում հրադադարի խախտման դեպքերը հաճախակի են դառնում:
Այստեղ հրադադարի խախտման հաճախակիացումը մեղմ է ասված, դրանք արձանագրվում են գրեթե ամենօրյա ռեժիմով: ՌԴ ԱԳՆ ներկայացուցչի վերջին հայտարարության օրն էլ Ռուսաստանի պաշտպանության նախարարությունը հաղորդագրություն տարածեց՝ հայտնելով, թե Արցախի եւ Ադրբեջանի շփման գծի Շուշիի հատվածում արձանագրվել է հրադադարի խախտում: Արցախի իրավապահ մարմիններից էլ պարբերաբար հաղորդագրություններ են տարածվում, որ ադրբեջանական զինուժը կրակ է բացել գյուղատնտեսական աշխատանքներ կատարող արցախցի գյուղացիների ուղղությամբ:
Ադրբեջանի՝ վերեւում շարադրված գործողություններն ամբողջությամբ տեղավորվում են պետական ցեղասպան քաղաքականության տրամաբանության մեջ: Արցախն արդեն 100 օր պահելով շրջափակման մեջ՝ գարնան գալուն զուգահեռ Բաքուն թույլ չի տալիս արցախցիներին զբաղվել գյուղատնտեսությամբ եւ մեղմել պարենի անբավարարությունը, ինչը մասն է այն համակարգային հումանիտար ճգնաժամի, որում հայտնվել է Արցախը:
ՌԴ ԱԳՆ պաշտոնական ներկայացուցիչն առավել քան մտահոգիչ զուգահեռներ անցկացրեց՝ հայտարարելով, թե կողմերը չեն գնում փոխզիջման: Հարց է առաջանում, թե Արցախը ի՞նչ զիջում պետք է անի, որ չի արել: Դրա համար ընդամենը պետք է թվարկել այն պահանջները, որոնք հրապարակել է պաշտոնական Բաքուն՝ արդարացնելով Լաչինի միջանցքի փակումը: Կեղծ բնապահպանական պահանջները շատ արագ վերածվեցին քաղաքական եւ Արցախի ժողովրդի համար գոյաբանական պահանջների: Արցախի եւ Ադրբեջանի ներկայացուցիչների վերջին հանդիպումից հետո Արցախը հայտարարեց, որ համաձայնել է միանգամյա ադրբեջանցի մասնագետների դիտորդների խումբ ընդունել Դրմբոնի ու Կաշենի ոսկու, պղնձի եւ մոլիբդենի հանքավայրեր, սակայն դրանից հետո էլ Լաչինի միջանցքը չի բացվել: Ուրեմն՝ հայկական կողմի էլ ի՞նչ զիջումների մասին է խոսում Մարիա Զախարովան:
Լավ կլիներ, որ ՌԴ ԱԳՆ պաշտոնական ներկայացուցիչը հերքեր Ադրբեջանի կեղծ տեղեկատվությունն այն մասին, թե Հայաստանից Արցախ ռուս խաղաղապահների ուղեկցությամբ ռազմական շարասյուն է տեղափոխվել: Այդպիսի հերքման բացակայությունը վկայում է ռուս-ադրբեջանական հնարավոր պայմանավորվածությունների մասին, ինչը համապատասխան եզրակացությունների անհրաժեշտություն է ստեղծում հայկական քաղաքական դաշտում: Ապատեղեկատվություն շրջանառելուց եւ Շուշիի մատույցներում դիվերսիա նախապատրաստելուց հետո պաշտոնական Բաքուն հայտարարություն է տարածում Լաչինի միջանցքում հսկիչ անցակետ դնելու մասին: Ստացվում է, որ հայկական կողմը պետք է փոխզիջման գնա եւ անցակետ տեղադրի Լաչինի միջանցքում, ինչը ոչ միայն 2020 թ. նոյեմբերի 9-ի եռակողմ հայտարարության չեղարկում է նշանակում, այլեւ Արցախի բնակչությանը էթնիկ զտման ուղիղ ճանապարհ, ինչի մասին մեկ անգամ չէ, որ հայտարարել է պաշտոնական Ստեփանակերտը:
Արցախի ժողովուրդը հայտարարում է, որ իր իրավունքների հարցը պետք է քննարկվի միջազգային որեւէ ձեւաչափում, իսկ ադրբեջանական կողմն Արցախի ներկայացուցիչների հետ Լաչինի միջանցքի բացման հարցով հանդիպմանը առաջարկում է խոսել… ինտեգրացիայի մասին:
Հետեւաբար՝ ի՞նչ փոխզիջման մասին է խոսում ՌԴ ԱԳՆ ներկայացուցիչը: Ստացվում է, որ միջանցքը բացելու դիմաց Բաքուն պահանջում է վերացնել Արցախի պաշտպանության բանակը եւ ինտեգրվել Ադրբեջանի կազմում: Այլ կերպ ասած՝ միջանցքը փակ պահելով՝ Ադրբեջանը փորձում է իր օգտին լուծել երեք տասնամյակ տեւող հիմնահարցը, եւ ենթադրվում է, որ դրան նպաստում է նաեւ ռուս խաղաղապահների անհասկանալի եւ անտրամաբանական անգործությունը: Տեւական եւ արյունալի պատերազմները չկոտրեցին սեփական իրավունքների համար պայքարի արցախցու ոգին, ուր մնաց, թե շրջափակումներով արցախցուն ինչ-որ բան կարող է պարտադրվել: Արցախի ժողովուրդը փոխզիջումների հարցը կարող է քննարկել միջազգային որեւէ ձեւաչափով բանակցային սեղանի շուրջ, այսօր լուծման այլ ճանապարհ չկա:
